McDonald's ជាក្រុមហ៊ុន Fast Food ធំជាងគេបំផុតនៅក្នុងពិភពលោក ដែលបច្ចុប្បន្នមានអតិថិជនប្រើប្រាស់ប្រចាំថ្ងៃ ៦៨លាននាក់ នៅក្នុង ១១៩ប្រទេស និងមានហាងរហូតដល់ ៣៥.០០០កន្លែង និងមានបុគ្គលិក ១,៧លាននាក់ នៅជុំវិញពិភពលោក។ ក្រុមហ៊ុន McDonald's បានចាប់ផ្ដើមសេវាកម្មរបស់ខ្លួនដំបូងនៅឆ្នាំ ១៩៤០ ដោយមានស្ថានិក Richard និង Maurice McDonald ដែលជាបងប្អូននឹងគ្នា ហើយនៅពេលនេះ McDonald's ផ្ដល់សេវាកម្មអាហារប្រភេទសាច់ ហើយក្រោយមកនៅឆ្នាំ ១៩៤៨ ទើបសម្រេចចិត្តផ្ដល់សេវាកម្មប្រភេទអាហារ Hamburger វិញ។ នៅក្នុងឆ្នាំ ១៩៥៥ ពាណិជ្ជករ Ray Kroc ក៏បានសុំ Richard និង Maurice McDonald ចូលរួមក្នុងក្រុមហ៊ុន McDonald's ដែរ។ ចាប់តាំងពីពេលនោះមក McDonald's បានបន្តប្រតិបត្តិការរបស់ខ្លួនរហូតដល់មកឆ្នាំ ២០១២ ទើបមានរបាយការណ៍ហិរញ្ញវត្ថុ ដោយរកប្រាក់ចំណូលបាន ២៧,៥ពាន់លានដុល្លារអាមេរិក និងចំណេញ ៥,៥ពាន់លានដុល្លារអាមេរិក។ មកដល់ពេលនេះ McDonald's បានលក់ hamburgers, cheeseburgers, សាច់មាន់បំពង, ដំឡូងបំពង,ភេសជ្ជ ជាដើម។
McDonald's ដំបូងឡើយប្រើប្រាស់ឈ្មោះ "Speedee" ប៉ុន្តែក្រោយមកនៅឆ្នាំ ១៩៦៧ ក៏បានប្ដូរមកប្រើឈ្មោះ "Ronald McDonald" វិញ ខណៈដែលក្រុមហ៊ុនបានចុះបញ្ជីពាណិជ្ជកម្មលើកដំបូងនៅក្នុង សហរដ្ឋអាមេរិក ហើយក្រោយមក ក៏ប្ដូរមកប្រើឈ្មោះ "McDonald's" ជាផ្លូវការតែម្ដង។ ដោយសារតែមានការផ្ដល់មតិរិះគន់ និងដើម្បីលើកស្ទូយផ្នែកសុខភាពនោះ McDonald's បានសម្រេចចិត្តដាក់បម្រាម មិនឲ្យជក់បារីនៅក្នុងហាង McDonald's ទាំងអស់ ដោយបម្រាមនេះត្រូវបានធ្វើឡើងចាប់ពីឆ្នាំ ១៩៩៤។
បើទោះបីជា ស្លាកសញ្ញា McDonald's ត្រូវបានពិភពលោកទាំងមូលស្គាល់ក៏ហើយក្ដី ប៉ុន្តែជារៀងរាល់ឆ្នាំ McDonald's បានចំណាយកលុយរាប់លានដុល្លារអាមេរិក ក្នុងការផ្សព្វផ្សាយពាណិជ្ជកម្ម តាមរយៈទូរទស្សន៍ វិទ្យុ កាសែត ផ្ទាំងបដា ជាពិសេសគឺចាយលុយធំនៅក្នុងព្រឹត្តិការណ៍ FIFA World Cup និង Olympic Games ប៉ុន្តែពុំមានសេចក្ដីបញ្ជាក់ណាមួយពាក់ព័ន្ធនឹងខ្នងចំណាយលើពាណិជ្ជកម្មនេះឡើយ។
ក្រុមហ៊ុន McDonald's ក៏បានចូលរួមនៅក្នុងវិស័យមនុស្សធម៌ផងដែរ ដោយជារៀងរាល់ឆ្នាំ McDonald's មានរៀបចំព្រឹត្តិការណ៍មួយ McHappy Day គឺជាថ្ងៃដែលម្ចាស់ហ៊ុន ត្រូវលក់ភាគហ៊ុនដើម្បីបរិច្ចាគ លើវិស័យមនុស្សធម៌ ដោយកាលពីឆ្នាំ ២០១០ បានរៀបចំឡើងនៅក្នុងប្រទេសចំនួន ១៧ ហើយប្រមូលបានថវិកាជាច្រើនរហូតដល់ ២០,៨លានដុល្លារអាមេរិក។
នៅក្នុងឆ្នាំ ១៩៩០ មានលិខិតផ្សព្វផ្សាយមួយបានចុះផ្សាយថា ផលិតផល McDonald's បានធ្វើឲ្យប៉ះពាល់ដល់បរិស្ថាន សុខភាព និងរំលោភលក្ខខណ្ឌការងារ ប៉ុន្តែមតិរិះគន់នេះ មិនបានធ្វើឲ្យ McDonald's បាត់ប្រជាប្រិយភាពប៉ុណ្ណោះទេ ផ្ទុយទៅវិញ បានធ្វើឲ្យកាន់តែល្បីឈ្មោះ ព្រោះថា មន្ត្រីជំនាញ និងតុលាការបានរកឃើញថា ពុំមានផលប៉ះពាល់ដល់សុខភាព និងបរិស្ថានឡើង ក្រៅពីផ្ដល់រសជាតិឆ្ងាញ់ គឺមិនបានអ្វីផ្សេងទេ។ ស្ទើរតែរៀងរាល់ឆ្នាំ McDonald's ទទួលបានមតិរិះគន់ជាច្រើន ពាក់ព័ន្ធសេវាកម្ម ផលប៉ះពាល់ រសជាតិ ជាដើម។
ក្រុមហ៊ុន McDonald's បានជួបនូវពាក្យបណ្ដឹងជាច្រើនពាក់ព័ន្ធនឹងការប្រើស្លាកសញ្ញា ព្រោះថា McDonald's បានគំរាមដល់អាជីវកម្មម្អូបអាហារទាំងអស់ថា ប្រសិនបើប្រើប្រាស់ ឈ្មោះក្រុមហ៊ុនដោយ ប្រើពាក្យ "Mc ឬ Mac" នោះខ្លួននឹងប្ដឹង ជាក់ស្ដែង McDonald's បានប្ដឹងហាងកាហ្វេស្កុតឡេន ដែលប្រើឈ្មោះ McDonald ប៉ុន្តែ McDonald's បានចាញ់ក្ដីនៅក្នុងប្រទេសម៉ាឡេស៊ី ដោយមិនអាចប្ដឹង ឈ្នះក្រុមហ៊ុន McCurry ព្រោះថា McCurry បានចុះបញ្ជីពាណិជ្ជកម្មក្នុងស្រុកមុនពេល McDonald's មកដល់។
គួរបញ្ជាក់ផងដែរថា កាលពីឆ្នាំ ២០១៣ McDonald's រកប្រាក់ចំណូលបាន ២៨,១ពាន់លានដុល្លារអាមេរិក និងចំណេញ ៥,៥ពាន់លានដុល្លារអាមេរិក ហើយនៅក្នុងឆ្នាំ ២០១៥ នេះ មានព័ត៌មានលេចឮថា McDonald's នឹងមានវត្តមាននៅលើទីផ្សារប្រទេសកម្ពុជា៕
