(ភ្នំពេញ)៖ ប្រធានក្រុមប្រឹក្សាចៅក្រមជំនុំជម្រះ និងជាអនុប្រធានសាលាដំបូងរាជធានីភ្នំពេញ លោក ហុក ពៅ នៅព្រឹកថ្ងៃទី១៤ ខែកក្កដា ឆ្នាំ២០២៥ បានបើកសវនាការដើម្បីប្រកាសសាលក្រម លើសំណុំរឿងករណីជួញដូរ រក្សាទុក និងដឹកជញ្ជូនថ្នាំញៀនជាង១៨៥គីឡូក្រាម នៅរាជធានីភ្នំពេញ ដោយសម្រេចផ្ន្តន្ទាទោសលើឧក្រិដ្ឋជន ទី១៖ឈ្មោះ សេង សុខទី ដាក់គុក៣០ឆ្នាំ ពិន័យ៨០លានរៀល, ទី២៖ឈ្មោះ ខៀវ ចិន្តា ភេទស្រី ដាក់ពន្ធនាគារអស់១ជីវិត ពិន័យ៣០០លានរៀល និងទី៣៖ឈ្មោះ ហេង គឹមលាង ភេទស្រី ឲ្យរួចផុតបទចោទ ពីបទ រក្សាទុក ដឹកជញ្ជូន និងជួញដូរដោយខុសច្បាប់នូវសារជាតិញៀន និងបទសម្អាតប្រាក់។
ពាក់ព័ន្ធករណីខាងលើមន្ត្រីនគរបាលជាន់ខ្ពស់ មន្ទីរប្រឆាំងគ្រឿងញៀនបញ្ជាក់ថា កាលពីថ្ងៃទី២២ ខែមីនា ឆ្នាំ២០២៤ វេលាម៉ោង១៦៖០៥នាទី កម្លាំងជំនាញ (ក៧) នៃមន្ទីរប្រឆាំងគ្រឿងញៀន ដឹកនាំដោយលោកឧត្តមសេនីយ៍ត្រី ដោក ភិរិទ្ធ នាយករងមន្ទីរ និងវរសេនីយ៍ឯក យ៉េង ប៊ុនណា នាយការិយាល័យ ក៧ និងមានការសម្របសម្រួលដោយលោក គឹម ហុងសាន ព្រះរាជអាជ្ញារងអមសាលាដំបូងរាជធានីភ្នំពេញ បានបង្ក្រាបនៅ២គោលដៅ ក្នុងនោះគោលដៅទី១៖ ដីឡូត៍បណ្តោយផ្លូវ១០០៣ សង្កាត់ច្រាំងចំរេះ២ ខណ្ឌឬស្សីកែវ រាជធានីភ្នំពេញ និងគោលដៅទី២៖ មុខវត្តញាណរង្សី ផ្លូវ៣៥៥ សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ។
ជនសង្ស័យដែលឃាត់ខ្លួនបានរួមមាន ឈ្មោះ សេង សុខទី, ឈ្មោះ ខៀវ ចិន្តា ភេទស្រី និងឈ្មោះ ហេង គឹមលាង ភេទស្រី (ម្ចាស់ផ្ទះ)។ សម្រាប់វត្ថុតាងដែលចាប់យកបានរួមមាន៖ កេតាមីន (KETAMINE) ទម្ងន់ជាង១៨៣គីឡូ និងមេតំហ្វេតាមីន (ICE) ទម្ងន់១៩៩៦ក្រាម (១គីឡូ និង៩៩៦ក្រាម)។ សរុបវត្ថុតាងគ្រឿងញៀន ១៨៥.១៩គីឡូក្រាម។
ជនល្មើសទាំង៣នាក់ និងវត្ថុតាងត្រូវបានកម្លាំងជំនាញកសាងសំណុំរឿងបញ្ជូន ទៅសាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ និងបន្តស្រាវជ្រាវដើម្បីតាមរកមេខ្លោង និងអ្នកពាក់ព័ន្ធផ្សេងទៀត មកផ្តន្ទាទោសតាមច្បាប់៕
