(ឧត្ដរមានជ័យ)៖ នៅព្រឹកថ្ងៃទី១១ ខែកក្កដា ឆ្នាំ២០២៥ នាយឧត្ដមសេនីយ៍ សឹង សំណាង អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងអាកាស ដឹកនាំនាយទាហានកងទ័ពជើងអាកាស អញ្ជើញចុះជួបសំណេះសំណាល សួរសុខទុក្ខ កងការពារអាកាស អគ្គបញ្ជាការ ស្ថិតក្រោមការដឹកនាំបញ្ជាដោយលោកឧត្តមសេនីយ៍ទោ អឿ សំអុល ដែលកំពុងបំពេញភារកិច្ចការពារព្រំដែនទិសទី៣ យោធភូមិភាគទី៤ ស្ថិតនៅក្នុងស្រុកសំរោង ខេត្តឧត្តរមានជ័យ។
ក្នុងឱកាសនោះនាយឧត្តមសេនីយ៍ បានមានប្រសាសន៍សំណេះសំណាលផ្ដាំផ្ញើសួរសុខទុក្ខដល់ កងការពារអាកាសអគ្គបញ្ជាការជួរមុខដែលឈរជើងការពារដែនអាកាសតាមខ្សែបន្ទាត់ព្រំដែន ព្រមទាំងសម្ដែងការកោតសរសើរចំពោះវីវភាព ស្នេហាជាតិ មាតុភូមិ របស់កងកម្លាំងការពារអាកាស អគ្គបញ្ជាការដ្ឋាន ជួរមុខ ដែលហ៊ានលះបង់គ្រប់បែបយ៉ាង ដើម្បីបុព្វហេតុជាតិ។
នាយឧត្តមសេនីយ៍ សឹង សំណាង ក៏បានណែនាំយោធិនត្រូវថែរក្សាសុខភាព ជាពិសេសត្រូវខិតខំការពារឱ្យបានដាច់ខាតនូវបូរណភាពទឹកដី អធិបតេយ្យជាតិ ទោះក្នុងតម្លៃណាក៏ដោយ។
នាយឧត្តមសេនីយ៍ បានធ្វើការគូសបញ្ជាក់ថា កងទ័ពមានការប្ដេជ្ញាចិត្ត និងគាំទ្រយ៉ាងម៉ឺងម៉ាត់ រាល់បទបញ្ជារបស់រាជរដ្ឋាភិបាលកម្ពុជា ជាពិសេសគាំទ្រការសម្រេចដាក់ពាក្យបណ្ដឹងទៅតុលាការអន្តរជាតិ ICJ ដើម្បីជួយស្វែងរកដំណោះស្រាយបញ្ហាវិវាទព្រំដែន នៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី។ រាជរដ្ឋាភិបាលនឹងបន្តធ្វើកិច្ចការនេះ ប្រកបដោយការប្តេជ្ញាចិត្ត និងការទទួលខុសត្រូវខ្ពស់ ដើម្បីការពារបូរណភាពទឹកដី ក៏ដូចជាឧត្តមប្រយោជន៍ជាតិ និងប្រជាជនខ្មែរ។
នាយឧត្តមសេនីយ៍មេបញ្ជាការទ័ពអាកាស បានមានប្រសាសន៍បន្តថា សម្តេចតេជោ ហ៊ុន សែន អតីតនាយករដ្ឋមន្ត្រី និងសម្តេចធិបតី ហ៊ុន ម៉ាណែត នាយករដ្ឋមន្ត្រីបច្ចុប្បន្ន បានខិតខំប្រឹងប្រែង និងប្តូរផ្តាច់បំផុតក្នុងការការពារបូរណភាពទឹកដីដោយមិនអនុញ្ញាតឱ្យបាត់បង់សូម្បីតែមួយមីល្លីម៉ែត្រឡើយ។
លោកបន្តថា ភាពអត់ធ្មត់របស់កងទ័ពកម្ពុជា បានបង្ហាញអន្តរជាតិឱ្យឃើញពីភាពចាស់ទុំ ប្រកបដោយភាពថ្លៃថ្នូររបស់កងទ័ពកម្ពុជា នៅចំពោះមុខការរំលោភបំពានពីសំណាក់ប្រទេសថៃ។ បើទោះជាយ៉ាងណា កងទ័ពកម្ពុជាបានបង្ហាញពីភាពមោះមុតក្នុងការឆ្លើយតបបានទាន់ពេលវេលាចំពោះការរំលោភបំពានរបស់សត្រូវឈ្លានពាន ។
ក្នុងចុះសួរសុខទុក្ខនោះ នាយឧត្តមសេនីយ៍ សឹង សំណាង ក៏បានផ្ដល់ជូនអំណោយជាសម្ភារៈគ្រឿងឧបភោគបរិភោគ បន្លែ ទឹកសុទ្ធ និងថវិកាមួយចំនួនទៀតជូនអង្គភាពការពារអាកាស អគ្គបញ្ជាការ ជាការលើកទឹកចិត្តដល់កងទ័ពជួរមុខ ដែលឈរការពារបូរណភាពទឹកដី មិនអនុញ្ញាតឱ្យកងទ័ពឈ្លានពាន មករំលោភលើបូរណភាពទឹកដី។នេះគឺជាកាយវិការដ៏ប្រពៃថ្លៃថ្លាបានជួយជំរុញ និងលើកទឹកចិត្តដល់កងទ័ពជួរមុខឱ្យមានភាពមោះមុត អង់អាច ក្លាហាន និងបំពេញភារកិច្ចបំរើជាតិមាតុភូមិដោយមិនខ្លាចញញើតជាមួយខ្មាំងសត្រូវ ពិសេសហ៊ានបូជាអាយុជីវិតជូនប្រទេសជាតិ៕
