(ភ្នំពេញ)៖ លោក ហួត ហាក់ រដ្ឋមន្ត្រីក្រសួងទេសចរណ៍ នៅថ្ងៃទី៧ ខែកក្កដា ឆ្នាំ២០២៥ បានអញ្ជើញជួបសំណេះសំណាលជាមួយម្ចាស់ជ័យលាភីអាហារូបករណ៍ទៅសិក្សា នៅប្រទេសជប៉ុន និងប្រទេសហុងគ្រី ចំនួន ៣៩រូប ក្នុងនោះរួមមានជ័យលាភីអាហារូបករណ៍ទៅសិក្សានៅប្រទេស (JDS) ចំនួន ២៣រូប (ស្រី១២រូប) និងជ័យលាភីអាហារូបករណ៍ទៅសិក្សានៅប្រទេសហុងគ្រីចំនួន ១៦រូប(ស្រី៧រូប)។
រដ្ឋមន្រ្តីក្រសួងទេសចរណ៍ បានស្វាគមន៍ចំពោះម្ចាស់ជ័យលាភីអាហារូបករណ៍នៅប្រទេសជប៉ុន និងប្រទេសហុងគ្រី មកកាន់ក្រសួងទេសចរណ៍ និងបានកោតសរសើរ អបអរសារទរ និងវាយតម្លៃខ្ពស់ចំពោះសមត្ថភាព និងការខិតខំប្រឹងប្រែងរបស់បេក្ខជន និងបេក្ខនារីជ័យលាភី ព្រមទាំងអរគុណចំពោះចំណាប់អារម្មណ៍ចង់ដឹង និងចង់ស្គាល់ក្រសួងទេសចរណ៍។
ថ្លែងក្នុងឱកាសដ៏ស្និទ្ធស្នាល នាពេលនេះ រដ្ឋមន្រ្តី ហួត ហាក់ បានបញ្ជាក់អំពី តួនាទី និងកាតព្វកិច្ចរបស់យុវជន ចំពោះប្រទេសជាតិ នៅពេលបំពញការសិក្សានៅបរទេស។ ក្រៅពីការសិក្សា ប្រជាជនកម្ពុជាម្នាក់ ឬនិស្សិតម្នាក់ ជាទូតសុឆន្ទៈតំណាងកម្ពុជា ក្នុងការបង្ហាញពីវប្បធម៌ ទេសចរណ៍ ការអភិវឌ្ឍ និងស្ថានភាពពិតរបស់ប្រទេសកម្ពុជា ឲ្យពិភពលោកបានស្គាល់ និងតួនាទីរបស់យុវជនពេលបញ្ចប់ការសិក្សា ចំពោះប្រទេសជាតិ។ ត្រឡប់មកវិញប្រកបដោយសុវត្ថិភាព មានសមត្ថភាព ក្នុងការរួមចំណែកចូលរួមជាមួយរាជរដ្ឋាភិបាល ក្នុងការអភិវឌ្ឍប្រទេស ទៅតាមជំនាញរៀងៗខ្លួន ក្នុងករណីប្អូនៗមានបញ្ហា ឬសំណូមពរអ្វីមួយនៅក្រៅប្រទេស សូមទំនាក់ទំនងទៅស្ថានឯកអគ្គរាជទូតកម្ពុជា ប្រចាំនៅប្រទេសដែលប្អូនៗរស់នៅ។
រដ្ឋមន្រ្តី ហួត ហាក់ ក៏បានជំរុញលើកទឹកចិត្តដល់ប្អូនៗ ឲ្យចូលរួមក្នុងកម្មវិធី ដែលស្ថានឯកអគ្គរាជទូតកម្ពុជា ប្រចាំនៅប្រទេសដែលប្អូនៗស្នាក់នៅសិក្សារៀនសូត្រ និងក្រុមការងារយុវជននៅទីនោះផងដែរ និងបានផ្តល់ជូនកាដូអនុស្សាវរីយ៍ មានស៊ដូចជា ប្រតិទិនក្រសួងទេសចរណ៍ flash USB និងសៀវភៅចំនួន ៣ក្បាល ក្នុងម្នាក់ៗ ដែលជាចំណងដៃរបស់លោករួមមាន៖
*ទី១៖ កំពូលស្ថាបនិក និងបីតាសន្តិភាពរបស់កម្ពុជា (សម្តេចតេជោ)
*ទី២៖ ទឹកចិត្តអ្នកជួយសង្គ្រោះ (សម្តេចកិត្តិព្រឹទ្ធបណ្ឌិត)
*ទី៣៖ កូនប្រុសច្បងដ៏មានឥទ្ធិពល (សម្តេចធិបតី)។
រដ្ឋមន្ត្រី ហួត ហាក់ បានគូសរំលេចបន្ថែមថា សៀវភៅទាំងបីនេះ នឹងជាត្រីវិស័យដ៏សំខាន់ ដែលប្អូនៗអាចដកស្រង់សម្រាប់ជាបទពិសោធជីវិត និងជាមូលដ្ឋាន ដើម្បីតម្រង់អនាគតរបស់ខ្លួនលើវិថីការងារ ដែលប្អូនជ្រើសរើស ព្រមទាំងជូនពរថ្នាក់ដឹកនាំ និងប្អូនៗទាំងអស់ ព្រមទាំងក្រុមគ្រួសារ សូមមានសុខភាពល្អ សុភមង្គល និងជោគជ័យគ្រប់ភារកិច្ច និងការរៀនសូត្រ៕
