(ភ្នំពេញ)៖ ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន បានលើកឡើងថា ការប្រកួតកីឡាមានសារៈសំខាន់ខ្លាំងណាស់ហើយការចូលរួមលើកកម្ពស់វិស័យកីឡា គឺជាកាតព្វកិច្ចរបស់ប្រជាពលរដ្ឋទាំងអស់គ្នា ដូចដែលគ្រឹះស្ថានមីក្រូហិរញ្ញវត្ថុ LOLC Cambodia Plc បានកំពុងលើកកម្ពស់នាពេលនេះ និងសូមសំណូមពរដល់វិស័យឯកជនទាំងអស់បំផុសឱ្យមានការចូលរួមលេងកីឡាទាំងអស់គ្នា «ប្រជាពលរដ្ឋម្នាក់កីឡាមួយប្រភេទ» ដើម្បីសុខភាពល្អ សាមគ្គីភាព ចៀសឆ្ងាយពីអំពើអបាយផ្សេងៗមានគ្រឿងញៀន និងឧក្រិដ្ឋកម្ម និងបន្តរួមគ្នាប្រើ App NoDrug ដើម្បីចំណេះដឹង និងរាយការណ៍យកគ្រឿងញៀនចេញពីសហគមន៍។
ការលើកឡើងបែបនេះរបស់លោក ឧត្តមសេនីយ៍ឯក លឹម តុងហួត បានធ្វើឡើងនៅថ្ងៃទី៦ ខែកក្កដា ឆ្នាំ២០២៥ ក្នុងឱកាសដែលលោករួមជាមួយនឹងលោក សុខ វឿន ប្រធាននាយកប្រតិបត្តិ នៃគ្រឹះស្ថានមីក្រូហិរញ្ញវត្ថុ អិលអូអិលស៊ី LOLC បើកព្រឹត្តិការណ៍ប្រកួតបាល់ទាត់ អិលអូអិលស៊ី សម្រាប់ឆ្នាំ២០២៥ ក្របខណ្ឌ អិលអូអិលស៊ី ទូទាំងប្រទេស នៅមជ្ឈមណ្ឌលកីឡា AUPP (ឫស្សីកែវ)។
លោក សុខ វឿន បានមានប្រសាសន៍ទៅកាន់ក្រុមប្រកួតដែលមកពីភូមិភាគរាជធានីភ្នំពេញ និងភូមិភាគសៀមរាបថា ការប្រកួតនេះគឺធ្វើឡើងក្នុងគោលបំណងឱ្យបុគ្គលិក អិលអូអិលស៊ី ទាំងអស់មានសុខភាពល្អ ស្មារតីគាំទ្រស្រលាញ់កីឡា ភាពជិតស្និត និងស្មារតីសាមគ្គីជាក្រុម រួមគ្នាធ្វើការដើម្បីរីកចម្រើនទៅមុខទាំងអស់គ្នា។
ទាញយក៖ https://nodrugsnacd.com/download_kh៕
