(តាកែវ)៖ នៅព្រឹកថ្ងៃអង្គារ ៦កើត ខែអាសាឍ ឆ្នាំម្សាញ់ សប្តស័ក ព.ស.១៥៦៩ ត្រូវនឹងថ្ងៃទី០១ ខែកក្កដា ឆ្នាំ២០២៥នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា អញ្ជើញជាអធិបតីប្រារព្ធទិវាមច្ឆជាតិ និងលែងកូនត្រីប្រមាណ ១.៥លានក្បាល ចូលបឹងទន្លេបាទី ស្ថិតក្នុងភូមិថ្នល់ទក្សិណ ឃុំក្រាំងធ្នង់ ស្រុកបាទី ខេត្តតាកែវ។
ខាងក្រោមជាប្រសាសន៍សំខាន់ៗរបស់សម្តេចមហាបវរធិបតី ហ៊ុន ម៉ាណែត អញ្ជើញប្រារព្ធទិវាមច្ឆជាតិ៖
* សម្តេចមហាបវរធិបតី ហ៊ុន ម៉ាណែត បានបង្ហាញអារម្មណ៍រីករាយ បានអញ្ជើញចូលរួមទិវាមច្ឆជាតិនាព្រឹកថ្ងៃនេះ នៅបឹងទន្លេបាទី។
* សម្តេចមហាបវរធិបតី ហ៊ុន ម៉ាណែត បានថ្លែងថា រាជរដ្ឋាភិបាលកំណត់យកថ្ងៃទី ១ ខែ កក្កដា ប្រារព្ធទិវាមច្ឆជាតិជារៀងរាល់ឆ្នាំ ក្នុងគោលបំណងផ្សព្វផ្សាយ និង បំផុសស្មារតីឱ្យគ្រប់តួអង្គពាក់ព័ន្ធ, ជាពិសេសប្រជាពលរដ្ឋ និង ប្រជានេសាទមូលដ្ឋាន ចូលរួមការពារ និងអភិរក្សធនធានជលផលធម្មជាតិឱ្យស្ថិតស្ថេរគង់វង្សសម្រាប់កូនចៅជំនាន់ក្រោយ។
* សម្តេចមហាបវរធិបតី ហ៊ុន ម៉ាណែត អបអរសាទរប្រហុកសៀមរាប ដែលត្រូវបានចុះបញ្ជីជាម៉ាកសម្គាល់ភូមិសាស្រ្តទំនិញ (GI) កាលពីខែឧសភាកន្លងទៅ ក្រោមការដឹកនាំរបស់ក្រសួងពាណិជ្ជកម្ម ដោយមានការចូលរួមសហការពីក្រសួងកសិកម្ម រុក្ខាប្រមាញ់ និង នេសាទ, ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និង នវានុវត្តន៍ ព្រមទាំងដៃគូអភិវឌ្ឍន៍ និង វិស័យឯកជន។
* សម្តេចមហាបវរធិបតី ហ៊ុន ម៉ាណែត បានថ្លែងកោតសរសើរ និងវាយតម្លៃខ្ពស់ ចំពោះការចូលរួមរបស់ក្រសួង-ស្ថាប័ន កងយោធពលខេមរភូមិន្ទ រដ្ឋបាលថ្នាក់ក្រោមជាតិ និងអាជ្ញាធរមានសមត្ថកិច្ច ដែលបានចូលរួមសហការគ្នាយ៉ាងជិតស្និទ្ធក្នុងស្មារតី «ជវភាពនៃប្រព័ន្ធតួអង្គតែមួយ» ដើម្បីសម្រេចគោលដៅរួម ក្នុងការទប់ស្កាត់ និងបង្ក្រាបការទន្ទ្រានដីព្រៃលិចទឹក និងបទល្មើសនេសាទដែលមានលក្ខណៈបំផ្លិចបំផ្លាញធ្ងន់ធ្ងរ សំដៅពង្រឹងការគ្រប់គ្រង និងការអភិរក្សធនធានជលផលធម្មជាតិប្រកបដោយនិរន្តរភាព និងប្រសិទ្ធភាព។
* សម្តេចមហាបវរធិបតី ហ៊ុន ម៉ាណែត លើកទឹកចិត្តឱ្យរួមគ្នាទប់ស្កាត់បទល្មើសនេសាទបន្តទៅទៀត ធ្វើសកម្មភាពដូចភ្លៀងរលឹម។
* សម្តេចមហាបវរធិបតី ហ៊ុន ម៉ាណែត បានថ្លែងថា ជារឿងល្អដែលកម្ពុជាសម្បូរត្រីលក់មិនអស់ ហើយមានតម្លៃសមរម្យ។
* សម្តេចមហាបវរធិបតី ហ៊ុន ម៉ាណែត ចូលរួមអបអរសាទរក្រសួងកសិកម្ម រុក្ខាប្រមាញ់ និងនេសាទ ដែលសេចក្តីព្រាងច្បាប់ស្តីពីជលផល ទទួលបានការសម្រេចយល់ព្រមពីកិច្ចប្រជុំពេញអង្គគណៈរដ្ឋមន្ត្រី ហើយត្រូវបានអនុម័តដោយរដ្ឋសភា និង ព្រឹទ្ធសភា។ បន្ទាប់ពីព្រះករុណា ព្រះមហាក្សត្រ ឡាយព្រះហស្ថលេខាប្រកាសឱ្យប្រើនាពេលខាងមុខ, ច្បាប់ស្តីពីជលផលនឹងក្លាយជាឧបករណ៍គតិយុត្តថ្មី ស្របនឹងបច្ចុប្បន្នភាពនៃស្ថានភាពសេដ្ឋកិច្ច សង្គម និងនយោបាយនៅកម្ពុជា ក្នុងការពង្រឹងការគ្រប់គ្រង អភិរក្ស និង អភិវឌ្ឍធនធានជលផល ឱ្យកាន់តែមានប្រសិទ្ធភាពខ្ពស់ថែមទៀត។
* សម្តេចមហាបវរធិបតី ហ៊ុន ម៉ាណែត បានថ្លែងថា សមិទ្ធផលដ៏ប្រសើរថ្លៃថ្លាទាំងអស់នេះពិតជាមិនអាចកាត់ផ្តាច់ចេញ បានពីមូលដ្ឋានគ្រឹះដ៏រឹងមាំនៃកត្តាសុខសន្តិភាព និងស្ថិរភាពនយោបាយពេញលេញនៅទូទាំងប្រទេស ដែលប្រសូត្រចេញពីនយោបាយឈ្នះ-ឈ្នះ និង ការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន។ ក្នុងនោះកិច្ចការធ្វើការកែទម្រង់ស៊ីជម្រៅក្នុងវិស័យកសិកម្ម ត្រូវបានដាក់ចេញជាបន្តបន្ទាប់តាមរយៈ គោលនយោបាយ និង យុទ្ធសាស្រ្តជំរុញផលិតកម្ម និងបង្កើនទិន្នផលចាប់តាំងពីឆ្នាំ១៩៨៧ ដើម្បីផ្ទេរពីការអភិវឌ្ឍបែបបើកទូលាយ មកជាការអភិវឌ្ឍបែបស៊ីជម្រៅតាមរយៈការដោះស្រាយទឹក, ការបង្កើនការដាំដុះ, ការធ្វើប្រពល-វប្បកម្មលើផ្ទៃដី ដែលមាន ព្រមទាំងការស្រាវជ្រាវ, ការប្រើប្រាស់បច្ចេកវិទ្យា និងពូជថ្មីៗការធ្វើទំនើបកម្មគ្រឿងយន្តកសិកម្ម ការដាក់ចេញគោលនយោបាយអនុគ្រោះពន្ធដល់វិស័យកសិកម្ម និងការបង្កើនផ្ទៃដីផលិតកម្ម។
* សម្តេចមហាបវរធិបតី ហ៊ុន ម៉ាណែត បានថ្លែងថា ដើម្បីថែរក្សាសមិទ្ធផលប្រវត្តិសាស្ត្រ ដែលសម្រេចបានក្រោមការដឹកនាំ និងប្រកបដោយគតិបណ្ឌិត សម្តេចតេជោ ហ៊ុន សែន, ជាពិសេសសុខសន្តិភាព ស្ថិរភាពម៉ាក្រូសេដ្ឋកិច្ច និងការអភិវឌ្ឍលើគ្រប់វិស័យក៏ដូចជា ដើម្បីបង្កើនល្បឿនការអភិវឌ្ឍប្រទេសជាតិ និងឈានទៅសម្រេចបានចក្ខុវិស័យកម្ពុជាឆ្នាំ២០៥០។
* សម្តេចមហាបវរធិបតី ហ៊ុន ម៉ាណែត បានថ្លែងថា រាជរដ្ឋាភិបាលនីតិកាលទី៧ នៃរដ្ឋសភាបានដាក់ចេញ និងជំរុញអនុវត្ត ក្នុងស្មារតីបុរេសកម្ម និងការទទួលខុសត្រូវនូវយុទ្ធសាស្រ្តបញ្ចកោណដំណាក់កាលទី១ សំដៅលើកកម្ពស់ «កំណើនការងារ សមធម៌ ប្រសិទ្ធភាព និង ចីរភាព»។
* សម្តេចមហាបវរធិបតី ហ៊ុន ម៉ាណែត បានថ្លែងថា ទោះបីពិភពលោកស្ថិតក្នុងកំដៅនៃការប្រកួតប្រជែងភូមិសាស្រ្តនយោបាយ និងសេដ្ឋកិច្ចស្មុគ្រស្មាញ, ការពិបាកព្យាករទុកជាមុននៃសេដ្ឋកិច្ចពិភពលោក, ជម្លោះពាណិជ្ជកម្ម និងសង្គ្រាមក្នុងតំបន់មួយចំនួនដែលបាននិងកំពុងមានកម្មវិបាកអវិជ្ជមាន ដល់ការអភិវឌ្ឍសង្គម-សេដ្ឋកិច្ចក្តី, រាជរដ្ឋាភិបាលនៅតែជម្នះបានគ្រប់ឧបសគ្គ និងសម្រេចបានកំណើនសេដ្ឋកិច្ចល្អប្រសើរជាបន្តបន្ទាប់។
* សម្តេចមហាបវរធិបតី ហ៊ុន ម៉ាណែត បានថ្លែងថា ក្នុងវិស័យកសិកម្ម, រាជរដ្ឋាភិបាលនៅតែបន្តផ្តល់អាទិភាព ដើម្បីធានាសន្តិសុខស្បៀង លើកកម្ពស់ជីវភាពប្រជាពលរដ្ឋ និង ទ្រទ្រង់កំណើនសេដ្ឋកិច្ច ដោយរក្សាតុល្យភាពរវាងការអភិរក្ស និងការអភិវឌ្ឍ។
* សម្តេចមហាបវរធិបតី ហ៊ុន ម៉ាណែត បានថ្លែងថា តាមរយៈការអនុវត្តនូវគោលនយោបាយដែលបានដាក់ចេញ ក្នុងស្មារតីបុរេសកម្ម និង ប្រកបដោយប្រសិទ្ធភាព, វិស័យកសិកម្មកម្ពុជាបន្តរក្សាបាននូវភាពរឹងមាំ មានភាពធន់ និងរួមចំណែកយ៉ាងសំខាន់ក្នុងការបន្ធូរបន្ថយផលប៉ះពាល់ ជាអវិជ្ជមានមកលើសេដ្ឋកិច្ចជាតិ, ជាពិសេសបញ្ចៀសបាននូវវិបត្តិស្បៀងអាហារ និងកង្វះអាហារូបត្ថម្ភ ព្រមទាំងចូលរួមកាត់បន្ថយ អតិផរណាតម្លៃស្បៀងក្នុងប្រទេស, ទោះបីកម្ពុជាជួបបញ្ហាគ្រោះធម្មជាតិ ជាច្រើនលើក ហើយខណៈដែលពិភពលោកជួបប្រទះវិបត្តិសកលជាបន្តបន្ទាប់ក្តី។
* សម្តេចមហាបវរធិបតី ហ៊ុន ម៉ាណែត បានថ្លែងថា ក្រោយរដ្ឋប្រហារ១៨ មីនា ១៩៧០ ធ្វើឱ្យកម្ពុជាក្លាយពីប្រទេសមានសន្តិសុខស្បៀង ក្លាយទៅជាប្រទេសអត់ស្បៀង។
* សម្តេចមហាបវរធិបតី ហ៊ុន ម៉ាណែត បានថ្លែងថា ការបិទព្រំដែនជាមួយថៃ មិនធ្វើឱ្យប៉ះពាល់សន្តិសុខស្បៀងនោះឡើយ ហើយក៏ធានាបានការដោះស្រាយទីផ្សារសម្រាប់ទំនិញរបស់កម្ពុជាផងដែរ។
* សម្តេចមហាបវរធិបតី ហ៊ុន ម៉ាណែត បានថ្លែងថា បើគ្មានសន្តិភាពអ្នកប្រឆាំងក៏គ្មានឱកាសលេងហ្វេសប៊ុកវាយប្រហាររាជរដ្ឋាភិបាលនោះឡើយ។
* សម្តេចមហាបវរធិបតី ហ៊ុន ម៉ាណែត បានថ្លែងថា ម្ចាស់ការលើសន្តិសុខស្បៀងក្នុងពេលកម្ពុជាជួបការលំបាកដូចជាការរាតត្បាតជំងឺកូវីដ១៩ និងពេលបិទព្រំដែនជាមួយថៃ បង្ហាញពីភាពត្រឹមត្រូវនៃគោលនយោបាយកសិកម្មរបស់កម្ពុជា។
* សម្តេចមហាបវរធិបតី ហ៊ុន ម៉ាណែត បានថ្លែងថា គោលនយោបាយដ៏ត្រឹមត្រូវរបស់រាជរដ្ឋាភិបាល ធ្វើឱ្យកម្ពុជាយកឈ្នះលើការគំរាមទាំងឡាយរបស់ថៃ។
* សម្តេចមហាបវរធិបតី ហ៊ុន ម៉ាណែត បានថ្លែងថា សម្តេចបានណែនាំឱ្យរៀបចំគោលនយោបាយវិនិយោគ លើវិស័យកសិឧស្សាហកម្មនៅភាគខាងលិចប្រទេស។
* សម្តេចមហាបវរធិបតី ហ៊ុន ម៉ាណែត អស់សំណើចនឹងសម្តីអ្នកនយោបាយថៃ ដែលលើកឡើងថា បញ្ហាផ្ទៃក្នុងប្រទេសរបស់ថៃ កើតដោយសារកម្ពុជាកកូរកកាយ។
* សម្តេចមហាបវរធិបតី ហ៊ុន ម៉ាណែត បានថ្លែងថា ការអនុវត្តន៍វិធានការបិទព្រំដែន មិនមែនចាប់ផ្តើមដោយកម្ពុជានោះឡើយ។ ថៃបិទដោយឯកតោភាគី ដូច្នេះបើកដោយខ្លួនឯងទៅ។
* សម្តេចមហាបវរធិបតី ហ៊ុន ម៉ាណែត បានថ្លែងថា កម្ពុជាអត់លេងបិទពួនជាមួយថៃនោះទេ។ កម្ពុជា សំឡេងតែមួយពីលើ ដល់ក្រោម។
* សម្តេចមហាបវរធិបតី ហ៊ុន ម៉ាណែត បានថ្លែងថា រឿងបិទបើកព្រំដែន កម្ពុជា មិនដឹងនិយាយជាមួយតួអង្គណានោះទេ ព្រោះនៅថៃមានច្រើនតួអង្គពេក។
* សម្តេចមហាបវរធិបតី ហ៊ុន ម៉ាណែត បានថ្លែងថា មិនមានរថយន្តថៃជាប់នៅលើដីកម្ពុជានោះទេ។ រឿងបិទបើកច្រកព្រំដែន កូនសោនៅលើដៃរបស់ថៃ មិនស្ថិតលើកម្ពុជានោះឡើយ។
* សម្តេចមហាបវរធិបតី ហ៊ុន ម៉ាណែត ថ្លែងអំណរគុណដល់ប្រជាពលរដ្ឋនៅតាមព្រំដែន ដែលបានយោគយល់ចំពោះការលំបាក របស់រាជរដ្ឋាភិបាលចំពោះមុខភាពមិនច្បាស់លាស់របស់ថៃ។
* សម្តេចមហាបវរធិបតី ហ៊ុន ម៉ាណែត បានថ្លែងថា កម្ពុជា រង់ចាំអ្នកមានអំណាចពិតប្រាកដនៅក្នុងប្រទេសថៃ ដើម្បីជជែកលើបញ្ហាព្រំដែនជាមួយគ្នា។
* សម្តេចមហាបវរធិបតី ហ៊ុន ម៉ាណែត បានថ្លែងថា កម្ពុជាមិនបានលូកដៃចូលកិច្ចការផ្ទៃក្នុងរបស់ប្រទេសណាមួយនោះឡើយ។
* សម្តេចមហាបវរធិបតី ហ៊ុន ម៉ាណែត បានថ្លែងថា នៅប្រាសាទតាមាន់ជាតំបន់មិនទាន់ដាច់ស្រេច ថៃមិនអាចបិទមិនឱ្យពលរដ្ឋខ្មែរ ចូលទៅលេងបាននោះឡើយ។ បិទ គឺឆ្លងបន្ទាត់ក្រហម នឹងមានរឿង។
* សម្តេចមហាបវរធិបតី ហ៊ុន ម៉ាណែត បានថ្លែងថា កម្ពុជាត្រូវការតែភាពត្រឹមត្រូវ។ កុំចុះហត្ថលេខានឹងដៃលុបនឹងជើង។
* សម្តេចមហាបវរធិបតី ហ៊ុន ម៉ាណែត បានថ្លែងថា ទំនាក់ទំនងរវាងប្រទេស និងប្រទេស គឺត្រូវការមនុស្សធ្វើការច្បាស់លាស់។
* សម្តេចមហាបវរធិបតី ហ៊ុន ម៉ាណែត បានថ្លែងថា នៅពេលជាតិមានបញ្ហាធ្វើឱ្យប្រជាពលរដ្ឋមើលឃើញច្បាស់ពីគោលនយោបាយ ដឹកនាំប្រទេសជាច្រើនអាណត្តិមកនេះ គឺដើម្បីតែផលប្រយោជន៍សម្រាប់ និងប្រជាជន។
* សម្តេចមហាបវរធិបតី ហ៊ុន ម៉ាណែត ថ្លែងអំណរគុណដល់អាជ្ញាធរពាក់ព័ន្ធទាំងអស់ ដែលបានយកចិត្តទុកដាក់លើពលករត្រឡប់ពីប្រទេសថៃ និងរកការងារជូនពួកគេ។
* សម្តេចមហាបវរធិបតី ហ៊ុន ម៉ាណែត ថ្លែងអំណរគុណដល់កងទ័ពទាំងអស់ ដែលបានលះបង់ដើម្បីបុព្វហេតុជាតិ និងប្រជាជន។
* សម្តេចមហាបវរធិបតី ហ៊ុន ម៉ាណែត ថ្លែងអំណរគុណដល់ប្រជាពលរដ្ឋខ្មែរគ្រប់រូប ដែលបានគាំទ្រផ្នែកស្មារតីយ៉ាងផុលផុស ដើម្បីការពារផលប្រយោជន៍ជាតិ។
* សម្តេចមហាបវរធិបតី ហ៊ុន ម៉ាណែត បានថ្លែងកោតសរសើរគណៈកម្មការព្រំដែនចម្រុះ ក្រុមការងារប្តឹងទៅ ICJ ក៏ដូចជាក្រុមអ្នកនាំពាក្យ ក្នុងការបំពេញតួនាទីភារកិច្ចរៀងៗខ្លួន ដើម្បីការពារសេចក្តីថ្លៃថ្នូររបស់កម្ពុជា។
* សម្តេចមហាបវរធិបតី ហ៊ុន ម៉ាណែត បានថ្លែងអំណរគុណដល់ប្រជាពលរដ្ឋទាំងអស់ ដែលបានគាំទ្រផលិតផលរបស់ខ្មែរ។
* សម្តេចធិបតី ហ៊ុន ម៉ាណែត អំពាវនាវដល់ប្រជាពលរដ្ឋទាំងអស់គាំទ្រផលិតផលរបស់ខ្មែរ សូមឲ្យស្មារតីជាតិនិយមមួយនេះស្ថិតស្ថេរជារឿងរហូត
* សម្តេចមហាបវរធិបតី ហ៊ុន ម៉ាណែត អំពាវនាវដល់អ្នកផលិតទាំងអស់ ត្រូវប្រកាន់ខ្ជាប់នូវគុណភាពផលិតផល។ មិនអាចបង្ខំឱ្យប្រជាពលរដ្ឋទិញផលិតផលគ្មានគុណភាពនោះទេ។
* សម្តេចមហាបវរធិបតី ហ៊ុន ម៉ាណែត បានថ្លែងថា មានប្រជាពលរដ្ឋនៅជាមួយ គឺធ្វើឱ្យការដឹកនាំកាន់តែរឹងមាំ។ នេះជាកត្តាសត្យានុម័ត។
* សម្តេចមហាបវរធិបតី ហ៊ុន ម៉ាណែត ណែនាំក្រសួងកសិកម្ម រុក្ខាប្រមាញ់ និង នេសាទ ត្រូវបន្តពង្រឹងការគ្រប់គ្រង និងការអភិរក្សធនធានជលផលធម្មជាតិ ឱ្យកាន់តែមានប្រសិទ្ធភាពខ្ពស់, ជាពិសេសសត្វផ្សោតទន្លេមេគង្គ និង ការអភិរក្សត្រីមេពូជ និងវារីសត្វកំពុងរងគ្រោះ។
* ក្រសួង-ស្ថាប័នពាក់ព័ន្ធ, រដ្ឋបាលជលផល រដ្ឋបាលថ្នាក់ក្រោមជាតិ និង អាជ្ញាធរមានសមត្ថកិច្ច ត្រូវបន្តអប់រំផ្សព្វផ្សាយ និងណែនាំប្រជាពលរដ្ឋ ឱ្យបង្កើនការចូលរួមការពារតំបន់គ្រប់គ្រងជលផល, កន្លែងអភិរក្សជលផល, ដីព្រៃលិចទឹក និង ដីព្រៃកោងកាងពីការទន្ទ្រានកាន់កាប់ ដោយចាត់វិធានការច្បាប់ម៉ឺងម៉ាត់ ព្រមទាំងជំរុញការដាំព្រៃលិចទឹក និង ព្រៃកោងកាងឡើងវិញ ដើម្បីផ្តល់ជម្រក សម្រាប់វារីសត្វគ្រប់ភេទ និង ថែរក្សាចីរភាពធនធានជលផល។ សម្រាប់ប្រជាពលរដ្ឋ ដែលគ្មានដីពិតប្រាកដ, រាជរដ្ឋាភិបាល បានដាក់ចេញនូវគោលនយោបាយ «ផ្តល់ដី ការពារព្រៃ» ដើម្បីជួយបងប្អូនឱ្យទទួលបានដីស្របច្បាប់ និង ពឹងផ្អែកលើមុខរបរកសិកម្ម សម្រាប់គាំទ្រជីវភាព។
* សម្តេចមហាបវរធិបតី ហ៊ុន ម៉ាណែត បានថ្លែងថា កម្មវិធីចាប់ដីការពារព្រៃ គឺផ្តល់ដីឱ្យអ្នកដែលអត់ពិតប្រាកដ។
* សម្តេចមហាបវរធិបតី ហ៊ុន ម៉ាណែត ណែនាំក្រសួងកសិកម្ម រុក្ខាប្រមាញ់ និង នេសាទ និងក្រសួងរៀបចំដែនដី នគរូបនីយកម្ម និងសំណង់ ត្រូវបន្តកិច្ចសហការពន្លឿនការចុះបញ្ជីដីរដ្ឋនៃតំបន់គ្រប់គ្រងជលផល កន្លែងអភិរក្សជលផល ដីព្រៃលិចទឹក និង ដីព្រៃកោងកាង, ជាពិសេស នៅតំបន់ជុំវិញបឹងទន្លេសាប និង តំបន់សមុទ្រ ដែលជាកន្លែងជម្រកត្រី និងវារីជាតិពងកូន និងធំធាត់។
* សម្តេចមហាបវរធិបតី ហ៊ុន ម៉ាណែត ណែនាំក្រសួងកសិកម្ម រុក្ខាប្រមាញ់ និង នេសាទ, កងយោធពលខេមរភូមិន្ទ, គណៈបញ្ជាការឯកភាពរាជធានី-ខេត្ត និង អាជ្ញាធរមានសមត្ថកិច្ចគ្រប់លំដាប់ថ្នាក់ ត្រូវរួមសហការគ្នាបន្តទប់ស្កាត់ និង បង្ក្រាបបទល្មើសនេសាទ ឱ្យកាន់តែមានប្រសិទ្ឋភាពខ្ពស់ ព្រមទាំងចាត់វិធានការច្បាប់ម៉ឺងម៉ាត់ចំពោះការផលិត, ការចែកចាយ និង ការប្រើប្រាស់ឧបករណ៍នេសាទ ដែលមានលក្ខណៈបំផ្លិចបំផ្លាញធ្ងន់ធ្ងរដូចជា ឧបករណ៍ឆក់ និងស្បៃមុងជាដើម។
* សម្តេចមហាបវរធិបតី ហ៊ុន ម៉ាណែត ណែនាំក្រសួងកសិកម្ម រុក្ខាប្រមាញ់ និង នេសាទ ត្រូវបន្តជំរុញវារីវប្បកម្មតាមគ្រប់រូបភាព ទាំងទឹកសាប និង សមុទ្រថែមទៀត ដោយលើកកម្ពស់ការស្រាវជ្រាវបច្ចេកទេស និង នវានុវត្តន៍វារីវប្បកម្ម ព្រមទាំងបង្កាត់-ភ្ញាស់ពូជវារីជាតិកម្រប្រឈមនឹងការផុតពូជ និង ផលិតកូនត្រីពូជដែលមានប្រសិទ្ធភាពសេដ្ឋកិច្ចខ្ពស់ ដើម្បីធានាចីរភាពធនធានជលផល និង សន្តិសុខស្បៀង បង្កើនប្រាក់ចំណូលរបស់វារីវប្បករ ព្រមទាំងកាត់បន្ថយការនាំចូល និងសម្ពាធមកលើធនធានជលផលធម្មជាតិ។ ទន្ទឹមនេះ ក្រសួងកសិកម្ម រុក្ខាប្រមាញ់ និងនេសាទ ត្រូវពង្រឹងសមត្ថភាពសមាគមវារីវប្បករកម្ពុជាលើការសម្របសម្រួល និង តម្រង់ទិសផែនការផលិតកម្ម ឱ្យឆ្លើយតបទៅនឹងតម្រូវការក្នុងស្រុក និង ការកែច្នៃនាំចេញ ដោយពង្រឹងកិច្ចសហការជាមួយ ដៃគូអភិវឌ្ឍន៍ និង វិស័យឯកជន ដើម្បីផ្តល់ការគាំទ្រចាំបាច់ ទាំងផ្នែកបច្ចេកទេស គុណភាព និង កម្ចីការប្រាក់ទាប ដល់វារីវប្បករ និងអ្នកកែច្នៃនាំចេញផលិតផលជលផល។
* សម្តេចមហាបវរធិបតី ហ៊ុន ម៉ាណែត ណែនាំក្រសួងកសិកម្ម រុក្ខាប្រមាញ់ និង នេសាទ ដោយសហការជាមួយ ក្រសួងបរិស្ថាន ត្រូវបង្កើនការយកចិត្តទុកដាក់ឱ្យកាន់តែខ្លាំងក្លាថែមទៀត ក្នុងការកាត់បន្ថយផលប៉ះពាល់បង្កឡើងដោយការប្រែប្រួលអាកាសធាតុ ដើម្បីធានាចីរភាព និង និរន្តរភាពនៃការអភិវឌ្ឍវិស័យកសិកម្ម។
* សម្តេចមហាបវរធិបតី ហ៊ុន ម៉ាណែត អំពាវនាវឱ្យគ្រប់ភាគីពាក់ព័ន្ធ និង ប្រជាពលរដ្ឋ សូមកុំប្រើឧបករណ៍នេសាទខុសច្បាប់ សម្រាប់ធ្វើនេសាទដូចជា៖ ថ្មស្អុយ, ឧបករណ៍ឆកត្រី, ស្បៃមុង, គ្រឿងផ្ទុះ ដែលឧបករណ៍នេសាទហាមឃាត់, ជាពិសេសសូមកុំចាប់ត្រីក្នុងរដូវហាមឃាត់ គឺរដូវត្រីពង (ពីថ្ងៃទី ១ ខែ មិថុនា ដល់ថ្ងៃទី៣១ ខែតុលា)។ មេត្តារួមគ្នា ដើម្បីទុកត្រីឱ្យធំ ឱ្យវាពងញាស់ឡើង កុំចាប់វា កុំបំផ្លាញវា ព្រោះត្រី គឺជាប្រភពអាហារដ៏ចម្បងមួយ ក្នុងជីវភាពប្រចាំថ្ងៃរបស់ប្រជាជន។ ដូច្នេះយើងទាំងអស់គ្នាត្រូវចូលរួមថែរក្សាការពារធនធានជលផល ឱ្យបានស្ថិតស្ថេរគង់វង្ស សម្រាប់កូនចៅជំនាន់ក្រោយៗទៀត។
* សម្តេចមហាបវរធិបតី ហ៊ុន ម៉ាណែត អំពាវនាវដល់ប្រជាពលរដ្ឋ ដែលរស់នៅជុំវិញបឹងទន្លេបាទី និងអាជ្ញាធរមានសមត្ថកិច្ចពាក់ព័ន្ឋ សូមចូលរួមគ្រប់គ្រង និង អភិរក្សមច្ឆជាតិ ដែលលែងនៅក្នុងថ្ងែនេះ ឱ្យបានធំធាត់ សម្រាប់បំពេញសេចក្តីត្រូវការម្ហូបអាហាររបស់បងប្អូនផង និង ភ្ញៀវទេសចរមកលេងកម្សាន្តនៅរមណីយដ្ឋានទន្លេបាទីនេះផង។
* សម្តេចធិបតី ហ៊ុន ម៉ាណែត បានបញ្ចប់ការថ្លែងសុន្ទរកថានៅវេលាម៉ោង ១០៖៤៥នាទីនាថ្ងៃទី០១ ខែកក្កដា ឆ្នាំ២០២៥, សូមអរគុណចំពោះការទស្សនាផ្សាយផ្ទាល់ តាមរយៈបណ្តាញទូរទស្សន៍ព័ត៌មាន Fresh News៕
