(ជប៉ុន)៖ លោកស្រី កុយ សុដានី រដ្ឋលេខាធិការប្រចាំការក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួង ចូលរួមវគ្គបណ្តុះបណ្តាល និងទស្សនកិច្ចសិក្សានៅប្រទេសជប៉ុន ក្រោមគម្រោងពង្រឹងសមត្ថភាពការសម្របសម្រួលសម្រាប់ការកែលម្អប្រព័ន្ធភស្តុភារកម្មនៅកម្ពុជា (CLIP3) តាមការរៀបចំ និងសម្របសម្រួលរបស់ទីភ្នាក់ងារសហប្រតិបត្តិការអន្តរជាតិជប៉ុន (JICA)។
បេសកកម្មនេះបានចាប់ផ្តើមចាប់ពីថ្ងៃ២៦ ខែឧសភា ដល់ថ្ងៃទី០២ ខែមិថុនា ឆ្នាំ២០២៥ ក្នុងគោលបំណងដើម្បីសិក្សាស្វែងយល់ និងដកស្រង់បទពិសោធន៍-ឧត្តមានុវត្តពាក់ព័ន្ធនឹងការអភិវឌ្ឍ និងគ្រប់គ្រងវិស័យផ្លូវដែក និងវិស័យឡូជីស្ទីកនៅប្រទេសជប៉ុន ដែលក្នុងនោះមានដូចជា៖ការរៀបចំគោលនយោបាយគ្រប់ជ្រុងជ្រោយ ស្តីពីការអភិវឌ្ឍ និងគ្រប់គ្រងផ្លូវដែក និងឡូជីស្ទីក ការអភិវឌ្ឍច្រករបៀងសេដ្ឋកិច្ច និងដឹកជញ្ជូន ការគិតគូរពីប្រសិទ្ធភាពនៃចំណាយវិនិយោគ និងប្រតិបត្តិការ និងប្រព័ន្ធគ្រប់គ្រងគុណភាព និងត្រួតពិនិត្យសូចនាករវាស់វែងគន្លឹះ (KPI) ជាដើម។
ក្នុងឱកាសនៃនេះដែរ គណៈប្រតិភូក្រសួងបានជួបសម្តែងការគួរសម និងពិភាក្សាការងារជាមួយលោក FURUKAWA Yasushi អនុរដ្ឋមន្ត្រីក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ នៃប្រទេសជប៉ុន (MLIT) និងបានទៅទស្សនកិច្ចនៅទីតាំងសំខាន់ៗមួយចំនួន ដើម្បីសិក្សាស្វែងយល់ពីការអភិវឌ្ឍ និងគ្រប់គ្រង់ប្រតិបត្តិការសេវាផ្លូវដែក ប្រព័ន្ធដឹកជញ្ជូន និងឡូជីស្ទីក ដែលក្នុងនោះរួមមាន៖
១៖ ស្ថានីយដឹកទំនិញទីក្រុងតូក្យូ ២៖ ស្ថានីយឡូជីស្ទីកឯកជន Haneda Chronogate ៣៖ ស្ថានីយចំណតរថយន្តដឹកទំនិញរបស់ក្រុមហ៊ុន JMT( Japan Motor Terminal Co.Ltd) ៤៖ មជ្ឈមណ្ឌលឡូជីស្ទីក Ashigara ៥៖ មជ្ឈមណ្ឌលហ្វឹកហាត់អ្នកបើកបរ និងការដឹកជញ្ជូនទំនិញគ្រោះថ្នាក់ ៦៖ ទីផ្សារផ្គត់ផ្គង់ទំនិញត្រជាក់ Toyosu ៧៖ ក្រុមប្រឹក្សាសុវត្ថិភាពការដឹកជញ្ជូនជប៉ុន ដើម្បីស្វែងយល់អំពីការគ្រប់គ្រងត្រួតពិនិត្យមើលគ្រោះថ្នាក់ចរាចរណ៍តាមផ្លូវដែក និង ៨៖ មជ្ឈមណ្ឌលបណ្តុះបណ្តាលនៃក្រុមហ៊ុនផ្លូវដែកជប៉ុនភាគខាងលិច នៅទីក្រុងកូបេ ប្រទេសជប៉ុន៕
