(ភ្នំពេញ)៖ ប្រតិភូនៃរាជរដ្ឋាភិបាលកម្ពុជា ដឹកនាំដោយលោកបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និងជាតំណាងដ៏ខ្ពង់ខ្ពស់ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញធ្វើមាតុភូមិនិវត្តន៍ ប្រកបដោយសុវត្តិភាព នាយប់ថ្ងៃទី០២ ខែមិថុនា ឆ្នាំ២០២៥ បន្ទាប់ពីបានអញ្ជើញចូលរួម សន្និសីទអន្តរជាតិកម្រិតខ្ពស់ស្តីពី «ការអភិរក្សផ្ទាំងទឹកកក» (Glacier Preservation) នៅប្រទេសឌូស្ហាន់បេ ប្រទេសតាហ៊្សីគីស្ថាន ចាប់ពីថ្ងៃទី២៩ ដល់ថ្ងៃទី៣១ ខែឧសភា ឆ្នាំ២០២៥។

នៅឯព្រលានយន្តហោះ លោកបណ្ឌិត អ៊ាង សុផល្លែត បានឱ្យដឹងថា នៅថ្ងៃទី៣០ ខែឧសភា ឆ្នាំ២០២៥ លោកអញ្ជើញចូលរួមធ្វើសេចក្ដីថ្លែងការណ៍ តំណាងរាជរដ្ឋាភិបាលកម្ពុជា ក្នុងកិច្ចប្រជុំពេញអង្គសន្និសីទអន្តរជាតិកម្រិតខ្ពស់ស្តីពី «ការអភិរក្សផ្ទាំងទឹកកក» ដោយបានគូសបញ្ជាក់ដូចខាងក្រោម៖

*កម្ពុជាបានបញ្ជាក់អំពីការប្តេជ្ញាចិត្តក្នុងការអនុវត្តកិច្ចព្រមព្រៀងទីក្រុងប៉ារីសស្ដីពីការប្រែប្រួលអាកាសធាតុ ដោយបានកំណត់ក្នុងផែនការជាតិរួមចំណែកឆ្លើយតបនឹងការប្រែប្រួលអាកាសធាតុ (NDC) ក្នុងគោលដៅជាប្រទេសអព្យាក្រឹតភាពកាបូននៅឆ្នាំ២០៥០
*ការរួមបញ្ចូលក្នុងយុទ្ធសាស្ត្រចក្រាវិស័យបរិស្ថាននូវសកម្មភាពអាទិភាពក្នុងការកាត់បន្ថយនូវការបំភាយឧស្ម័នក្នុងវិស័យថាមពល ឧស្សាហកម្ម កសិកម្ម ព្រៃឈើ និងសំណល់។
*ប្តេជ្ញាពង្រឹងតួនាទីរបស់ខ្លួនក្នុងការអភិរក្សផ្ទាំងទឹកកក ដោយអំពាវនាវឱ្យប្រទេសអភិវឌ្ឍន៍ និងស្ថាប័នហិរញ្ញវត្ថុគាំទ្រគម្រោងអភិរក្សប្រកបដោយភាពច្នៃប្រឌិត និងការចែករំលែកបច្ចេកវិទ្យាក្នុងការត្រួតពិនិត្យផ្ទាំងទឹកកក និងប្រព័ន្ធព្រមានជាមុន
*កម្ពុជាត្រៀមខ្លួនសហការជាមួយសហគមន៍អន្តរជាតិ ដើម្បីជំរុញសកម្មភាពទប់ស្កាត់ការប្រែប្រួលអាកាសធាតុ លើកស្ទួយកិច្ចគាំពារបរិស្ថាន និងធានាអនាគតប្រកបដោយចីរភាព ដើម្បីការពារផ្ទាំងទឹកកករបស់ពិភពលោក និងតុល្យភាពនៃភពផែនដី។

ជាបន្តបន្ទាប់ នៅក្នុងថ្ងៃទី៣១ ខែឧសភា ឆ្នាំ២០២៥ លោកបានធ្វើសេចក្ដីថ្លែងការណ៍ក្នុងនាមរាជរដ្ឋាភិបាលកម្ពុជា ក្នុងកិច្ចប្រជុំតុមូលថ្នាក់ដឹកនាំ (Leaders’ Round table) សន្និសីទអន្តរជាតិកម្រិតខ្ពស់ស្តីពី «ការអភិរក្សផ្ទាំងទឹកកក» ឆ្នាំនេះ ដោយផ្តោតលើការផ្ដល់ធាតុចូលពាក់ព័ន្ធការឆ្លើយតបនឹងការប្រែប្រួលអាកាសធាតុនៅ មុនកិច្ចប្រជុំលើកទី៣០ រដ្ឋភាគីអនុសញ្ញាអង្គកាសហប្រជាជាតិស្តីពីការប្រែប្រួលអាកាសជាតិ COP30 ដោយបានគូសបញ្ជាក់ដូចខាងក្រោម៖

*កម្ពុជាគាំទ្រយ៉ាងពេញទំហឹងនូវការពិគ្រោះយោបល់ «ផែនទីផ្លូវបាគូទៅប៊ែលឹម (Roadmap Baku to Belem) ដល់ ១,៣ពាន់ពាន់លាន» ក្នុងគោលបំណងពង្រីកហិរញ្ញវត្ថុអាកាសធាតុសម្រាប់ប្រទេសកំពុងអភិវឌ្ឍន៍ ជាពិសេសតាមរយៈជំនួយឥតសំណង ដើម្បីគាំទ្រដល់ការអភិវឌ្ឍន៍ការបំភាយឧស្ម័នទាប និងធន់នឹងអាកាសធាតុ
*កម្ពុជាបានត្រៀមខ្លួនរួចជាស្រេចក្នុងការធ្វើការជាមួយសហគមន៍អន្តរជាតិ ដើម្បីជំរុញសកម្មភាពទប់ស្កាត់ការប្រែប្រួលអាកាសធាតុ លើកកម្ពស់កិច្ចគាំពារបរិស្ថាន និងធានាឱ្យបាននូវភាពជោគជ័យរបស់ COP30 សម្រាប់អនាគតប្រកបដោយចីរភាព។

ដោយឡែកក្នុងអំឡុងពេលស្នាក់នៅ និងបំពេញការងារនៅក្នុងអំឡុងពេលអញ្ជើញចូលរួមក្នុង សន្និសីទអន្តរជាតិកម្រិតខ្ពស់ស្តីពី «ការអភិរក្សផ្ទាំងទឹកកក» ក្នុងប្រទេសតាហ៊្សីគីស្ថាន, លោករដ្ឋមន្រ្តី បានជួបប្រជុំទ្វេភាគីជាមួយលោក FUJII Hisayuki អនុរដ្ឋមន្ត្រីក្រសួងការបរទេសជប៉ុន។ ភាគីទាំង២ បានពិភាក្សាអំពីការពង្រឹងកិច្ចសហប្រតិបត្តិការ រវាងប្រទេសទាំង២ កម្ពុជានិងជប៉ុន ជាពិសេសក្នុងវិស័យបរិស្ថាន ការផ្ទេរបច្ចេកវិទ្យា ក៏ដូចជាការគាំទ្រនៃគម្រោងរបស់រដ្ឋាភិបាលជប៉ុន ក្នុងការគ្រប់គ្រងសំណល់រឹងនិងសំណល់ប្លាស្ទិក ព្រមទាំងការគ្រប់គ្រងការបំពុលបរិស្ថានផងដែរ។

រដ្ឋមន្ត្រីក្រសួងបរិស្ថាន បានបង្ហាញថា លទ្ធផលនៃទស្សនកិច្ចរបស់ក្នុងនាមតំណាងសម្តេចបវរធិបតី ហ៊ុន ម៉ាណែត នៅក្នុងសន្និសីទអន្តរជាតិកម្រិតខ្ពស់ ស្តីពី «ការអភិរក្សផ្ទាំងទឹកកក» ឆ្នាំ២០២៥ គឺបានសម្រេចបានជោគជ័យ ទទួលបានលទ្ធផលផ្លែផ្កា ដែលក្នុនោះក្រៅពីការបង្ហាញមហិច្ឆតារបស់កម្ពុជា ក្នុងការចូលរួមជំរុញឱ្យមានការឆ្លើយតបនឹងការប្រែប្រួលអាកាសធាតុកម្ពុជា បានអនុម័តសេចក្ដីថ្លែងការណ៍ផ្ទាំងទឹកកកឌូស្ហាន់បេ (The Dushanbe Glaciers Declaration) ជាមួយនឹងការអំពាវនាវ ដល់ការប្តេជ្ញាចិត្តដែលអាចអនុវត្តបាន គំនិតផ្តួចផ្តើមសហការ និងអនុសាសន៍ជាយុទ្ធសាស្រ្តនៅក្នុងសន្និសីទCOP30 នៅប្រទេសប្រេស៊ីលនាខែវិច្ឆិកាខាងមុខ ព្រមទាំងដើម្បីអនុវត្តសេចក្តីសម្រេចចិត្តរបស់មហាសន្និបាតអង្គការសហប្រជាជាតិ ស្តីពី «ការអភិរក្សផ្ទាំងទឹកកកជាសកលឆ្នាំ២០២៥»។