(ភ្នំពេញ)៖ ជនសង្ស័យ៣នាក់ ត្រូវបានកម្លាំងជំនាញ និងប៉ុស្តិ៍នគរបាលរដ្ឋបាលច្រាំងចំរេះ២ នៃអធិការដ្ឋាននគរបាលខណ្ឌឫស្សីកែវ ឃាត់ខ្លួនក្រោយធ្វើសកម្មភាពឆក់ខ្សែកពីក្មេងស្រីអាយុ៥ឆ្នាំម្នាក់។ ជនសង្ស័យ ត្រូវសមត្ថកិច្ចឃាត់ខ្លួនបាននៅយប់ថ្ងៃទី២៦ ខែឧសភា ឆ្នាំ២០២៥ ចំណុចលើផ្លូវបេតុង ក្រុមទី១ ភូមិ១ សង្កាត់ច្រាំងចំរេះទី១ ខណ្ឌឫស្សីកែវ។
លោកវរសេនីយ៍ឯក ហ៊ាង ថារ៉េត អធិការនគរបាលខណ្ឌឫស្សីកែវ បានឲ្យដឹងថា ជនសង្ស័យទាំង៣នាក់ ទី១៖ឈ្មោះ គង់ មករា អាយុ២០ឆ្នាំ (មានសារធាតុញៀន), ទី២៖ឈ្មោះ សុខ ណាង ហៅកាលីម អាយុ២៧ឆ្នាំ (មានសារធាតុញៀន) និងទី៣៖ឈ្មោះ ចាន់ ធួន ហៅ យៀន អាយុ៣៤ឆ្នាំ (មានសារធាតុញៀន)។
លោកអធិការបានបញ្ជាក់ថា នៅថ្ងៃទី២៤ ខែឧសភា ឆ្នាំ២០២៥ មុនពេលកើតហេតុ ជនរងគ្រោះបានដើរទៅទិញនំញាំម្នាក់ឯង ហើយដើរតាមផ្លូវត្រឡប់មកផ្ទះវិញ ខណៈពេលនោះជនសង្ស័យចំនួន៣នាក់ ជិះម៉ូតូ១គ្រឿង មកដល់ចំណុចកើតហេតុឃើញក្មេងស្រីរងគ្រោះកំពុងតែដើរម្នាក់ឯង បានធ្វើសកម្មភាពចុះពីលើម៉ូតូរួចទៅកញ្ឆក់យកខ្សែកពី ក្មេងស្រីរងគ្រោះបានសម្រេច ហើយគេចខ្លួនបាត់ទៅ។
បន្ទាប់មកម្តាយជនរងគ្រោះបន្ទាប់ពីដឹងថា កូនរបស់ខ្លួនបាត់ខ្សែក ក៏នាំកូនមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលច្រាំងចំរេះទី២ ក្រោយទទួលបានបណ្តឹងលោកវរសេនីយ៍ឯក ហ៊ាង ថារ៉េត និងលោកវរសេនីយ៍ទោ ផល មេសា អធិការរងទទួលផែន បានដឹកនាំកម្លាំងផ្នែកជំនាញសហការជាមួយប៉ុស្តិ៍នគរបាលរដ្ឋបាល ចុះទៅដល់ទីតាំងកើតហេតុ ស្រាវជ្រាវកំណត់មុខសញ្ញាឈានដល់ការឃាត់ខ្លួនបានជនសង្ស័យទាំង៣នាក់។
លោកអធិការ បានលើកឡើងថា ដោយមានការយកចិត្តទុកដាក់ពីលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បន្តលើកទឹកចិត្តឧបត្ថម្ភថវិកា២លានរៀល ដល់កម្លាំងជំនាញ និងប៉ុស្តិ៍នគរបាលរដ្ឋបាលច្រាំងចំរេះ២ នៃអធិការដ្ឋាននគរបាលខណ្ឌប្ញស្សីកែវ ដែលបង្រ្កាបជនសង្ស័យ៣នាក់ធ្វើសកម្មភាពឆក់ខ្សែក៕
