(ភ្នំពេញ)៖ នៅឯអាកាសយានដ្ឋានអន្តរជាតិភ្នំពេញ នាល្ងាចថ្ងៃ២០ ខែឧសភា ឆ្នាំ២០២៥ លោកបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស បានអញ្ជើញសំណេះសំណាល និងជូនដំណើរសាសនិកឥស្លាមកម្ពុជា ចំនួន១៣០រូប ទៅបំពេញកាតព្វកិច្ចបុណ្យហាជ្ជ នៅទីក្រុងម៉ាក្កះ ប្រទេសអារ៉ាប៊ីសាអូឌីត សម្រាប់ជើងទី១ នៃឆ្នាំ២០២៥។ ការចេញដំណើរនេះ នឹងធ្វើឡើងចាប់ពីថ្ងៃ២០ ខែឧសភា រហូតទៅដល់ថ្ងៃទី២៧ ខែឧសភា ឆ្នាំ២០២៥ ខាងមុខនេះ។
ក្នុងឱកាសនោះ ទេសរដ្ឋមន្ត្រី អូស្មាន ហាស្សាន់ បានឲ្យដឹងថា សម្រាប់ឆ្នាំ២០២៥ មានសាសនិកឥស្លាមកម្ពុជាចំនួន១,២០០នាក់ ចំណាយថវិកាសរុបចំនួនជាង៦,៦០០,០០០ដុល្លារអាមេរិក ដើម្បីទៅធ្វើបុណ្យហាជ្ជ ខណៈឆ្នាំនេះនៅមានសាសនិកឥស្លាមប្រមាណ២០០នាក់ទៀត ដែលមិនបានទៅដោយសារកម្ពុជាមានកូតាចំនួន១,២០០នាក់ប៉ុណ្ណោះ។ ជុំវិញបញ្ហានេះ ទេសរដ្ឋមន្ត្រី គ្រោងនឹងជួបរដ្ឋមន្ត្រីហាជ្ជី និងអ៊ុំរ៉ោះអារ៉ាប៊ីសាអូឌីត ដើម្បីសុំចំនួនកូតាបន្ថែមទៀត ចន្លោះពី១,៥០០ទៅ២,០០០នាក់ សម្រាប់ឆ្នាំក្រោយៗទៀត។
ទេសរដ្ឋមន្ត្រី បានថ្លែងបន្ថែមថា ក្រៅពីសាសនិកឥស្លាមប្រមាណ១,២០០រូបខាងលើ ក៏មានចំនួន១៧រូបផ្សេងទៀតផងដែរ ដែលទទួលបានការឧបត្ថម្ភពីព្រះចៅ សាល់ ម៉ាន់ ពិនអាប់ឌុលអាហ្សីស អាល់ស៊ូអ៊ូឌ ព្រះមហាក្សត្រនៃព្រះរាជាណាចក្រអារ៉ាប៊ីសាអូឌីត និងព្រះអង្គម្ចាស់ មហាំម៉ាត់ ពិន សាល់ម៉ាន់ ព្រះរាជទាយាទ និងជានាយករដ្ឋមន្ត្រីអារ៉ាប៊ីសាអូឌីត ដើម្បីទៅធ្វើបុណ្យហាជ្ជ ដែលជាភ្ញៀវរបស់ព្រះអង្គ សម្រាប់ឆ្នាំ២០២៥។
ទេសរដ្ឋមន្ត្រី អូស្មាន ហាស្សាន់ បានបញ្ជាក់ថា កាលពីឆ្នាំ២០២៤ កន្លងទៅមានចំនួនត្រឹម៩៦៥នាក់ប៉ុណ្ណោះ បើធៀបនឹងឆ្នាំ២០២៥ នេះមានការកើនឡើងចំនួនជាង២០០នាក់ ដែលនេះ ហើយដោយសារប្រទេសយើងមានសុខសន្តិភាព សុខដុមនីយកម្មជាតិសាសន៍ និងសាសនា ដោយមានភាពងាយស្រួលក្នុងការចេញដំណើរទៅប្រតិបត្តិសាសនា។ លើសពីនេះទៅទៀត ទេសរដ្ឋមន្ត្រី ក៏ដូចជាសហគមន៍ឥស្លាមកម្ពុជាទាំងអស់ បានបង្ហាញអារម្មណ៍សប្បាយរីករាយ និងមោទនភាពជាខ្លាំង ដែលបានរស់នៅក្នុងប្រទេសមួយ ដែលយើងមានសុខសន្តិភាព សិទ្ធសេរីភាពគ្រប់បែបយ៉ាង នៅក្នុងការមានជំនឿផ្នែកសាសនា និងការប្រតិបត្តិសាសនា។
លើសពីនេះទៀត ទេសរដ្ឋមន្ត្រី បានលើកឡើងថា ការចេញដំណើររបស់សាសនិកឥស្លាមកម្ពុជា នាពេលនេះ បានបង្ហាញឲ្យឃើញថា សព្វថ្ងៃសាសនិកឥស្លាមកម្ពុជា ក៏ដូចជាប្រជាពលរដ្ឋទូទាំងប្រទេស មានជីវភាពធូរធារ និងការវិវត្តស្ថានភាពរស់នៅរបស់ខ្លួនឆ្ពោះទៅមុខជាបន្តបន្ទាប់ ដែលជាចំណែកមួយនៃការកើនឡើងនៃសេដ្ឋកិច្ចជាតិ ក្រោមការដឹកនាំ ប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបន្តដឹកនាំដោយ សម្តេចមហាបរវធិបតី ហ៊ុន ម៉ាណែត នាយរដ្ឋមន្ត្រីនៃកម្ពុជា ដែលបានធ្វើឲ្យប្រទេសជាតិមានសុខសន្តិភាព និងមានការអភិវឌ្ឍលើគ្រប់វិស័យ។
ជាចុងក្រោយ ទេសរដ្ឋមន្ត្រី អូស្មាន ហាស្សាន់ បានផ្តាំផ្ញើ និងការជូនពរដល់បណ្តាអ្នកដែលអញ្ជើញទៅបំពេញកាតព្វកិច្ច បុណ្យហាជ្ជនាថ្ងៃនេះ ព្រមទាំងអ្នកចេញដំណើរជាបន្តបន្ទាប់ សូមប្រកបដោយសេចក្តីសុខសុវត្ថិភាព និងបំពេញកាតព្វកិច្ច របស់ខ្លួនគ្រប់លក្ខណៈ តាមក្បួនច្បាប់ របស់សាសនាឥស្លាម។
សូមជម្រាបថា ការទៅចូលរួមប្រតិបត្តិបុណ្យហាជ្ជ គឺជាកាតព្វកិច្ចទី៥ ក្នុងចំណោមកាតព្វកិច្ចទាំង៥ របស់សាសនាឥស្លាម ដែលជារៀងរាល់ឆ្នាំ សាសនិកឥស្លាម នៅទូទាំងពិភពលោក ពីគ្រប់ទិសទីអញ្ជើញទៅប្រារព្វបុណ្យនេះ នៅឯទីក្រុងម៉ាក្កះ ប្រទេសអារ៉ាប៊ីសាអូឌីត៕
