(ភ្នំពេញ)៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃសៅរ៍ ទី១៧ ខែឧសភា ឆ្នាំ ២០២៥នេះ បានចាត់លោកវេជ្ជ. អ៊ុយ សំអុន នាយក នាយកដ្ឋានគ្រប់គ្រងគ្រោះមហន្តរាយ និងសហការី ដោយមានការចូលរួមពីអនុសាខាកាកបាទក្រហមកម្ពុជាខណ្ឌពោធិ៍សែនជ័យ ចូលរួមរំលែកមរណទុក្ខដ៏ក្រៀមក្រំបំផុត ជាមួយក្រុមគ្រួសារសពឈ្មោះ រៀន សុភឿន អាយុ ៤៩ឆ្នាំ ដែលស្លាប់ដោយគ្រោះថ្នាក់ចរាចរណ៍រថយន្តបុករះនៅជិតក្រសួងមហាផ្ទៃ កាលពីរសៀល ថ្ងៃទី១៥ ខែឧសភា ២០២៥ ដល់គេហដ្ឋាន ស្ថិតក្នុងសង្កាត់ទន្លេបាសាក់ខណ្ឌចំការមន រាជធានីភ្នំពេញ។
ស្ថិតក្នុងសមានទុក្ខដ៏ក្រៀមក្រំសោកសង្រេងនេះ លោកវេជ្ជ. អ៊ុយ សំអុន បានមានប្រសាសន៍ថា ការមកចូលរួមរំលែកមរណទុក្ខនៅពេលនេះ គឺធ្វើឡើងបន្ទាប់ពីទទួលបានព័ត៌មានដ៏រន្ធត់ និងសោកសង្រេងនេះភ្លាម សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានចាត់រូបលោកមកចូលរួមផ្ទាល់ ដោយនាំយកថវិកាចំនួន ៥លានរៀល និងគ្រឿងឧបភោគបរិភោគមួយចំនួន ព្រមជាមួយនូវប្រសាសន៍ផ្តាំផ្ញើរំលែកទុក្ខដ៏ក្រៀមក្រំ និងសោកស្តាយជាទីបំផុតជាមួយក្រុមគ្រួសារសពដែលបានបាត់បង់ប្តី ឪពុកជាទីគោរពស្រលាញ់ ជាអ្នកទ្រទ្រង់ដ៏សំខាន់ក្នុងជីវភាព និងការរស់នៅប្រចាំថ្ងៃ ដ៏សោកសង្រេង និងខ្លោចផ្សាជាទីបំផុត និងសូមបួងសួងដល់វិញ្ញាណក្ខន្ធសព បានទៅកាន់សុគតិភពកុំបីឃ្លៀងឃ្លាតឡើយ។
អ្នកស្រី ធី ណារ៉េន អាយុ៤៨ ជាភរិយានៃសព និងក្រុមគ្រួសារ បានគោរពថ្លែងអំណរគុណ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានចាត់មន្ត្រីមកចូលរួមរំលែកមរណទុក្ខក្នុងខណៈកំពុងរងទុក្ខដ៏សោកសៅ ព្រមជាមួយថវិកា និងគ្រឿងឧបភោគបរិភោគមួយចំនួននាពេលនេះ និងអរគុណដល់អនុសាខាកាកបាទក្រហមកម្ពុជាខណ្ឌពោធិ៍សែនជ័យថវិកា ១លានរៀល និងគ្រឿងឧបភោគបរិភោគមួយចំនួន។
លោកស្រីបន្តថា «សម្រាប់ថវិកានិងគ្រឿងឧបភោគបរិភោគទាំងនេះ យើងខ្ញុំនឹងយកទៅរៀបចំធ្វើបុណ្យ៧ថ្ងៃឱ្យបានសមរម្យជូនស្វាមី»។
ជាថ្មីម្តងទៀត លោកស្រី និងកូនៗ ព្រមទាំងក្រុមគ្រួសារសាច់ញាតិទាំងអស់ សូមគោរពជូនពរសម្តេចកិត្តិព្រឹទ្ធបណ្ឌិត សូមមានសុខភាពល្អបរិបូណ៌ កម្លាំងពលំមាំមួន និងជន្មាយុយឺនយូរ ដើម្បីបន្តផ្តល់ក្តីសង្ឃឹម និងភាពកក់ក្តៅដល់ប្រជាជនកម្ពុជាជារៀងរហូតតទៅ៕
