(ព្រុយណេ)៖ លោក នេត្រ ភក្ត្រា រដ្ឋមន្រ្តីក្រសួងព័ត៌មាន បានវាយតម្លៃខ្ពស់ពីទំនាក់ទំនង និងកិច្ចសហប្រតិបត្តិការរវាងកម្ពុជា-វៀតណាម ក្នុងវិស័យព័ត៌មាន និងសោតទស្សន៍ និងបានឯកភាពបន្តជំរុញការអនុវត្តអនុស្សរណៈ យោគយល់ស្តីពី កិច្ចសហប្រតិបត្តិការលើប្រព័ន្ធផ្សព្វផ្សាយ ដែលបានចុះហត្ថលេខានៅឆ្នាំ២០២៣កន្លងទៅ ដែលផ្តោតសំខាន់លើការផ្លាស់ប្តូរព័ត៌មាន ការទប់ស្កាត់ព័ត៌មានក្លែងក្លាយ ការផ្សព្វផ្សាយ និងការអភិវឌ្ឍធនធានមនុស្ស ក្នុងវិស័យព័ត៌មាន។

ការវាយតម្លៃនេះធ្វើឡើងនៅក្នុងជំនួបទ្វេភាគីជាមួយលោក Le Hai Binh អនុរដ្ឋមន្ត្រីអចិន្ត្រៃយ៍ នៃក្រសួងវប្បធម៌ កីឡា និងទេសចរណ៍ នៃសាធារណរដ្ឋសង្គមនិយមវៀតណាម នាថ្ងៃទី៧ ខែឧសភា ឆ្នាំ២០២៥ ក្នុងក្របខណ្ឌ នៃកិច្ចប្រជុំរដ្ឋមន្ត្រីព័ត៌មានអាស៊ាន លើកទី១៧ នៅរាជធានីបិនដា ស៊េរី បេហ្គាវ៉ាន់ ប្រទេសព្រុយណេដារ៉ូសាឡាម។

ក្នុងជំនួបពិភាក្សាការងាររវាងលោករដ្ឋមន្ត្រី នេត្រ ភក្ត្រា និងលោក Le Hai Binh អនុរដ្ឋមន្ត្រីអចិន្ត្រៃយ៍នៃក្រសួងវប្បធម៌ កីឡា និងទេសចរណ៍ នៃសាធារណរដ្ឋសង្គមនិយមវៀតណាម, ទាំងកម្ពុជា-វៀតណាម បានបង្ហាញពីការ ប្តេជ្ញាចិត្ត ក្នុងការប្រយុទ្ធប្រឆាំងនឹងព័ត៌មានក្លែងក្លាយ ដែលកំពុងក្លាយជាបញ្ហាក្នុងតំបន់ និងអន្តរជាតិ និងបានចាត់ទុកភាពជាដៃគូរវាងប្រទេសទាំងពីរមានសារៈសំខាន់ក្នុងការទប់ស្តាត់នូវព័ត៌មានក្លែងក្លាយ និងរក្សាភាពត្រឹមត្រូវ សុក្រឹត្យនៃលំហូរព័ត៌មាន។

ឆ្លៀតក្នុងឱកាសនោះ លោករដ្ឋមន្រ្តី នេត្រ ភក្ត្រា ក៏បានអញ្ជើញសមភាគីវៀតណាមដើម្បីចូលរួមក្នុងកិច្ចប្រជុំកំពូលប្រព័ន្ធផ្សព្វផ្សាយអាស៊ី (Asia Media Summit) លើកទី២០ ដែលកម្ពុជានឹងទទួលធ្វើជាម្ចាស់ផ្ទះនៅខេត្តសៀមរាប នាខែកក្កដា ឆ្នាំ២០២៥ ខាងមុខនេះផងដែរ៕