(ភ្នំពេញ)៖ ដោយអនុវត្តន៍តាមបទបញ្ជាដ៏ម៉ឺងម៉ាត់របស់លោកឧត្តមសេនិយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានដាក់ចេញក្នុងស្មារតីអង្គប្រជុំជាបន្តបន្ទាប់ ក្រោមប្រធានបទបង្ការ ទប់ស្កាត់ និងបង្ក្រាបបទល្មើសក្មេងទំនើង ដែលបានប្រើប្រាស់នូវ ដាវកែច្នៃ និងកាំបិតវែង កាប់លើជនរងគ្រោះ និងសម្ភារផ្សេងៗ។
នៅថ្ងៃទី២៥ ខែឧសភា ឆ្នាំ២០២៤នេះ ក្រោយពីទទួលបញ្ជាដឹកនាំភ្លាមកម្លាំងជំនាញខណ្ឌដូនពេញ និងប៉ុស្តិ៍បានចុះអនុវត្តន៍រដ្ឋបាលពិនិត្យ តាមអាជីវកម្មកែច្នៃ កាំបិត ដាវ។
ជាលទ្ធផល គឺមានតែកន្លែងលក់កាំបិតបត់ខ្លីតូចៗ (ដោយពុំមានកន្លែងផលិតកៃច្នៃដាវឡើយ)។ ចំពោះមុខកម្លាំងបាននិងកំពុងពង្រឹង និងបន្តចុះពិនិត្យបន្ថែមជាប់ជាប្រចាំ នៅតាមបណ្តាលមូលដ្ឋានប៉ុស្តិ៍ទាំង១១។
ដោយឡែក នៅអធិការដ្ឋាននគរបាលខណ្ឌកំបូល បានចុះត្រួតពិនិត្យ និងធ្វើការអប់រំណែនាំដល់សិស្សានុសិស្ស អំពីបញ្ហាក្មេងទំនេីង នៅសាលាអនុវិទ្យាល័យឪឡោក ស្ថិតនៅភូមិត្រពាំងពោធិ៍ សង្កាត់ឪឡោក ខណ្ឌកំបូល។
ក្នុងនោះ កម្លាំងចម្រុះបានធ្វេីការត្រួតពិនិត្យឆែកកាតាប នឹងពិនិត្យក្រោមកែបម៉ូតូរបស់សិស្សានុសិស្សបានចំនួន១៤ម៉ូតូ សិស្សានុសិស្សសរុបចំនួន២១នាក់ ប្រុសចំនួន១៧នាក់ ពុំមានអ្វីគួរឲ្យកត់សម្គាល់ឡេីយ។
ក្រៅពីការត្រួតពិនិត្យកម្លាំងចម្រុះ ក៏បានធ្វេីការអប់រំ ណែនាំដល់សិស្សានុសិស្ស កុំឲ្យគេចវេសពីសាលា ប្រមូលផ្តុំនៅតាមហាងកាហ្វេបង្ករជាក្រុមក្មេងទំនេីង និងបានផ្សព្វផ្សាយអំពីរផលប៉ះពាល់នៃការប្រេីប្រាស់គ្រឿងញៀននិងបារីអេឡិចត្រូនិកផងដែរ៕
