(កំពង់ធំ)៖ មន្ទីរសាធារណការ និងដឹកជញ្ជូនខេត្តកំពង់ធំ នារសៀលថ្ងៃទី១០ ខែមេសា ឆ្នាំ២០២៤ បានរៀបចំនិមន្តព្រះសង្ឃសូត្រមន្តលើករាសីបួងសួងសុំសេចក្ដីសុខ ក្នុងឱកាសបុណ្យចូលឆ្នាំថ្មីប្រពៃណីខ្មែរខាងមុខនេះ។
ពិធីនេះបានធ្វើឡើងក្រោមវត្តមានលោក ជូ កុល្លា ប្រធានមន្ទីរ និងលោកស្រី ដោយមានការចូលរួមពីថ្នាក់ដឹកនាំ មន្រ្តីរាជការ មន្ត្រីជាប់កិច្ចសន្យា កម្មករទាំងអស់បានចូលរួមផងដែរ។
លោក ជូ កុល្លា បានបួងសួងដល់វត្ថុស័ក្តិសិទ្ធនៅលើលោកនេះ និងទេវតាឆ្នាំថ្មីដែលនឹងមកគ្រប់គ្រងភពផែនដីបន្ដពីទេវតាឆ្នាំចាស់ សូមប្រោះព្រំសព្វសាធុការពរជ័យសិរីមង្គលបវរមហាប្រសើរជូនដល់ថ្នាក់ដឹកនាំ មន្រ្តីរាជការទាំងអស់បានទទួលនូវសុខភាពល្អ សេចក្ដីសុខ សេចក្តីចម្រើន ជោគជ័យរាល់ការបំពេញភារកិច្ចក្នុងឆ្នាំថ្មីនេះ។
ពិធីនេះជាការគោរពប្រតិបត្តិប្រពៃណីទំនៀមទម្លាប់ជាតិ និងបង្ហាញពីភាពសុខសាន្ដរបស់ប្រជាពលរដ្ឋ ស្របពេលប្រទេសជាតិមានសុខសន្តិភាពពេញលេញ ក្រោមម្លប់នៃសន្ដិភាព ដែលរក្សាបាននូវខឿនសេដ្ឋកិច្ច វឌ្ឍនភាពសង្គមដ៏ល្អប្រសើរ និងការអភិវឌ្ឍលើគ្រប់វិស័យនៃប្រជាជាតិកម្ពុជាទាំងមូល។
បន្ទាប់ពីធ្វើការបូជាទៀនធូប និងថ្វាយភួងផ្កាភ្ញីនៅក្នុងរានអាសនៈប្រាសាទយាយព័ន្ធរួចមក ក្នុងពិធីបួងសួងនេះបានប្រព្រឹត្តធ្វើទៅតាមគន្លងប្រពៃណីទំនៀមទម្លាប់នៃព្រះពុទ្ធសាសនាព្រះសម្មាសម្ពុទ្ធ ដែលបានគោរពបដិបត្តិតរៀងមក៕
