(កណ្ដាល)៖ រដ្ឋបាលខេត្តកណ្ដាល ទទួលពានរង្វាន់ជើងឯកលេខ១ ក្នុងការប្រឡងប្រណាំងជ្រើសរើស និងផ្ដល់ជ័យលាភីពានរង្វាន់សេវាសង្គមរដ្ឋបាលថ្នាក់ក្រោមជាតិ ក្នុងនោះរដ្ឋបាលស្រុកល្វាឯម ទទួលពានរង្វាន់ ជើងឯកលេខ១ និងរដ្ឋបាលឃុំកំពង់ស្វាយ ស្រុកកៀនស្វាយ ទទួលពានរង្វាន់ជើងឯកលេខ៤ លើជ័យលាភីពានរង្វាន់ជើងឯកសេវាសង្គម រដ្ឋបាលខេត្តប្រចាំឆ្នាំ ២០២២-២០២៣ នៅទូទាំងប្រទេស។
ការទទួលពានរង្វាន់នេះ ស្ថិតក្នុងសន្និបាតត្រួតពិនិត្យលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងមហាផ្ទៃ និងបូកសរុបចលនាប្រឡងប្រណាំងអនុវត្តគោលនយោបាយ «ភូមិ ឃុំ-សង្កាត់ មានសុវត្ថិភាព ឆ្នាំ២០២៣» ក្រោមអធិបតីភាពលោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស្ថិតនៅសាលប្រជុំទីស្ដីការក្រសួង នាថ្ងៃទី២៩ ខែកុម្ភៈ ឆ្នាំ២០២៤។
លោក គង់ សោភ័ណ្ឌ ក្នុងនាមរដ្ឋបាលខេត្តកណ្ដាល សូមគោរពថ្លែងអំណរគុណយ៉ាងជ្រាលជ្រៅ ជូនចំពោះលោកអភិសន្តិបណ្ឌិត ស សុខា ដែលបានរៀបចំការប្រឡងប្រណាំងជ្រើសរើស និងផ្ដល់ជ័យលាភីពានរង្វាន់សេវាសង្គមរដ្ឋបាលថ្នាក់ក្រោមជាតិ។
ជាមួយគ្នានេះ រដ្ឋបាលខេត្តកណ្ដាលសូមគោរពថ្លែងអំណរគុណដ៏ជ្រាលជ្រៅ សូមគោរពជូនចំពោះ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារ រាជរដ្ឋាភិបាលចុះមូលដ្ឋានខេត្តកណ្តាល ដែលតែងយកចិត្តទុកដាក់ឧបត្ថម្ភគាំទ្រទាំងស្មារតី សម្ភារ និងថវិកា គ្រប់បែបយ៉ាង ដល់រដ្ឋបាលខេត្តក្នុងការអនុវត្តការងារ ជាពិសេស ការអភិវឌ្ឍខេត្ត និងការផ្តល់សេវាសាធារណៈដល់ ប្រជាពលរដ្ឋ ទើបនាំឱ្យខេត្តកណ្តាល ទទួលពានរង្វាន់ជើងឯកលេខ១ នៅទូទាំងប្រទេសនាពេលនេះ។
រដ្ឋបាលខេត្តកណ្ដាល សូមកោតសរសើរ និងវាយតម្លៃខ្ពស់ចំពោះមន្ត្រីទីចាត់ការ អង្គភាពជំនាញ កងកំលាំងសមត្ថកិច្ចរបស់រដ្ឋបាលខេត្ត រដ្ឋបាលក្រុង ស្រុក ឃុំ សង្កាត់ និងមន្ទីរ អង្គភាពជំនាញពាក់ព័ន្ធទាំងអស់នៅទូទាំង ខេត្តកណ្តាល ដែលតែងបានអនុវត្តយ៉ាងសកម្មតាមយុទ្ធសាស្រ្តរបស់រាជរដ្ឋាភិបាលកម្ពុជាក្នុងរយៈពេល៦អាណត្តិកន្លងមក និងបន្តបន្ថែមកម្លាំងសាមគ្គី មូលគំនិតយោបល សកម្មភាព យ៉ាងស្រុះដៃក្នុងការអនុវត្តយុទ្ធសាស្រ្ត បញ្ចកោណដំណាក់កាលទី១ របស់រាជរដ្ឋាភិបាលកម្ពុជា ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដើម្បីបម្រើសេវាសាធារណៈជូនប្រជាពលរដ្ឋ ដែលនាំឱ្យរដ្ឋបាលខេត្តកណ្តាល ទទួលបានការកោតសរសើរពីប្រមុខរាជរដ្ឋាភិបាលកម្ពុជា ជាពិសេសក្រសួងមហាផ្ទៃ បានពិនិត្យនិងវាយតម្លៃយ៉ាងល្អិតល្អន់បំផុត ជាច្រើនដំណាក់កាល ទម្រាំខេត្តកណ្តាលទទួលបានពានរង្វាន់ជើងឯកលេខ១ នាពេលនេះ។
ជាការលើកទឹកចិត្តដល់រដ្ឋបាលខេត្តនាឱកាសនេះផងដែរ ក្រសួងមហាផ្ទៃ បានផ្តល់ជូនរង្វាន់ដល់រដ្ឋបាលខេត្ត សម្រាប់ការបម្រើសេវាសាធារណៈ រួមមាន៖ ពាន ចំនួន ១, វិញ្ញាបនបត្រ ចំនួន ១, កុំព្យូទ័រ ៣ គ្រឿង ម៉ាស៊ីនព្រីន ៣ គ្រឿង ម៉ូតូចំនួន ២រឿង និងថវិកាចំនួន ១២២,១០០,០០០ រៀល៕
