(បាត់ដំបង)៖ ក្រសួងសាធារណការ និងដឹកជញ្ជូន និងរដ្ឋបាលខេត្តបាត់ដំបង នៅថ្ងៃទី៣០ ខែឧសភា ឆ្នាំ២០២៣នេះ បានបើកសិក្ខាសាលាបណ្ដុះបណ្ដាល និងធ្វើបច្ចុប្បន្នភាពលើការគ្រប់គ្រង និងការផ្ដល់សេវាសាធារណៈក្នុងវិស័យដឹកជញ្ជូនផ្លូវគោក និងផ្លូវទឹកនៅការិយាល័យច្រកចេញចូលតែមួយ ក្រុង ស្រុក នៅខេត្តបាត់ដំបងក្រោមអធិបតីភាពលោក សួន រចនា រដ្ឋលេខាធិការក្រសួងសាធារណការ និងដឹកជញ្ជូននិងជាអនុប្រធានប្រចាំការគណៈកម្មការដឹកនាំកែទម្រង់វិមជ្ឈការ និងវិសហមជ្ឈការ នៃក្រសួងសាធារណការ និងដឹកជញ្ជូន, លោក សុខ លូ អភិបាលខេត្តបាត់ដំបង និងសិក្ខាកាមពាក់ព័ន្ធជាច្រើននាក់ទៀតនៅសាលប្រជុំអគារE សាលាខេត្តបាត់ដំបង ។

លោក សុខ លូ បានលើកឡើងថា សិក្ខាសាលាបណ្តុះបណ្តាលនេះ ត្រូវបានរៀបចំឡើង ក្នុងគោលបំណងលើកកម្ពស់សមត្ថភាព និងការយល់ដឹងរបស់ថ្នាក់ដឹកនាំ និងមន្ត្រីពាក់ព័ន្ធ របស់រដ្ឋបាលខេត្ត រដ្ឋបាលស្រុកអំពីបែបបទនិងនីតិវិធី ក្នុងការផ្តល់សេវាសាធារណៈក្នុងវិស័យដឹកជញ្ជូនផ្លូវគោក នៅរដ្ឋបាលក្រុង ស្រុក ការត្រួតពិនិត្យលក្ខណៈបច្ចេកទេសត្រីចក្រក្រយានយន្ត និងទោចក្រក្រយានយន្តសណ្តោងរ៉ឺម៉ក ការគ្រប់គ្រងនិងចុះបញ្ជីការផ្តល់លិខិតអនុញ្ញាតធ្វើអាជីវកម្មយានដ្ឋានជួសជុល កែច្នៃដំឡើងទោចក្រយានយន្ត សុវត្ថិភាពដរចម្លង និងនីតិវិធីនៃការចុះបញ្ជីជលយាន នៅច្រកចេញចូលតែមួយ រដ្ឋបាលរាជធានី-ខេត្ត។

លោកអភិបាលខេត្តបានបន្តថា ក្នុងយុទ្ធសាស្ត្រចតុកោណដំណាក់កាលទី៤ និងការត្រៀមខ្លួនឆ្លើយតប​ទៅនឹងបដិវត្តន៍​ឧស្សាហកម្មជំនាន់ទី៤ ក៏ដូចជាការវិវត្តន៍ឥតឈប់ឈរនៃការរីកចម្រើនផ្នែកសេដ្ឋកិច្ច និងសង្គម រាជរដ្ឋាភិបាលកម្ពុជាបានចាត់ទុកការធ្វើបរិវត្តកម្មឌីជីថល (ការផ្លាស់ប្តូរទៅប្រើប្រាស់ប្រព័ន្ធឌីជីថល) គឺជាកិច្ចការអាទិភាព ដែលត្រូវគិតគូរ និងរៀបចំឡើងដោយផ្អែកលើតម្រូវការជាក់ស្ដែងសក្តានុពល ធនធាន និងសមត្ថភាពរបស់ស្ថាប័ននីមួយៗ។

លោកបានបញ្ជាក់ថា វិធានការ​គោល​នយោបាយជាក់លាក់ជាច្រើននឹងត្រូវបានគិតគូរ និងដាក់ចេញ ដែលផ្តោតជាសំខាន់លើការកសាងមូលដ្ឋានគ្រឹះចំនួនពីរ៖ ទី១, ការអភិវឌ្ឍហេដ្ឋារចនាសម្ព័ន្ធឌីជីថល (ការតភ្ជាប់ឌីជីថល ហេដ្ឋរចនាសម្ព័ន្ធបច្ចេក វិទ្យាហិរញ្ញវត្ថុ ប្រព័ន្ធទូទាត់សងប្រាក់ឌីជី ថល ឡូជីស្ទីក និងការដឹកជញ្ជូនគោលដៅចុងក្រោយ) និងទី២,ការកសាងទំនុកចិត្ត និងភាពជឿជាក់លើប្រព័ន្ធឌីជីថល (ក្របខ័ណ្ឌច្បាប់ប្រកបដោយភាពឆ្លើយតប ប្រសិទ្ធភាព និងការពង្រឹងការគ្រប់គ្រងសន្តិសុខឌីជីថល)។

លោកបានបន្តថា ទន្ទឹមនេះ សម្រាប់ការធ្វើកំណែទម្រង់វិមជ្ឈការ និងវិសហមជ្ឈការនៅរដ្ឋបាលថ្នាក់ក្រោមជាតិរាជរដ្ឋាភិបាលក៏បានដាក់ចេញនូវកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទី២(២០២១-២០៣០) ដែលមានសមាសភាគសំខាន់ៗចំនួន៥សម្រាប់អនុវត្តកម្មវិធីជាតិនេះ ក្នុងនោះសម្រាប់លទ្ធផលរំពឹងទុកនៃសមាសភាគទី៥ របស់កម្មវិធីជាតិនេះ ក៏បានកំណត់ ឲ្យមានការកែលម្អ និងពង្រឹងការអនុវត្តយន្តការច្រកចេញចូលតែមួយសម្រាប់ការផ្តល់សេវារដ្ឋបាលនៅរដ្ឋបាលថ្នាក់ក្រោមជាតិ ដើម្បីឱ្យការផ្តល់សេវាកាន់តែមានភាពសាមញ្ញ ងាយស្រួល មានប្រសិទ្ធភាពនិងមានតម្លាភាព តាមរយៈការរៀបចំ និងការប្រើប្រាស់ប្រព័ន្ធបច្ចេកវិទ្យាព័ត៌មានវិទ្យាសម្រាប់ការផ្តល់សេវា ដែលក្នុងនោះសកម្មភាពអាទិភាពជាចម្បង គឺការផ្តល់សេវារដ្ឋបាលតាមប្រព័ន្ធ​អនឡាញដែលអនុញ្ញាត​ឲ្យប្រជាពលរដ្ឋ​អាចស្នើសុំសេវា បង់កម្រៃសេវា និងតាមដានដំណើរការនៃការស្នើសុំសេវាតាមប្រព័ន្ធព័ត៌មានវិទ្យាបានដោយខ្លួនឯង។

លោក សួន រចនា រដ្ឋលេខាធិការក្រសួងសាធារណការ និងដឹកជញ្ជូន និងជាអនុប្រធានប្រចាំការគណៈកម្មការដឹកនាំកែទម្រង់វិមជ្ឈការ និងវិសហមជ្ឈការនៃក្រសួងសាធារណការ និងដឹកជញ្ជូន បានលើកឡើងថា យើងបានរៀបចំអង្គសិក្ខាសាលានេះបានចំនួន២លើករួចមកហើយ ដែលបានប្រារព្ធ​ធ្វើនៅខេត្តកំពង់ចាម និងខេត្តកំពត មានការចូលរួម សមាសភាពមកពីបណ្ដាខេត្តចំនួន១៣ គឺ ខេត្តកំពង់ចាមត្បូងឃ្មុំ ព្រៃវែង កណ្តាលកំពង់ធំ ព្រះវិហារកំពត រាជធានីភ្នំពេញ កំពង់ស្ពឺ កោះកុង ព្រះសីហនុ តាកែវ និងខេត្តស្វាយរៀង និងមានរដ្ឋបាលស្រុកគោលដៅចំនួន៨៤កំពុងអនុវត្តមុខងារ សរុបអ្នកចូលរួម២១៨ នាក់។

ដោយឡែកអង្គសិក្ខាសាលានាព្រឹកនេះជាការៀបចំលើកទី៣មានការចូលរួមសមាសភាពមកពីបណ្តាខេត្តចំនួន១០ គឺមាន ខេត្តបាត់ដំបង សៀមរាប បន្ទាយមានជ័យ កំពង់ឆ្នាំង ពោធិ៍សាត់ ក្រចេះរតនគិរី ស្ទឹងត្រែង ឧត្តរមានជ័យ និងខេត្តមណ្ឌគិរី និងមានរដ្ឋបាលស្រុក គោលដៅចំនួន៤៩ សរុបអ្នកចូលរួម១៩២ នាក់។

លោកបានបន្តថា កម្មវិធីនេះ​ត្រូវបានចូលរួមធ្វើ​បទបង្ហាញ​ពីមន្ត្រី​ជំនាញ ដែលអញ្ជើញមកពី អគ្គនាយកដ្ឋានដឹកជញ្ជូនផ្លូវគោក និងអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ ផងដែរ។ សិក្ខាសាលានេះ មានសារៈសំខាន់ណាស់ ដែលត្រូវបានរៀបចំឡើងក្នុងគោលបំណងផ្សព្វផ្សាយ និងបណ្ដុះបណ្ដាលធ្វើបច្ចុប្បន្នភាព ដល់មន្ត្រីអនុវត្តមុខងារផ្ទាល់នៅការិយាល័យច្រកចេញចូលតែមួយ ក្រុង ស្រុក ខណ្ឌដើម្បីមានសមត្ថភាពគ្រប់គ្រាន់ ក្នុងការផ្តល់សេវាជូនប្រជាពលរដ្ឋ ប្រកបដោយប្រសិទ្ធភាពគុណភាព គណនេយ្យភាព និងតម្លាភាព៕