(ស្វាយរៀង)៖ សាកលវិទ្យាល័យស្វាយរៀង និងសមាគមអ្នកស្រាវជ្រាវវឌ្ឍនភាពកម្ពុជា-ចិន នៅព្រឹកថ្ងៃទី៣០ ខែឧសភា ឆ្នាំ២០២៣នេះ បានរួមគ្នាពន្លាតការយល់ដឹងទស្សនវិជ្ជាចិនស្តីពី «កិច្ចកសាងសហគមន៍ជោគវាសនារួមនៃមនុស្សជាតិ»

ក្រោមការគាំទ្រយ៉ាងពេញទំហឹងពីស្ថានទូតចិន ប្រចាំកម្ពុជា លោកបណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន បានថ្លែងទៅកាន់គណៈគ្រប់គ្រងសាស្រ្តាចារ្យ និងនិស្សិតចំនួន២០០នាក់ នៅសាកលវិទ្យាល័យស្វាយរៀង ថា ជាទស្សនវិជ្ជារបស់ចិនដែលបានផ្តួចផ្តើមកាលពីថ្ងៃទី២៣ ខែមីនា ឆ្នាំ២០១៣ ដោយលោក Xi Jinping ប្រធានរដ្ឋចិន នោះគឺ «កិច្ចកសាងសហគមន៍ជោគវាសនារួមនៃមនុស្សជាតិ» ដែលវាជាយុទ្ធសាស្ត្រដ៏សំខាន់នៅក្នុងគតិបណ្ឌិតចិនរួមជាមួយនឹងទស្សនវិស័យជាសកលយ៉ាងទូលំទូលាយ ហើយបានរចនាប្លង់មេសម្រាប់ការអភិវឌ្ឍសន្តិភាព និងកសាងពិភពលោក ដោះស្រាយក្នុងការប្រឈមមុខនឹងបញ្ហាជាសកលនានា។

លោកបណ្ឌិត ជា មុនីឫទ្ធិ បានលើកឡើងថា ប្រទេសចិនបានអំពាវនាវឱ្យប្រជាជននៃប្រទេសទាំងអស់ធ្វើការរួមគ្នាក្នុងការកសាងពិភពលោកដែលបើកចំហ បរិយាប័ន្ន បៃតងភាព សន្តិភាពយូរអង្វែង សន្តិសុខសកល និងវិបុលភាពរួម។ បច្ចុប្បន្ននេះ ប្រទេសចិនបានក្លាយជាដៃគូពាណិជ្ជកម្មសំខាន់ៗនៅក្នុងតំបន់ និងប្រទេសជាង១៤០ នៅក្នុងពិភពលោក ដើម្បីបង្កើនល្បឿនដល់ដល់ប្រព័ន្ធពាណិជ្ជកម្មពហុភាគីដែលមានលក្ខណៈបើកចំហ តម្លាភាព បរិយាប័ន្ន និងគ្មានការរើសអើង ហើយកសាងសេដ្ឋកិច្ចពិភពលោកមួយដែលបើកចំហ។

ជាមួយគ្នានេះដែរ លោកបណ្ឌិត ជា មុនីឫទ្ធិ បានបន្តថា ក្រោមទម្រនៃទស្សនវិជ្ជាចិន ស្តីពី «សហគមន៍ជោគវាសនារួមនៃមនុស្សជាតិ» ទើបកម្លាំងរួមគ្នាក្នុងរយៈពេល១០ឆ្នាំនេះ បាននាំពិភពលោកឈានទៅបិទបញ្ចប់គោលនយោបាយគាំពារពាណិជ្ជកម្ម និងគោលនយោបាយឯកោនិយមដែលមិនផ្តល់ផលប្រយោជន៍អ្វីទាំងអស់។

ក្រោយពីបានស្តាប់អង្គបាឋកថានេះ លោក ទុំ សារាវុធ សាកលវិទ្យាធិការនៃសាកលវិទ្យាល័យស្វាយរៀង បានគូសរំលេចថា ជាការប្រែក្លាយពីទស្សនវិជ្ជាចិន ស្តីពី «កិច្ចកសាងសហគមន៍ជោគ វាសនារួមនៃមនុស្សជាតិ» ទៅជាគោលការណ៍សកល ដោយគិតមកដល់ឆ្នាំ២០២៣នេះ គឺរយៈពេល១០ឆ្នាំកន្លងមកហើយ ដែលប្រទេសចិន បានរួមកម្លាំងជាមួយបណ្តាប្រទេសលើពិភពលោកដោយបន្តការរួមចំណែកថ្មី និងធំជាងមុន ដោយជំរុញឱ្យពិភពលោកប្រែទៅជាភូមិសកលដ៏ធំមួយពោរពេញដោយអនាគតដ៏រុងរឿង និងបៃតងភាព និងបានប្រែទៅជាភូមិប្រកបដោយឧទ្យានចម្រុះអរិយធម៌ដ៏ស្រស់ត្រកាលរួមគ្នាសម្រាប់មនុស្សជាង ៨ពាន់លាននាក់។

សាកលវិទ្យាធិការនៃសាកលវិទ្យាល័យស្វាយរៀង បានបន្ថែមថា ភូមិសកលដែលបានចេញពីទស្សនវិជ្ជាចិនស្តីពី «កិច្ចកសាងសហគមន៍ជោគវាសនារួមនៃមនុស្សជាតិ» បានបង្កើនទំនុកចិត្ត បង្កើនកម្លាំងរួមគ្នាឈរលើជំហនៅក្នុងសច្ចភាពយ៉ាងច្បាស់លាស់នៃប្រវត្តិសាស្ត្រ ហើយបន្តប្រកាន់ខ្ជាប់នូវវឌ្ឍនភាពមាគ៌ាទំនើបកម្មសង្គមរបស់មនុស្សជាតិ ឈានឆ្ពោះទៅសម្រេចបាននូវសន្តិភាព និងការអភិវឌ្ឍពិភពលោកប្រកបដោយចីរភាព៕