(ពោធិ៍សាត់)៖ លោក ជាវ តាយ សមាជិកគណៈកម្មាធិការកណ្តាល គណបក្សប្រជាជនកម្ពុជា ប្រធានគណៈកម្មាធិការគណបក្សខេត្ត និងជាប្រធាន ក្រុមការងារ ចុះជួយក្រុងពោធិ៍សាត់ នាថ្ងៃទី២០-២១ ខែមករា ឆ្នាំ២០២២ បានអញ្ជើញជួបសំណេះសំណាល ជាមួយសមាជិក សមាជិកាបក្ស និងបើកសន្និបាតបូកសរុបលទ្ធផលការងារ រយៈពេល៥ឆ្នាំ(២០១៧-២០២២) និងលើកទិសដៅអនុវត្តបន្ត រយៈពេល៥ឆ្នាំ (២០២២-២០២៧) របស់គណៈកម្មាធិការ គណបក្ស ប្រជាជនកម្ពុជា សង្កាត់ផ្ទះព្រៃ និងសង្កាត់លលកស ក្រុងពោធិ៍សាត់ ខេត្តពោធិ៍សាត់ ដោយមានការចូលរួមពីក្រុមការងារថ្នាក់ខេត្ត ក្រុង និង សមាជិក សមាជិកាគណបក្សសង្កាត់មួយចំនួនទៀត។
លោក ជាវ តាយ បានលើកឡើងថា នេះគឺជាការជួបជុំគ្នាមួយ ដើម្បីឱ្យសាខា អនុសាខា មេក្រុមបក្ស និងប្រជាជនដែលជាសមាជិក សមាជិកាគណៈកម្មាធិការ គណបក្សប្រជាជនកម្ពុជា ក្នុងសង្កាត់ផ្ទះព្រៃទាំងមូល ទទួលបានការយល់ដឹង ឱ្យបានគ្រប់ជ្រុងជ្រោយ លើការងារគ្រប់គ្រង ដឹកនាំ និងការអភិវឌ្ឍន៍លើគ្រប់វិស័យ ក្នុងអាណត្តិទី៤ រយៈពេល៥ឆ្នាំ (២០១៧-២០២២) ក៏ដូចទិសដៅអនុវត្តបន្ត រយៈពេល៥ឆ្នាំ (២០២២-២០២៧) តើអនុវត្តបានអ្វីខ្លះ? និងមានបញ្ហាប្រឈមអ្វីខ្លះ? ត្រូវធ្វើការដោះស្រាយ។
ជាទូទៅបេក្ខភាពក្រុមប្រឹក្សា ឃុំ សង្កាត់ ត្រូវបានធ្វើការបោះឆ្នោតស្ទាបស្ទង់ និងសម្រិតសម្រាំង តែទោះជាយ៉ាងនេះក៏ដោយ ក៏នៅមានចំណុចខ្វះចន្លោះ ពីព្រោះថាចិត្តមនុស្សមិនដូចគ្នានោះទេ កត្តាដែលសំខាន់ត្រូវចេះរួបរួមសាមគ្គី គោរពគ្នាទៅវិញទៅមក កុំរើសអើង ត្រូវដើរតាមគោលនយោបាយ របស់គណបក្ស ក្រោមការដឹកនាំប្រកបដោយគតិបណ្ឌិត របស់សម្តេចតេជោ ហ៊ុន សែន ប្រធានគណបក្ស និងជានាយករដ្ឋមន្ត្រីនៃកម្ពុជា និងសូមផ្តល់ការគាំទ្រដ៏មុតមាំ និងចូលរួមសកម្មក្នុងការអនុវត្តគោលនយោបាយអភិវឌ្ឍន៍ជាតិ ក៏ដូចគោលនយោបាយរបស់គណបក្ស ដើម្បីមូល ដ្ឋានយើងទទួលបានសមិទ្ធិផលថ្មីៗ លើគ្រប់វិស័យ រួមចំណែកកាត់បន្ថយភាពក្រីក្រ។
នៅក្នុងខណៈនោះលោក ជាវ តាយ បានដាក់ចេញនូវផែនការសំខាន់ៗ ៧ចំណុច គឺឃុំ សង្កាត់ ត្រូវលើកកម្ពស់លទ្ធិប្រជាធិបតេយ្យ សិទ្ធិសេរីភាពរបស់ប្រជាជន មានសន្តិសុខ សណ្តាប់ធ្នាប់ សុវត្ថិភាព ផ្តល់សេវាប្រកបដោយគុណភាព តម្លាភាព គណនេយ្យភាព អភិវឌ្ឍន៍សេដ្ឋកិច្ចមូលដ្ឋាន លើកកម្ពស់គាំពារសង្គម ភាពស្អាតស្អំ គ្មានការរំលោភអំណាច និងមានស្វ័យភាព សិទ្ធិអំណាច ព្រមទាំងអនុវត្តយ៉ាងម៉ឺងម៉ាត់ នូវអភិក្រមទាំង៥ នៃការដឹកនាំគឺ «ឆ្លុះកញ្ចក់ ងូតទឹក ដុសក្អែល និងវះកាត់»។ មិនតែប៉ុណ្ណោះ រៀបចំគោលនយោបាយ សម្រាប់អភិវឌ្ឍន៍ ឃុំ សង្កាត់ ៥ឆ្នាំបន្ត (២០២២-២០២៧) ធ្វើបច្ចុប្បន្នភាពគ្រួសារបក្ស ក្រុមបក្ស និងឱ្យសមាជិកទៅពិនិត្យឈ្មោះ ចុះឈ្មោះ សម្របសម្រួល ដោះស្រាយ ចាត់ចែង និងប្រគល់ភារកិច្ចឱ្យយុវជន បន្តចិញ្ចឹមចលនា លើកទឹកចិត្តជនសកម្ម និងត្រូវប្រកាន់ខ្ជាប់នូវភាពស្មោះត្រង់ តម្កល់ឧត្តមប្រយោជន៍ចំពោះជាតិមាតុភូមិជាធំ។
បន្ទាប់ពីលោក លោកស្រី ជាថ្នាក់ដឹកនាំ បានអានរបាយការណ៍បូកសរុបលទ្ធផល រយៈពេល៥ឆ្នាំ និងលើកទិសដៅអនុវត្ត ៥ឆ្នាំបន្ត និងបង្ហាញបេក្ខជនឈរឈ្មោះបោះឆ្នោតពេញសិទ្ធិ និងបម្រុងរបស់សង្កាត់នីមួយៗនោះរួចមក លោក អ៊ឹង គឹមលាង អនុប្រធានគណៈកម្មាធិការគណបក្សខេត្ត និងជាប្រធានក្រុមការងារយុវជនគណបក្ស ក៏បានចូលរួមផ្តល់គោលការណ៍ និងសកម្មភាពមួយចំនួន ជូនបេក្ខជនប្រធានក្រុមបក្ស ត្រូវតម្រង់មុខព្រួញឆ្ពោះក្នុងការបោះឆ្នោត ឃុំ សង្កាត់ អាណត្តិទី៥ នាថ្ងៃទី០៥ ខែមិថុនា ឆ្នាំ២០២២ ទទួលបានជោគជ័យទូទាំងខេត្ត។
ក្នុងឱកាសនោះ ក៏មានកម្មវិធីប្រគល់លិខិតថ្លែងអំណរគុណ ជូនដល់សប្បុរសជន គឺឯកឧត្តម ឈម វាសនា និងលោក លៀង ពេជ្រ ទីប្រឹក្សាផ្ទាល់សម្តេចព្រះអភិសិរីសុគន្ធា មហាសង្ឃរាជាធិបតីកិត្តិឧទ្ទេសបណ្ឌិត បួរ គ្រី ដែលបានឧបត្ថម្ភសម្ភារៈ គ្រឿងឧបភោគបរិភោគ និងថវិកា ដល់គណៈកម្មាធិការគណបក្សសង្កាត់លលកសផងដែរ៕
