(ភ្នំពេញ)៖ លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល និងជាប្រធានគណ:កម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខណ្ឌទូទាំងប្រទេស (គ.វ.ក-១៩) បានទទួលវិញ្ញាបនបត្រទទួលស្គាល់ និងលើកសរសើរស្នាដៃលេចធ្លោក្នុងការរួមចំណែកអភិវឌ្ឍប្រទេសកម្ពុជា និងការជំរុញគោលដៅនៃកម្មវិធីអាហារូបករណ៍ហ្វូលប្រាយ (Fulbright scholarship) ក្នុងឱកាសខួបអតីតនិស្សិតអាហារូបករណ៍ហ្វូលប្រាយកម្ពុជា (75th Anniversary of Fulbright Cambodian Alumni) លើកទី៧៥ នាល្ងាចថ្ងៃទី១៧ ខែវិច្ឆិកា ឆ្នាំ២០២១។

វិញ្ញាបនបត្រដែលលោកស្រី ឱ វណ្ណឌីន ទទួលបាននេះ គឺត្រូវបានប្រគល់ដោយលោក ផាទ្រីក មើសហ្វី ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា នៅគេហដ្ឋានរបស់លោកផ្ទាល់ នាថ្ងៃនេះតែម្ដង។

លោក ផាទ្រីក មើសហ្វី បានរំលឹកអំពីចំណងទាក់ទងការទូត និងការផ្តល់អាហារូបករណ៍ហ្វូលប្រាយរបស់សហរដ្ឋអាមេរិក ដល់និស្សិតកម្ពុជានាពេលកន្លងមក ដែលថ្ងៃនេះ គឺជាខួបលើកទី៧៥ នៃអតីតនិស្សិតអាហារូបករណ៍ហ្វូលប្រាយកម្ពុជា។

លោកឯកអគ្គរដ្ឋទូតសហរដ្ឋអាមេរិកបានបន្តថា មកដល់ពេលនេះ មាននិស្សិតកម្ពុជាសរុប ប្រមាណ២២០នាក់ហើយ ដែលបានទទួលអាហារូបករណ៍ហ្វូលប្រាយ ទៅសិក្សានៅសហរដ្ឋអាមេរិក និងបានវិលត្រឡប់មកបម្រើការងារចូលរួមអភិវឌ្ឍប្រទេសកម្ពុជា ដែលក្នុងចំណោមនោះលោកស្រី ឱ វណ្ណឌីន ក៏ជាអតីតនិស្សិតអាហារូបករណ៍ហ្វូលប្រាយជំនាន់ដំបូងគេដែលបានទៅសិក្សានៅសហរដ្ឋអាមេរិក ផ្នែកសុខភាពសាធារណៈ នៅសាកលវិទ្យាល័យ យែល (Yale University, USA) នៃរដ្ឋខុននិចធីខាត់ (Connecticut) ក្រោយថ្ងៃរំដោះ ៧ មករា ១៩៧៩។

ក្រោយពីបានទទួលវិញ្ញាបនបត្រទទួលស្គាល់ស្នាដៃលេចធ្លោពីលោកឯកអគ្គរដ្ឋទូតសហរដ្ឋអាមេរិករួចមក លោកស្រី ឱ វណ្ណឌីន បានលើកឡើងថា ការទទួលស្គាល់ស្នាដៃលេចធ្លោនាពេលនេះ គឺមិនអាចកាត់ផ្តាច់ចេញបានពីការចិញ្ចឹមបីបាច់ថែបំប៉ន និងផ្តល់ឱកាសរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ជាប្រមុខដឹកនាំដ៏ខ្លាំងនោះឡើយ។

លោកស្រីក៏បានបន្តថា លោកស្រីជាស្ត្រីខ្មែរដំបូងគេដែលបានទទួលអាហារូបករណ៍ Fulbright ដ៏មានកិត្យានុភាពមួយនេះទៅសិក្សានៅសាកលវិទ្យាល័យយេល សហរដ្ឋអាមេរិក សម្រាប់កម្មវិធីសុខភាពសាធារណៈ ចាប់ពីពាក់កណ្តាលឆ្នាំ១៩៩៤ ដល់ពាក់កណ្តាលឆ្នាំ១៩៩៦។

បទពិសោធន៍ រៀនសូត្រដែលលោកស្រីទទួលបានពីកម្មវិធីនេះបានបង្កើនឡើងនូវសមត្ថភាពយ៉ាងខ្លាំង ដែលជំនាញ និងចំណេះដឹងរបស់លោកស្រី ត្រូវបានវិវត្តគ្រប់ពេលវេលាជាមួយនឹងក្តីមេត្តា ការលះបង់ ការប្តេជ្ញាចិត្ត និងភាពស្មោះត្រង់ ការជឿទុកចិត្តពីមនុស្សម្នាទាំងឡាយ ។ សំខាន់ជាងនេះទៅទៀតនោះ ក្នុងអំឡុងពេលជំងឺរាតត្បាតកូវីដ-១៩ អន្តរកម្មដែលលោកស្រីមានគឺបានធ្វើអ្វីៗ រួមទាំងការលះបង់ជីវិតគ្រួសារផ្ទាល់ខ្លួនជាមួយប្រជាជនរបស់លោកស្រីផ្ទាល់ ក្នុងការជួយពួកគេរាល់ថ្ងៃ មិនថាពេលថ្ងៃ ឬយប់ ទោះបីលោកស្រីកម្របានសម្រាកគ្រប់គ្រាន់ក៏ដោយ។

លោកស្រីមិនអាចភ្លេចបានទេថា រាជរដ្ឋាភិបាលកម្ពុជា បានចិញ្ចឹមនិងជួយលោកស្រី ដើម្បីឱ្យលោកស្រីបានចេញពីជ្រលងមរណៈនិងគ្រោះអវិជ្ជា បន្ទាប់ពីសម័យប៉ុលពត ហើយផ្តល់ឱកាសឱ្យលោកស្រីបានរៀនសូត្របន្ថែមទៀត និងរួមចំណែកជួយប្រជាជនលោកស្រី ដែលទឹកចិត្តលោកស្រីគឺនៅ ជាមួយប្រជាជនក្តីបារម្ភរបស់លោកស្រី គឺ សុខភាពប្រជាជនការយកចិត្តទុកដាក់របស់លោកស្រីគឺដើម្បីប្រជាជន ហើយទង្វើរបស់លោកស្រីគឺជួយប្រជាជនរបស់លោកស្រី។ នោះជាអ្វីៗទាំងអស់ដែលលោកស្រីបានធ្វើ និងអ្វីដែលកម្មវិធី Fulbright បានជះឥទ្ធិពលមកលើលោកស្រី ដែលលោកស្រីអាចឈរបានរហូតមកដល់ពេលនេះ។

លោកស្រីរដ្ឋលេខាធិការ ឱ វណ្ណឌីន បានប្ដេជ្ញាបន្តដំណើរការងារជួយជាតិកម្ពុជាបន្តទៀតក្នុងនាមជាអ្នកដឹកនាំផ្នែកសុខភាពសាធារណៈមួយរូបហើយ លោកស្រីនឹងធ្វើអ្វីៗដែលអាចធ្វើបានដើម្បីជួយប្រជាជន និងប្រទេសកម្ពុជា។

លោកស្រី ឱ វណ្ណឌីន បានសម្ដែងនូវការអរគុណដល់សហរដ្ឋអាមេរិក ដែលបានផ្តល់អាហារូបករណ៍ដ៏ល្បីល្បាញនេះដល់រូបលោកស្រី ដល់និសិត្សកម្ពុជា និងបានអរគុណដល់អតីតនិសិត្សអាហារូបករណ៍ហ្វូលប្រាយទាំងអស់ ដែលបានបោះឆ្នោត ទទួលស្គាល់នូវកិច្ចខិតខំប្រឹងប្រែងបង្កេីតស្នាដៃជួយប្រទេសជាតិ និងជួយប្រជាជនកម្ពុជា ជាពិសេសក្នុងកំឡុងពេលវិបត្តិកូវីដ១៩៕