(កណ្ដាល)៖ លោក ចៅ តុល អនុប្រធានក្រុមការងារថ្នាក់ជាតិចុះជួយស្រុកកោះធំ និងជានាយករងខុទ្ទកាល័យសម្ដេចជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា សម្តេចតេជោ ហ៊ុន សែន មានគុណបំណាចយ៉ាងធំធេងចំពោះបងប្អូនខ្មែរអ៉ីស្លាម ជាពិសេសនៅក្នុងដំណាក់កាលរាតត្បាតជំងឺកូវីដ១៩។
ការលើកឡើងបែបនេះរបស់លោក ចៅ តុល បានធ្វើឡើងនៅថ្ងៃទី១២ ខែតុលា ឆ្នាំ២០២១នេះ ក្នុងឱកាសលោកបានជួបសំណេះសំណាលសួរសុខទុក្ខ ចែកអំណោយ និងថវិកាដល់ប្រជាពលរដ្ឋខ្មែរ និងខ្មែរ-អ៉ីស្លាម ព្រមទាំងប្រជាការពារជាង២០០នាក់ នៅសាលាឃុំព្រែកថ្មី ស្រុកកោះធំ ខេត្តកណ្ដាល។
លោក ចៅ តុល បានលើកឡើងយ៉ាងដូច្នេះថា៖ «គុណបំណាច់ដ៏ធំធេងរបស់សម្ដេចតេជោ ហ៊ុន សែន ដែលស្រឡាញ់បងប្អូនសាសនិកអ៉ីស្លាម និងស្រឡាញ់គ្រប់សាសនិកទាំងអស់ ក្នុងទិសដៅរស់នៅក្រោមដំបូលសន្តិភាព ទាំងអស់គ្នា ប្រកបដោយសេចក្ដីសុខ ហើយនេះជាភ័ព្វសំណាងណាស់ដែលយើងមានមេដឹកនាំប្រកបដោយចិត្តធម៌ និងមានសមត្ថភាពខ្ពស់»។
ជាមួយគ្នានេះលោក ចៅ តុល បានថ្លែងថា ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្ដេចតេជោ ហ៊ុន សែន បានគ្រប់គ្រងបានយ៉ាងល្អបំផុតមិនឱ្យមានការរីករាលដាលឆ្លងជំងឺកូវីដ១៩ ទ្រង់ទ្រាយធំ ដោយសម្ដេចបានប្រឹងប្រែងទាំងយប់ទាំងថ្ងៃគ្មានបានសម្រាកស្រួលខ្លួនឡើយ។ ធ្វើយ៉ាងណាខិតខំរកសេចក្ដីសុខជូនពលរដ្ឋទូទាំងប្រទេសកម្ពុជា ឱ្យជៀសផុតនូវគ្រោះកម្មនៃជំងឺកូវីដ១៩នេះ ពិសេសគិតគូរពីសុខទុក្ខ របស់ប្រជារាស្ត្រគ្រប់ស្រទាប់វណ្ណៈដោយគ្មានប្រកាន់និន្នាការនយោបាយអ្វីឡើយ។
លោកបញ្ជាក់ពីមោទនភាពកាន់តែអស្ចារ្យដោយកម្ពុជា បានជាប់ចំណាត់ថ្នាក់លេខ២ នៃការទប់ស្កាត់កូវីដ១៩ បានល្អបំផុតក្នុងតំបន់អាស៊ាន នៅពីក្រោយសិង្ហបុរីតែមួយប៉ុណ្ណោះ ដែលនេះជាការខិតខំប្រឹងប្រែងទាំងយប់ទាំងថ្ងៃ របស់សម្ដេច មានឈ្លាសវៃរហ័សរហួនក្នុងការចាត់តាំងចាត់ចែងបានយ៉ាងមានប្រសិទ្ធភាពខ្ពស់បំផុត ហើយជាសំណាងល្អខ្លាំងណាស់សម្រាប់ប្រទេសកម្ពុជា និងប្រជាជនទាំងមូលដែលមានមេដឹកនាំប្រកបដោយគតិបណ្ឌិត និងមានសមត្ថភាពខ្លាំងក្លា បញ្ញាឈ្លាសវៃ ដែលបានដឹកនាំស្រុកទេសជាតិឱ្យមានសន្តិភាព ឱ្យរួចផុតពីភាពក្រីក្រ មានការអភិវឌ្ឍន៍ ពិសេសគឺទប់ស្កាត់បានល្អបំផុតនូវការឆ្លងជំងឺកួវីដ១៩ ដ៏សាហាវនេះ។
ក្នុងឱកាសនេះលោក ចៅ តុល «បានលើកឡើងពីគោលនយោបាយសុខដុមនីយកម្មសាសនាល្អបំផុត របស់រាជរដ្ឋាភិបាលកម្ពុជា ដែលបានគិតគូរយកចិត្តទុកដាក់ដល់គ្រប់សាសនិកទាំងអស់ ក្នុងនោះសាសនិកអ៉ីស្លាមត្រូវបានលើកតម្កើនឡើង ហើយក៏លោកគ្រូ-អ្នកគ្រូ ក៏ទទួលបានក្របខណ្ឌ មានប្រាក់បៀរវត្សរ៍ត្រឹមត្រូវ ព្រមទាំងមានសាលារៀនសាសនាអ៉ីស្លាមជាច្រើនផងដែរ នៅតាមមូលដ្ឋានសហគមអ៉ីស្លាមយើង»។
ទោះយ៉ាងណាលោក ចៅ តុល ក៏នៅបន្តអំពាវនាវដល់ប្រជាពលរដ្ឋទាំងអស់ត្រូវចូលរួមទប់ស្កាត់ការឆ្លងរីករាលដាលជំងឺកូវីដ១៩ តាមរយៈការអនុវត្តនូវវិធានសុខាភិបាលពិសេស គឺវិធានការ «៣កុំ និង៣ការពារ» ឱ្យមានប្រសិទ្ធភាពដើម្បីឈានទៅរកការកាត់ផ្ដាច់ការចម្លងជំងឺនេះទាំងស្រុងនាពេលឆាប់ៗ ខាងមុខនេះ។
សូមជម្រាបថា តាមរយៈការចុះជួយខ្នះខ្នែងជួយពីសំណាក់លោក ចៅ តុល ស្រុកកោះធំ ហាក់ប្រែប្រួលមុខមាត់យ៉ាងខ្លាំង ដោយមានការរីកចម្រើន ពិសេសទៅលើវិហារអ៉ីស្លាម ដ៏ធំលំដាប់ទី២ នៅកម្ពុជា ការកសាងហេដ្ឋារចនាសម្ព័ន្ធ ការសាងសង់ច្រាំងទន្លេ ក្រោយវិហារអ៉ីស្លាម ការដាក់អំពូលភ្លើងសូឡា ការស្ថាបនាផ្លូវបេតុង ការកសាងសាលារៀនសាសនាអ៉ីស្លាម ការកសាងខ្លោងទ្វាវិហារអ៉ីស្លាម ការជួសជុលដំបូលវិហារ ការក្រាលការ៉ូឡា ការរៀបចំសួន ការយុបតែងឈើក្នុងវិហារអ៉ីស្លាម ការតុបតែងគ្រឿងលម្អគ្រប់បែបយ៉ាងក្នុងវិហារអ៉ីស្លាម ដែលចំណាយថវិការខ្ទង់លានដុល្លាឯណោះ ដែលការរីកចម្រើននេះ ទទួលបានការសាទរជាអនេកពីសំណាក់ប្រជាពលរដ្ឋទូទាំងស្រុកកោះធំ ពិសេសគឺសម្រាប់បងប្អូនសាសនិកអ៉ីស្លាមតែម្ដង។
ខណៈគម្រោងសាសងសង់វិហារ នៅភូមិចាមក្រោម មានតម្លៃជាង២០ម៉ឺនដុល្លា ក៏គ្រោងនឹងសាងសង់ជាបន្តបន្ទាប់ផងដែរក្រោមការដឹកនាំរបស់លោក ចៅ តុល៕
