(កំពង់ចាម)៖ ឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងជាប្រធានក្រុមការងារថ្នាក់ជាតិចុះជួយខេត្តកំពង់ចាម និងអភិបាលខេត្តកំពង់ចាម លោក អ៊ុន ចាន់ដា រួមជាមួយថ្នាក់ដឹកនាំខេត្តជាច្រើនទៀត នៅព្រឹកថ្ងៃទី២៤ ខែកក្កដា ឆ្នាំ២០២១ បានប្រគេនទេយ្យទាន ដល់ព្រះសង្ឃគង់ចាំព្រះវង្សាចំនួន៤ វត្ត ក្នុងក្រុងកំពង់ចាម។
ទេយ្យទានដែលបានប្រគេនជូនព្រះសង្ឃនាពេលនោះរួមមាន៖ ទី១ វត្តថ្មី (ហៅវត្តបឹងស្នាយ), ទី២៖ វត្តដីដុះ, ទី៣៖ វត្តជ្រោយថ្ម និងទី៤៖ វត្តបឹងកុក ដោយក្នុងវត្តនីមួយៗ ត្រូវបានប្រគេនទេយ្យទានមានដូចជា៖ អង្ករ ១០០គីឡូក្រាម, មី៣កេស, ទឹកក្រូច២កេស, ត្រីខ ៣យួរ, ទឹកសុទ្ធ ៣កេស, ទឹកដោះគោ ១០កំប៉ុង, ស្ករស ៣កញ្ចប់, នំធុង ១ធុង , តែ ១កញ្ចប់, និងថវិកាចំនួន ២០០ដុល្លារ។
តាមមន្ត្រីនៃមន្ទីរធម្មការ និងសាសនាខេត្តកំពង់ចាម បានឱ្យដឹងថា ការចូលកាន់ព្រះវស្សា គឺជាបុណ្យមួយដែលមានសារៈសំខាន់ក្នុងព្រះពុទ្ធសាសនា ជាពេលវេលាសម្រាប់ភិក្ខុសង្ឃ និងសាមណេ បានរៀនធម៌ និងវិន័យឱ្យបានខ្ជាប់ខ្ជួន តាមពុទ្ធឱវាទរយៈពេល០៣ខែ ចាប់ផ្តើមពីថ្ងៃ០១រោចខែទុតិយាសាឍ ដល់ថ្ងៃ១៥កើត ខែអស្សុជ ហើយទៀន ព្រះវស្សា ព្រមទាំងគ្រឿងឧបភោគ បរិភោគ និងបច្ច័យយកមកវេរប្រគេន ព្រះសង្ឃនាពេលនេះ គឺជាការគោរពប្រពៃណីសាសនាព្រះពុទ្ធ ត្រូវចូលកាន់ព្រះវស្សា ក្នុងរយៈពេល អស់មួយត្រីមាស ដែលព្រះសង្ឃគង់ចាំព្រះវស្សានៅក្នុងទីវត្ត ដើម្បីព្រះសង្ឃយកទៅដុតបំភ្លឺ បូជាថ្វាយព្រះ និងសិក្សារៀនសូត្រនូវគម្ពីធម៌ វិន័យព្រះសម្មាសាម្ពុទ្ធ ព្រះបរមគ្រូនៃយើង៕
