(ភ្នំពេញ)៖ ដោយមានការយកចិត្តទុកដាក់ ពីថ្នាក់ដឹកនាំអគ្គនាយកដ្ឋាន និងប្រធានសាខាកាំកុងត្រូលផែស្ងួតចុងទីភ្នំពេញ ដែលតែងតែគិតគូពីសុខភាពបងប្អូនប្រជាពលរដ្ឋ ក្នុងការទទួលទានប្រចាំថ្ងៃ នៅថ្ងៃទី២៥ ខែតុលា ឆ្នាំ២០១៩ មន្រ្តីកាំកុងត្រូលផែស្ងួតចុងទីភ្នំពេញ និងសាខារាជធានីភ្នំពេញ សហការជាមួយមន្រ្តី មន្ទីរពាណិជ្ជកម្ម គណៈកម្មការ ផ្សារទួលទំពូង ចុះត្រួតពិនិត្យទំនិញ ម្ហូបអាហារវេចខ្ចប់ស្រេច ម្ហូបអាហារកែច្នៃក្នុងស្រុក និងស្រាវជ្រាវទប់ស្កាត់នូវទំនិញខូចគុណភាព និងទំនិញដែលមានហានិភ័យខ្ពស់ ដែលជនខិលខូចមួយចំនួនលួចបញ្ចេញមកលក់ ចែកចាយលើទីផ្សារ ក្នុងឱកាសព្រះរាជពិធីបុណ្យអ៊ំទូក ប្រដែតប្រទីត អកអំបុក សំពះព្រះខែ ឈានមកដល់នៅពេលខាងមុខនេះ។
ជាមួយគ្នានេះ មន្ត្រីជំនាញ បានយកគំរូម្ហូបអាហារចំនួន៣៥គំរូ មកពិសោធន៍នៅរថយន្តពិសោធន៍ចល័ត ដើម្បីរកសារធាតុគីមីហាមឃាត់ទៅលើទំនិញ ដូចជា បន្លែគ្រប់មុខ ប្រហុក ផ្អក មាំ សរសៃមីលឿង លត គុយទាវសរសៃធំ ប្រហិតសាច់គោ ប្រហិតសាច់ជ្រូក ជ្រក់ត្រសក់ មឹក បង្គារ ត្រីងៀត ត្រីបង្ហើម សាច់ក្រក -ល- ជាលទ្ធផល បានរកឃើញសំណល់ថ្នាំសំលាប់សត្វល្អិត នៅកូនខាត់ណាចិន ទំងន់១គីឡូក្រាម ត្រសក់៣គីឡូក្រាម និងផ្ទីដូង១.៥គីឡូក្រាម ត្រូវបានដកហូតយកមកកំទេចចោលទៅតាមនិតិវិធី។
ក្នុងឱកាសដឹកនាំផ្ទាល់ត្រួតពិនិត្យចំណីអាហារនេះ លោក គង់ វុទ្ឋី អនុប្រធានសាខាផែស្ងួតចុងទីភ្នំពេញ បានធ្វើការណែនាំ និងសំណូមពរដល់អាជីវករទាំងអស់ សូមកុំលួចលាក់បន្ថែមនូវសារធាតុគីមីផ្សេងៗ ដែលបង្កផលប៉ះពាល់ ដល់សុខភាពអ្នកប្រើប្រាស់ មិនតែប៉ុណ្ណោះ អ្នកដែលប្រព្រឹត្តិនោះ គឺមានគ្រោះថ្នាក់ខ្ពស់ជាងគេ ដោយសារតែគាត់នៅជិត និងជាអ្នកប៉ះពាល់ដោយផ្ទាល់នៅសារធាតុនេះ។
លោក គង់ វុទ្ឋី បញ្ជាក់ថា ដើម្បីឲ្យកាន់តែមានភាពងាយស្រួល និងមានទំនុកចិត្តខ្ពស់ ចំពោះចំណីអាហារពីសំណាក់បងប្អូនប្រជាពលរដ្ឋ បច្ចុប្បន្ននៅតាមផ្សារមួយចំនួន គឺមានមន្រ្តីកាំកុងត្រូលនៅប្រចាំជាប់តែម្តង បើសិនជាប្រជាពលរដ្ឋ ណាមានការសង្ស័យថាបន្លែ ផ្លែឈើ ចំណីអាហារ និងគ្រឿងឧបភោគបរិភោគណា ដែលមានសារធាតុគីមី អាចយកមកឲ្យមន្រ្តីកាំកុងត្រូលត្រួតពិនិត្យ ហើយបើសិនជាមានភាពមិនប្រក្រតី ណាមួយនិងធ្វើការដកហូតភ្លាមៗតែម្តង៕
