(កំពត)៖ នៅព្រឹកថ្ងៃទី១៥ ខែតុលា ឆ្នាំ២០១៩ នៅបរិវេណសាលាខេត្តកំពត បានប្រារព្ធពិធីគោរពព្រះវិញ្ញាណក្ខន្ធ និងថ្វាយព្រះរាជកុសលដ៏ថ្លៃថ្លាជូនព្រះករុណា ព្រះបាទសម្ដេច ព្រះនរោត្តម សីហនុ ព្រះមហាវីរក្សត្រព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ គម្រប់៧ឆ្នាំ។
ពិធីនេះបានប្រព្រឹត្ត ទៅដោយមានការអញ្ជើញចូលរួម ពីសំណាក់លោក ជាវ តាយ អភិបាលខេត្ត និងលោក ជឹង ផល្លា ប្រធានក្រុមប្រឹក្សាខេត្ត ព្រមទាំងសមាជិក សមាជិកា ក្រុមប្រឹក្សខេត្ត គណៈអភិបាលខេត្ត ថ្នាក់ដឹកនាំ និងមន្ត្រីរាជការនៃមន្ទីរ អង្គភាព ជុំវិញខេត្ត សិស្សនិស្សិត។
ពិធីនេះ ក៏មានការនិមន្តព្រះសង្ឃស្វាធ្យាយជយន្តោ និងសូត្រពុទ្ធជ័យមង្គល និងថ្នាក់ដឹកនាំខេត្តព្រមទាំងសមាជិកអង្គពិធីទាំងមូល បានថ្វាយក្រងផ្កាអុជទៀនធូប មានការស្មឹងស្មាតគោរពព្រះវិញ្ញាណក្ខន្ធ និងថ្វាយព្រះរាជកុសលព្រះករុណា ព្រះបាទសម្ដេច ព្រះនរោត្តម សីហនុ ព្រះមហាវីរក្សត្រ ព្រះវរាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ។
លោក ជាវ តាយ បានថ្លែងសុន្ទរកថា ក្នុងនាមក្រុមប្រឹក្សា គណៈអភិបាល កងកម្លាំងប្រដាប់អាវុធ ព្រះសង្ឃ មន្ត្រីរាជការសិស្សានុសិស្ស និងប្រជារាស្ត្រទូទាំងខេត្តកំពតទាំងមូល សូមសំដែងការលំឱនកាយ ដើម្បីតបស្នងព្រះមហាករុណា ដឹងគុណ និងព្រហ្មវិហារធម៌ដ៏ថ្លៃថ្លា ឧត្តុងឧត្ដមវិសេសវិសាល របស់ព្រះអង្គបរមរតនកោដ្ឋ ដែលព្រះអង្គបានលះបង់ព្រះកាយ ព្រះបញ្ញាញាណ ក្នុងព្រះរាជសកម្មភាព ដើម្បីបុព្វហេតុ ឯករាជ្យជាតិ បូរណភាពទឹកដី ផ្សះផ្សារបង្រួបបង្រួមជាតិ និងអភិវឌ្ឍគ្រប់វិស័យនារយៈពេលព្រះអង្គនៅគង់មានព្រះជន្មកន្លងមក។
លោកអភិបាលខេត្ត ក៏បានលំឱនកាយថ្វាយនូវព្រះរាជកុសលដ៏ថ្លៃថ្លា ចំពោះព្រះករុណា ព្រះបាទសម្ដេច ព្រះនរោត្តម សីហនុ «ព្រះបរមរតនកោដ្ឋ» ក្នុងឱកាសគម្រប់ខួប៧ឆ្នាំ ដែលជាថ្ងៃចូលទិវង្គតរបស់ព្រះអង្គ សូមឧទ្ទិសបួងសួងដល់ព្រះវិញ្ញាណក្ខន្ធ សូមព្រះអង្គទ្រង់យាងចាប់បដិសន្ធិ ក្នុងព្រះបរមសុគតិភពកុំបីឃ្លៀងឃ្លាតឡើយ៕
