(កោះកុង)៖ នៅវេលាម៉ោង១២៖៣០នាទីថ្ងៃត្រង់ ថ្ងៃទី ២៣ ខែធ្នូ ឆ្នាំ២០១៨ មានករណីរថយន្តក្រឡាប់ដោយខ្លួនឯង នៅចំណុចអន្ទង់អាំងធំ ចន្លោះគីឡូម៉ែតលេខ៦១,៦២ ស្ថិតក្នុងភូមិជីមាល ឃុំអណ្តូងទឹក ស្រុកបូទុមសាគរ ខេត្តកោះកុង បណ្តាលឲ្យស្លាប់៤នាក់ និងរបួសជាង១០នាក់។
សមត្ថកិច្ចមូលដ្ឋានបានឲ្យដឹងថា ជនរងគ្រោះជាក្រុមតន្រ្តីមួយក្រុមមកពីខេត្តកំពង់ស្ពឺ។
សម្រាប់មូលហេតុវិញ អាចមកពីអ្នកបើកបរមិនស្គាល់ភូមិសាស្ត្រច្បាស់លាស់ និងបើកបរប្រើល្បឿនលឿន ពេលចុះចំណោទ ជាន់ហ្វ្រាំងមិនស៊ី ដាក់លេខមិនចូល ក៏បណ្តាលឲ្យក្រឡាប់តែម្តង។
ក្រោយកើតហេតុភ្លាមៗ ជនរងគ្រោះត្រូវបានដឹកបញ្ជូនទៅកាន់មន្ទីរពេទ្យ ដើម្បីជួយសង្គ្រោះ។
សមត្ថកិច្ចបានបញ្ចាក់ថា ជនរងគ្រោះក្រុមតន្រ្តីទាំងនេះ ធ្វើដំណើរទៅលេង នៅក្នុងពិធីមង្គលការរបស់ប្រជាពលរដ្ឋ នៅឃុំត្រពាំងរូង ស្រុកកោះកុង។ ប៉ុន្តែជាអកុសល បានបណ្តាលឲជួបគ្រោះថ្នាក់ចរាចរណ៍ដ៏រន្ធត់មួយ៕
