(ភ្នំពេញ)៖ បន្ទាប់ពីបានឆ្លងកាត់ការបណ្ដុះបណ្ដាល ក្នុងកម្មវិធីអភិវឌ្ឍន៍និស្សិតសកលវិទ្យាល័យ (USDP) របស់កម្មវិធី SmartEdu ដែលមានរយៈពេល១៣ថ្ងៃ នៅក្នុងខេត្តសៀមរាប ក្រុមជយលាភីក្នុងវគ្គពាក់កណ្តាលផ្តាច់ព្រ័ត្រចំនួនបីក្រុម បានបង្ហាញដំណោះស្រាយនវានុវត្តន៍ នៅក្នុងវគ្គផ្ដាច់ព្រាត់ និងពិធីប្រគល់រង្វាន់ នៅសណ្ឋាគារសូហ្វីធែលភ្នំពេញ។

ព្រឹត្តិការណ៍បិទកម្មវិធី មានការចូលរួមជាកិត្តិយសពីលោក បណ្ឌិត ហង់ ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា និងលោកបណ្ឌិត កាន ច័ន្ទមេត្តា រដ្ឋលេខាធិការក្រសួងប្រៃសណីយ៍ និងទូរគមនាគមន៍កម្ពុជា។

ក្រុមដែលមានឈ្មោះថា «Smart» ដែលមាននិស្សិតថ្នាក់បរិញ្ញាបត្រចំនួន៨នាក់ ត្រូវបានជ្រើសរើសជាជយលាភីក្នុងវគ្គផ្ដាច់ព្រាត់។ គំនិតនវានុវត្តន៍បែបឌីជីថលទាំងថ្មី និងចាស់ ដើម្បីកាត់បន្ថយការតេមិនសូវមានតម្លៃដ៏ច្រើន មកកាន់មជ្ឈមណ្ឌលផ្ដល់ព័ត៌មានរបស់ក្រុមហ៊ុន Smart ដែលត្រូវបានបង្កើតឡើងដោយចំណាយពេលត្រឹមតែ៤៨ម៉ោង បានធ្វើឲ្យគណៈកម្មការវិនិច្ឆ័យភ្ញាក់ផ្អើល ក្នុងនោះរួមមានដូចជា លោក ថូម៉ាស ហ៊ុន (Thomas Hundt) នាយកប្រតិបត្តិក្រុមហ៊ុន Smart Axiata លោក ជី សីលា នាយកប្រតិបត្តិក្រុមហ៊ុន Sabay លោក Richard Bates នាយកប្រតិបត្តិក្រុមហ៊ុន AIA និងកញ្ញា ម៉ៅ សុផល្លីន នាយកផ្នែកដៃគូក្រុមហ៊ុន Pathmazing។

ក្រុមឈ្នះក្នុងវគ្គផ្ដាច់ព្រាត់ ទទួលបានរង្វាន់ជាទឹកប្រាក់ចំនួន ១,៨០០ដុល្លារ។ ចំណែកឯក្រុមដែលធ្វើបានល្អបំផុត ក្នុងអំឡុងពេលចូលរួមសិក្ខាសាលា ទទួលបានប្រាក់រង្វាន់ចំនួន ១,២០០ ដុល្លារ។ លើសពីនេះ និស្សិតដែលបានធ្វើល្អបំផុតចំនួន៨រូប នឹងទទួលបានការចុះកម្មសិក្សា ដែលមានប្រាក់ឧបត្ថម្ភ រយៈពេល២ខែ នៅឯក្រុមហ៊ុនរបស់ Axiata នៅប្រទេសម៉ាឡេស៊ី។

នៅក្នុងអំឡុងពេលបិទកម្មវិធី លោក ថូម៉ាស ហ៊ុន នាយកប្រតិបត្តិក្រុមហ៊ុន Smart Axiata បានចែករំលែកចក្ខុវិស័យរបស់ក្រុមហ៊ុន ក្នុងការបណ្ដុះអ្នកដឹកនាំអាជីកម្មថ្មីៗ សម្រាប់អនាគតរបស់វិស័យឌីជីថលនៅកម្ពុជា តាមរយៈកម្មវិធីប្រចាំឆ្នាំនេះ ដែលយកគំរូតាមកម្មវិធី Axiata អ្នកមានទេពកោសល្យវ័យក្មេង (Axiata Young Talent Program) ក្នុងប្រទេសម៉ាឡេស៊ី។

លោកថ្លែងបញ្ជាក់ថា «កម្មវិធី SmartEdu USDP រៀបចំនិស្សិតសាកលវិទ្យាល័យនៅកម្ពុជា ដើម្បីដឹកនាំឧស្សាហកម្មបច្ចេកវិទ្យារបស់ប្រទេសនាពេលអនាគត និងសាកល្បងសមត្ថភាពវិជ្ជាជីវៈរបស់ពួកគេ សម្រាប់ការរៀនជំនាញដោះស្រាយបញ្ហាពិតប្រាកដ។ ខ្ញុំមានសេចក្ដីសោមនស្សរីករាយណាស់ ដែលបានចំណាយពេលខ្លះៗ ជាមួយនឹងអ្នកចូលរួមនៅក្នុងខេត្តសៀមរាប ហើយខ្ញុំច្បាស់ក្នុងចិត្តណាស់ថា អនាគតរបស់កម្ពុជា នឹងមានភាពភ្លឺស្វាង»។

លោកបន្ដថា «យើងទន្ទឹងរង់ចាំបង្កើនបន្ថែមទៀតនូវវិស័យបច្ចេកវិទ្យាព័ត៌មាន និងទូរគមនាគមន៍របស់ប្រទេសកម្ពុជា ជាមួយអ្នកដែលមានទេពកោសល្យទាំងនេះ ព្រមទាំង អ្នកដែលមានទេពកោសល្យ ដែលចេញពីកម្មវិធី SmartEdu USDP នាឆ្នាំក្រោយទៀត»។

បេក្ខជនដែលមកពីសាកលវិទ្យាល័យចំនួន១៤ នៅទូទាំងកម្ពុជា ត្រូវបានជម្រុះយកចំនួន៤៨នាក់ ដែលក្នុងមួយក្រុមមានបេក្ខជនចំនួន៦នាក់។ បន្ទាប់មក ក្រុមទាំងនោះ បានចូលរួមក្នុងកម្មវិធីបណ្ដុះបណ្ដាល នៅសណ្ឋាគារសុខាក្នុងខេត្តសៀមរាប ជាកន្លែងដែលពួកគេ បានទទួលការបំពាក់បំប៉នផ្នែកទ្រឹស្ដី ផ្នែកពិសោធន៍ ឱកាសអភិវឌ្ឍបុគ្គល ដើម្បីអភិវឌ្ឍជំនាញទំនាក់ទំនង គំនិតច្នៃប្រឌិត និងជំនាញត្រិះរិះពិចារណា ក៏ដូចជាជំនាញគ្រប់គ្រងអារម្មណ៍ផងដែរ។

បេក្ខជនបានចូលរួមក្នុងការប្រកួតប្រជែង សិក្ខាសាលា និងការពិសោធន៍ជាច្រើន ទាក់ទងទៅនឹងអាជីវកម្មបែបឌីជីថល ដោយពួកគេត្រូវបានជម្រុញឲ្យបញ្ចេញសមត្ថភាពឲ្យអស់ និងផ្ដល់មតិយោបល់ដល់គ្នាទៅវិញទៅមក។

កញ្ញា កែវ ព្រីយ៉ានិត្យ ដែលបេក្ខជនមួយរូប មកពីសាកលវិទ្យាល័យភូមិន្ទភ្នំពេញបាននិយាយថា កម្មវិធីបណ្ដុះបណ្ដាលនេះគឺជាបទពិសោធន៍ដំបូងសម្រាប់ពួកយើងភាគច្រើន ហើយវាមានសារៈសំខាន់ណាស់ក្នុងការរៀបចំនិស្សិតសម្រាប់វគ្គផ្ដាច់ព្រាត់។

ព្រីយ៉ានិត្យបានប្រាប់ទៀតថា «កម្មវិធីបណ្ដុះបណ្ដាលរយៈពេល១៣ថ្ងៃនេះ គឺមានការមមាញឹកហើយហត់នឿយមែន ប៉ុន្តែខ្ញុំបានរៀនសូត្រច្រើនអំពីខ្លួនឯង អំពីមិត្តរួមក្រុម និងភាពជាអ្នកដឹកនាំលើអាជីវកម្ម។ ខ្ញុំសូមថ្លែងអំណរគុណដល់គណៈកម្មការដែលបានជ្រើសរើសខ្ញុំ ឲ្យចូលរួមក្នុងកម្មវិធីដ៏កម្រនេះ ដើម្បីបានរៀនសូត្រ អំពីជំនាញជាច្រើនក្នុងរយៈពេលដ៏ខ្លីនេះ។ ខ្ញុំនឹងយកចំណេះដឹង និងបទពិសោធន៍ទាំងនេះ ទៅប្រើនៅក្នុងការសិក្សា និងការងាររបស់ខ្ញុំផ្ទាល់ទៅថ្ងៃមុខ»។

កម្មវិធី SmartEdu USDP ត្រូវបានដាក់ឲ្យដំណើការ ក្នុងខែតុលា ឆ្នាំ២០១៨ ដោយក្រុមហ៊ុន Smart Axiata ដើម្បីជាផ្នែកមួយនៃអនុស្សារណៈយោគយល់គ្នាជាមួយនឹងក្រសួងអប់រំ យុវជន និងកីឡា ក្រសួងប្រៃសណីយ៍ និងទូរគមនាគមន៍កម្ពុជា។ ជាផ្នែកមួយនៃអនុស្សរណៈនៃការយោគយល់គ្នានេះ ក្រុមហ៊ុន Smart បានប្តេជ្ញាវិនិយោគប្រាក់ចំនួន ១លាន ៥សែនដុល្លារ សម្រាប់រយៈពេល៣ឆ្នាំ ទៅក្នុងកម្មវិធីចំនួនពីរនៃ SmartEdu ។

ក្រៅពីនេះ កម្មវិធីអាហារូបករណ៍ SmartEdu និងកម្មវិធីអភិវឌ្ឍន៍និស្សិតសកលវិទ្យាល័យ (USDP) នឹងបន្តបណ្ដុះធនធានមនុស្សកំពូលៗ សម្រាប់វិស័យឌីជីថល​ និងអាជីវកម្ម របស់កម្ពុជាបន្ថែមទៀត ដោយប្រើប្រាស់ឧបករណ៍ និងជំនាញនានា ដើម្បីជួយជំរុញវិស័យបច្ចេកវិទ្យានៅកម្ពុជា។
ថវិកាមួយផ្នែកនៃប្រាក់វិនិយោគទាំង១លាន៥សែនដុល្លារ ដែលផ្ដល់ជូនដោយក្រុមហ៊ុន Smart នឹងត្រូវបានបញ្ចូលទៅក្នុងកញ្ចប់ថវិកាជាតិ ដើម្បីការកសាងសមត្ថភាព ព្រមទាំងការស្រាវជ្រាវនិងអភិវឌ្ឍន៍។

សម្រាប់ព័ត៌មានបន្ថែម និងថ្មីៗពីក្រុមហ៊ុន Smart Axiata សូមចូលទៅកាន់ទំព័រហ្វេសប៊ុករបស់ Smart តាមរយៈ www.facebook.com/Smartforcambodia ឬចូលទៅកាន់គេហទំព័រ www.smartedu.com.kh ៕