(កំពង់ធំ)៖ នាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន សហការជាមួយអគ្គលេខាធិការដ្ឋាន នៃគណៈកម្មាធិការជាតិសុវត្ថិភាព ចរាចរណ៍ផ្លូវគោក, សហភាពសហព័ន្ធយុវជនកម្ពុជា, មន្ទីរសាធារណការ និងដឹកជញ្ជូន ខេត្តកំពង់ធំ និងស្នងការនគរបាលខេត្តកំពង់ធំ បានចុះធ្វើយុទ្ធនាការ អប់រំផ្សព្វផ្សាយសុវត្ថិភាពចរាចរណ៍ ដើម្បីពញាក់ស្មារតីដល់អ្នកប្រើប្រាស់ផ្លូវ ឱ្យមានការប្រុងប្រយ័ត្នក្នុងឱកាសពិធីបុណ្យភ្ជុំបិណ្ឌនេះ។

យុទ្ធនាការអប់រំផ្សព្វផ្សាយនេះធ្វើឡើងក្រោមអធិបតីភាព លោក ប្រាក់ សារ៉ាត់ អភិបាលរងខេត្តកំពង់ធំ នាព្រឹកថ្ងៃទី០៣ ខែតុលា ឆ្នាំ២០១៨ នៅតាមបណ្តោយផ្លូវជាតិលេខ ៦ ស្ថិតក្នុង ភូមិដំរីជាន់ខ្លា សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ។

ថ្លែងក្នុងឱកាសនោះ លោក ប្រាក់ សារ៉ាត់ បានលើកឡើងថា គ្រោះថ្នាក់ចរាចរណ៍ គឺជាឃាតកលាក់មុខ ដែលសម្លាប់អ្នកធ្វើដំណើរតាមដងផ្លូវជារៀងរាល់ថ្ងៃ ដោយសារការបើកបរម៉ូតូមិនពាក់មួកសុវត្ថិភាព ហើយមហន្តរាយដ៏ធំធេងនេះ ធ្វើឱ្យប៉ះពាល់ដល់សុខដុមរមនា ជីវភាពរស់នៅរបស់ប្រជាពលរដ្ឋ និងសេដ្ឋកិច្ចសង្គមជាតិទាំងមូល ដែលមានតម្លៃមិនអាចកាត់ថ្លៃបាន។

លោកក៏បានអំពាវនាវដល់អ្នកធ្វើដំណើរទំាងអស់ ឱ្យចូលរួមគោរពច្បាប់ចរាចរណ៍ទាំងអស់គ្នា ជាពិសេសមន្ត្រីរាជការ និងកងកម្លំាងប្រដាប់អាវុធ បើកបរម៉ូតូត្រូវពាក់មួកសុវត្ថិភាពឱ្យបានត្រឹមត្រូវ និងគ្រប់ពេលវេលា ត្រូវធ្វើជាគំរូឈានមុនគេ ក្នុងការគោរពច្បាប់ចរាចរណ៍ ដើម្បីកាត់បន្ថយគ្រោះថ្នាក់ចរាចរណ៍ ដើម្បីថែរក្សាអាយុជីវិតមនុស្ស ចំពោះអ្នកដែលជាទីស្រឡាញ់ និងជាបង្គោលក្នុងគ្រួសារ និងថែរក្សាសង្គមឱ្យមានសុវត្ថិភាព ដើម្បីទ្រទ្រង់ជីវភាពគ្រួសារ និងអភិវឌ្ឍន៍ប្រទេសជាតិឱ្យមានការរីកចំរើនប្រកបដោយចីរភាព ចំពោះការបើកបរមិនត្រូវបើកបរលើសល្បឿនកំណត់ដាច់ខាត ពេលបើកបរមិនត្រូវបើកបរស្ថិតក្រោមឥទ្ធិពលនៃគ្រឿងស្រវឹង ត្រូវបើកបរដោយគោរពសិទ្ធគ្នា យោគយល់អធ្យាស្រ័យគ្នា។

តាមការបញ្ជាក់របស់លោក អេង រស់ អនុប្រធានមន្ទីរសារធារណការ និងដឹកជញ្ជូនខេត្តកំពង់ធំបានឱ្យដឹងថា ដោយសារប្រទេសជាតិ មានការរីកចម្រើនលើគ្រប់វិស័យពិសេស ការកើនឡើងនូវមធ្យោបាយធ្វើដំណើរដែលមានរថយន្ត ទោចក្រយានយន្ត បានធ្វើឱ្យមានការគ្រោះថ្នាក់នៅតាមដងផ្លូវ ដែលបញ្ហាទាំងអស់នេះ ត្រូវបានរាជរដ្ឋាភិបាលយកចិត្តដាក់ ក៏ដូចជាការចង្អុលបង្ហាញពីលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសារធារណៈការ និងដឹកជញ្ជូន បានផ្តល់មួកសុវត្ថិភាព សម្រាប់ចែកជូនដល់មន្ត្រីរាជការ និងមន្ត្រីជាប់កិច្ចសន្យារបស់មន្ទីរសារធារណៈការ និងដឹកជញ្ជូន ដើម្បីយកទៅប្រើប្រាស់សម្រាប់ជាគំរូដល់មន្ត្រីរាជការ និងប្រជាពលរដ្ឋ ព្រោះមន្ត្រីទាំងអស់ជាអ្នកអនុវត្តន៍ច្បាប់។

លោកក៏បានបញ្ជាក់ទៀតថា ក្នុងយុទ្ធនាការនេះដែរ ក៏បានរៀបចំជាកម្មវិធីសួរឆ្លើយសំណួរស្តីពីច្បាប់ និងសុវត្ថិភាពចរាចរណ៍ផ្លូវគោក និងការរឹតបន្តឹងការអនុវត្តច្បាប់ចរាចរណ៍ផ្លូវគោក ហើយក៏បានចែកជូននូវ៖ មួកសុវត្ថិភាព ១២៥មួក (មួកសម្រាប់មនុស្សធំចំនួន ១០០មួក មួកកុមារចំនួន ២៥មួក), សៀវភៅច្បាប់ស្តីពីចរាចរណ៍ផ្លូវគោក១១០ក្បាល, ស្ទីកឃ័រចំណាំងផ្លាត ៦០០សន្លឹក, សៀវភៅអ្វីដែលអ្នកបើកបរម៉ូតូត្រូវយល់ដឹង ១៥០ក្បាល, ខិតបណ្ណសីលធម៌ ១០ចំណុចដើម្បីសុវត្ថិភាពចរាចរណ៍ ១០០សន្លឹក, ខិតបណ្ណជំនួយស្មារតីស្តីពីសុវត្ថិភាពចរាចរណ៍ផ្លូវគោក ៤០០ ច្បាប់, ខិតបណ្ណគោរពច្បាប់ចរាចរណ៍គឺដើម្បីការពារជីវិតអ្នក គ្រួសារអ្នក និងអ្នកដទៃ ១,០០០សន្លឹកផងដែរ៕