(វ៉ាស៉ីនតោន)៖ ប្រធានាធិបតីអាមេរិក លោក ដូណាល់ ត្រាំ បាននៅថ្ងៃអាទិត្យ ទី១៣ ខែកក្កដាថា លោកនឹងបញ្ជូនប្រព័ន្ធការពារមីស៉ីល Patriot ទៅឱ្យអ៊ុយក្រែន ដោយនិយាយថា វាចាំបាច់សម្រាប់ការការពារប្រទេស។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

លោក ត្រាំ បានបញ្ជាក់ប្រាប់ក្រុមអ្នកសារព័ត៌មាន នៅឯមូលដ្ឋានទ័ព Andrews ខាងក្រៅទីក្រុងវ៉ាស៉ីនតោន​ យ៉ាងដូច្នេះថា «យើងនឹងបញ្ជូន Patriots ដែលពួកគេ (អ៊ុយក្រែន) កំពុងត្រូវការខ្លាំង ពីព្រោះលោក ពូទីន ពិតជាធ្វើឱ្យមនុស្សជាច្រើនភ្ញាក់ផ្អើល។ គាត់និយាយល្អ តែមិនគោរពសម្តី។ ខ្ញុំមិនចូលចិត្តទេ»។ លោកបន្ថែមថា «ជាមូលដ្ឋាន យើងនឹងបញ្ជូនឱ្យពួកគេ នូវសម្ភារៈយោធាទំនើបៗជាច្រើន។ ពួកគេនឹងបង់ប្រាក់ឱ្យយើង ១០០ភាគរយ ហើយនោះជារបៀបដែលយើងចង់បាន»។

គួរបញ្ជាក់ថា លោក ត្រាំ មិនបានបញ្ជាក់អំពីចំនួនប្រព័ន្ធការពារមីស៉ីល Patriots ដែលគ្រោងបញ្ជូនទៅអ៊ុយក្រែននោះទេ ប៉ុន្តែបាននិយាយថា សហរដ្ឋអាមេរិក នឹងទទួលបានសំណងវិញ សម្រាប់ការចំណាយរបស់ខ្លួនលើសហភាពអឺរ៉ុប (EU)៕