(ញូវដែលី)៖ នៅរសៀលថ្ងៃព្រហស្បតិ៍ ទី១២ ខែមិថុនានេះ យន្តហោះមួយគ្រឿងរបស់ក្រុមហ៊ុនអាកាសចរណ៍ Air India បានធ្លាក់នៅក្បែរអាកាសយានដ្ឋាន ក្នុងទីក្រុង Ahmedabad ភាគខាងលិចប្រទេសឥណ្ឌា។ នេះបើតាមការចេញផ្សាយដោយទីភ្នាក់ងារព័ត៌មាន Reuters។
ខាងអាកាសចរណ៍ Air India និងប៉ូលិសឥណ្ឌា បានឱ្យដឹងថា យន្តហោះដែលជួបគ្រោះថ្នាក់ មានផ្ទុកមនុស្សសរុបរហូតដល់២៤២នាក់។ យន្តហោះនោះ មានគោលដៅឆ្ពោះទៅកាន់អាកាសយានដ្ឋាន Gatwick នៃទីក្រុងឡុងដ៍របស់ចក្រភពអង់គ្លេស ហើយបានធ្លាក់នៅចំតំបន់ស៉ីវិល ក្បែរអាកាសយានដ្ឋាន Ahmedabad។
ខាងក្រោមនេះជាព័ត៌មានបឋមពីគ្រោះថ្នាក់ធ្លាក់យន្ដហោះនេះ៖
* តើយន្ដហោះធ្លាក់នៅកន្លែងណា?
យន្ដហោះដឹកអ្នកដំណើរប្រភេទ Boeing 787-8 Dreamliner មានជើងហោះហើរ AI171 បានហោះចេញពីអាកាសយានដ្ឋាន ក្នុងទីក្រុង Ahmedabad នៅម៉ោងប្រហែល១នាទីរសៀលថ្ងៃព្រហស្បតិ៍។ យន្ដហោះនេះ បានធ្លាក់នៅពេលហោះឡើងចេញពីអាកាសយានដ្ឋាន។ វីដេអូចេញផ្សាយដោយប្រព័ន្ធផ្សព្វផ្សាយឥណ្ឌា បានបង្ហាញថាយន្ដហោះបានហោះពីលើផ្ទះប្រជាជន និងបន្តិចក្រោយមក ស្រាប់តែបាត់ចេញពីស្រ្គីន ហើយគេក៏ឃើញភ្លើងឆេះ និងមានផ្សែងហ៊ុយពេញមេឃ។ លោក Faiz Ahmed Kidwai ជាអគ្គនាយកនៃនាយកដ្ឋានអាកាសចរណ៍ស៊ីវិលឥណ្ឌា បានប្រាប់ទីភ្នាក់ងារសារព័ត៌មាន Associated Press ថាយន្ដហោះនេះបានធ្លាក់លើតំបន់ ទីប្រជុំមួយកន្លែងក្នុងតំបន់ Meghani Nagar ៥នាទីក្រោយហោះឡើង។ លោក Kidwai បន្ថែមថាយន្ដហោះមានជើងហោះហើរលេខ AI171 មានផ្ទុកអ្នកដំណើរយ៉ាងហោច ២៤២នាក់ និងក្រុមការងារលើយន្ដហោះ ១២នាក់។ ភ្លាមៗនេះ ភ្នាក់ងារពន្លត់អគ្គិភ័យ រថយន្តពេទ្យ និងក្រុមជួយសង្រ្គោះ កំពុងត្រូវបានដាក់ពង្រាយទៅកាន់កន្លែងធ្លាក់យន្តហោះ។
បើតាមគេហទំព័រ Flightrader យន្ដហោះដឹកអ្នកដំណើរខាងលើបានហោះនៅរយៈកម្ពស់ជិត ២០០ម៉ែត្រ។ ដោយឡែក បើប្រព័ន្ធគ្រប់គ្រងអាកាសចរណ៍នៅឯអាកាសយានដ្ឋាន Ahmedabad យន្ដហោះបានចាកចេញពី ព្រលានយន្ដហោះនៅម៉ោង ១៖៣៩នាទីរសៀល (ម៉ោងនៅឥណ្ឌា) ដោយហោះចេញពីផ្លូវរត់លេខ២៣។ យន្ដហោះនេះដំបូងឡើយបានស្នើសុំជំនួយបន្ទាន់ តែមិនមានការឆ្លើយតបមកវិញចេញពីយន្ដហោះនេះនោះទេ។
* តើគេដឹងអ្វីខ្លះពីមនុស្សនៅលើយន្ដហោះ?
ប្រភពមួយបានប្រាប់ទីភ្នាក់ងារសារព័ត៌មាន Reuters ថាក្នុងចំណោមអ្នកដំណើរទាំង ២៤២នាក់ មានមនុស្សពេញវ័យ ២១៧នាក់ និងក្មេង ១១នាក់ ហើយក្នុងចំណោមអ្នកទាំងនេះទៀតសោត មាន១៦៩នាក់ ជាជនជាតិឥណ្ឌា ជនជាតិអង់គ្លេស ៥៣នាក់ ព័រទុយហ្កាល់ ៧នាក់ និងកាណាដាម្នាក់។ សម្រាប់តួលេខផ្លូវការ នៃអ្នករងគ្រោះថ្នាក់ស្លាប់ និងរបួសនៅមិនទាន់ដឹងច្បាស់នៅឡើយទេ ប៉ុន្តែគេឃើញមានមនុស្ស ត្រូវបានសែងទៅដាក់ក្នុងរថយន្តសង្រ្គោះ។ ភ្លាមៗ មូលហេតុដែលបណ្ដាលឱ្យយន្ដហោះនេះធ្លាក់មិនទាន់មានការបញ្ជាក់នៅឡើយទេ៕
