(ប៉េកាំង)៖ ថ្ងៃទី ៨ ខែឧសភា តាមម៉ោងក្នុងតំបន់ លោក Xi Jinping ប្រធានរដ្ឋចិននិងលោក Putin ប្រធានាធិបតីរុស្ស៊ីបានរួមគ្នាជួបជាមួយអ្នកសារព័ត៌មាន។
លោក Xi Jinping បានលើកឡើងថា ខ្ញុំបានធ្វើកិច្ចពិភាក្សាការងារប្រកបដោយមិត្តភាពយ៉ាងស៊ីជម្រៅជាមួយលោក Putin ប្រធានាធិបតីរុស្ស៊ី ព្រមទាំងទទួលបានលទ្ធផលជាផ្លែផ្កា ដោយបានឈានដល់គំនិតឯកភាពរួមសំខាន់ៗថ្មីៗជាច្រើន ។ យើងបានរួមគ្នាចុះហត្ថលេខាលើ «សេចក្តីថ្លែងការណ៍រួម ស្តីពីការធ្វើឱ្យស៊ីជម្រៅថែមមួយកម្រិតទៀត នូវទំនាក់ទំនងភាពជាដៃគូសហការ និងសម្របសម្រួលជាយុទ្ធសាស្រ្តគ្រប់ជ្រុងជ្រោយ ក្នុងយុគសម័យថ្មី រវាងសាធារណរដ្ឋប្រជាមានិតចិន និងសហព័ន្ធរុស្ស៊ីក្នុងឱកាសរំលឹកខួប៨០ឆ្នាំ នៃថ្ងៃជ័យជម្នះរបស់ប្រជាជនចិន ក្នុងសង្រ្គាមប្រឆាំងនឹង ការឈ្លានពានរបស់ជប៉ុន ក្នុងសង្រ្គាមស្នេហាជាតិដ៏អស្ចារ្យរបស់សហភាពសូវៀត ក៏ដូចជាការបង្កើតអង្គការសហប្រជាជាតិ»។
ប្រមុខរដ្ឋនៃប្រទេសទាំងពីរបានធ្វើជាសក្ខីភាព នៃការផ្លាស់ប្តូរឯកសារសហប្រតិបត្តិការរវាងក្រសួងពាក់ព័ន្ធនៃប្រទេសទាំងពីរ បានបំពេញបន្ថែមកម្លាំងចលករថ្មីដល់ការអភិវឌ្ឍទំនាក់ទំនង រវាងចិននិងរុស្ស៊ី។ លោកបានបន្តថា យើងគួរប្រកាន់ខ្ជាប់ នូវមិត្តភាពជាយូរអង្វែង ធ្វើជាមិត្តដែកថែប មិត្តពិតប្រាកដ គួរប្រកាន់ខ្ជាប់នូវ ការផ្តល់ផលប្រយោជន៍ដល់គ្នាទៅវិញទៅមក និងឈ្នះ-ឈ្នះ ធ្វើជាដៃគូល្អ គួរប្រកាន់ខ្ជាប់នូវសច្ចយុត្តិធម៌ ធ្វើជាអ្នកគាំពារសណ្តាប់ធ្នាប់អន្តរជាតិ គួរជួយគ្នាទៅវិញទៅមក ធ្វើជាអ្នកដឹកនាំអភិបាលកិច្ចសកល។
លោក Xi Jinping បានសង្កត់ធ្ងន់ថា ប្រឈមមុខនឹងស្ថានការណ៍អន្តរជាតិដ៏ច្របូកច្របល់ ប្រទេសទាំងពីរចិននិងរុស្ស៊ី គួរប្រកាន់ខ្ជាប់នូវស្មារតីធ្វើជាប្រទេសជិតខាងដ៏ល្អជារៀងរហូត ធ្វើកិច្ចសហការនិងសម្របសម្រួលជាយុទ្ធសាស្រ្តគ្រប់ជ្រុងជ្រោយ និងកិច្ចសហប្រតិបត្តិការដែលផ្តល់ផលប្រយោជន៍ដល់គ្នាទៅវិញទៅមកនិងឈ្នះ-ឈ្នះ លើកកម្ពស់ទំនាក់ទំនងរវាងចិននិងរុស្ស៊ី ដោយគ្រប់ជ្រុងជ្រោយ ដើម្បីបំពេញបន្ថែមភាពប្រាកដប្រជាកាន់តែច្រើន ដល់សន្តិភាពនិងសន្តិសុខពិភពលោក ក៏ដូចជាផ្តល់កម្លាំងចលករកាន់តែខ្លាំងដល់ការអភិវឌ្ឍ និងវិបុលភាពសកល៕
វិទ្យុមិត្តភាពកម្ពុជាចិន