(មូស្គូ)៖ កងកម្លាំងយុទ្ធសាស្រ្តមីស៊ីលនៃប្រទេសរុស្ស៊ី បានធ្វើការបាញ់មីស៊ីលផ្លោងចំនួនមួយគ្រាប់ នៅថ្ងៃពុធម្សិលមិញនេះដែលត្រូវបានគេជឿជាក់ថា ជាការធ្វើតេស្តក្បាលគ្រាប់នុយក្លេអ៊ែរ​ដ៏ទំនើប​បំផុត ដែលមានសមត្ថភាពយកឈ្នះលើប្រព័ន្ធការពារមីស៊ីល របស់សហរដ្ឋអាមេរិកបាន។ នេះបើតាមការចេញផ្សាយ ដោយគេហទំព័រ Daily Mail របស់ចក្រភពអង់គ្លេសនៅមុននេះបន្តិច នាព្រឹក​ថ្ងៃព្រសហ្បតិ៍ ទី២៧ ខែតុលា ឆ្នាំ២០១៦។

គេហទំព័រស្តីអំពីវិស័យការពាររុស្ស៊ីឈ្មោះ Military Russia បានឲ្យដឹងថាការបាញ់មីស៊ីលផ្លោងខាងលើ គឺត្រូវបានធ្វើឡើងក្នុងន័យធ្វើការសាងល្បងសមត្ថភាព របស់ក្បាលគ្រាប់នុយ​ក្លេអ៊ែរ ដែលបច្ចុប្បន្នត្រូវបានគេ ស្គាល់ត្រឹមឈ្មោះសម្គាល់ដោយអ្នកអភិវឌ្ឍន៍របស់វាថា «Object 4202» ឬក៏ «Aerobaliistic Hypersonic Warhead» ហើយការធ្វើតេស្តនោះ​បានប្រព្រឹត្ត​ទៅដោយជោគជ័យ។

គួរបញ្ជាក់ដែរក្បាលគ្រាប់នុយក្លេអ៊ែរប្រភេទ HGV នេះអាចផ្លាស់ប្តូរទិសដៅរបស់វាបានអំឡុងពេលដែលវា ឆ្ពោះទៅកាន់គោលដៅជាមួយនិងល្បឿនលឿនដ៏លឿនបំផុត ដែលប្រការនេះនឹងធ្វើ​ឲ្យប្រព័ន្ធការពារមីស៊ីល មានភាពលំបាកជាខ្លាំងក្នុងចាប់ស្ទាក់។ ម៉្យាងវិញទៀតក្បាលគ្រាប់នុយក្លេអ៊ែរដ៏ទំនើបនេះ នឹងត្រូវប្រើប្រាស់ ជាមួយនិងគ្រាប់មីស៊ីល-នុយក្លេអ៊ែរស៊េរីថ្មីរបស់រុស្ស៊ី ដែល​មានសមត្ថភាពក្នុងការកម្ទេចប្រទេសបារាំង ឬអង់គ្លេសចេញពីផែនទីពិភពលោកបាន៕