(ឡុងដ៏)៖ រដ្ឋមន្រ្តីការបរទេសអង់គ្លេស លោក David Cameron បាននិយាយនៅថ្ងៃអង្គារសប្តាហ៍នេះថា ចក្រភពអង់គ្លេស នឹងមិនបញ្ឈប់ការលក់អាវុធទៅឱ្យអ៉ីស្រាអែលឡើយ ដោយសារតែមានយោបល់ពីក្រុមហ៊ុនអង់គ្លេស ដែលបានពិនិត្យដំណើរការផ្លូវច្បាប់លើបញ្ហានោះឡើងវិញ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី១០ ខែមេសា ឆ្នាំ ២០២៤។

អង់គ្លេស បានផ្គត់ផ្គង់អាវុធគិតជាទឹកប្រាក់ចំនួន ៤២លានផោន ឬស្មើនឹង ៥៣លានដុល្លារដល់អ៉ីស្រាអែល ក្នុងឆ្នាំ ២០២២។ ថ្លែងក្នុងសន្និសីទសារព័ត៌មានរួមជាមួយរដ្ឋមន្រ្តីការបរទេអាមេរិក លោក Antony Blinken នៅឯទីក្រុងវ៉ាស៉ីនតោន លោក Cameron បានបញ្ជាក់ថា «ការវាយតម្លៃថ្មីចុងក្រោយ ផ្តល់លទ្ធភាពឱ្យយើងបន្តអាជ្ញាប័ណ្ណនាំចេញ ដោយគ្មានការផ្លាស់ប្តូរ។ ការណ៍នេះគឺស្របគ្នាជាមួយដំបូន្មានដែលខ្ញុំ និងរដ្ឋមន្ត្រីផ្សេងទៀតបានទទួល។ ហើយដូចដែលធ្លាប់បានធ្វើកន្លងមក យើងនៅតែទុកលទ្ធភាពនេះ ឱ្យស្ថិតនៅក្រោមការពិនិត្យឡើងវិញ»។

គួរបញ្ជាក់ថា កាលពីសប្តាហ៍មុន អតីតចៅក្រមជាន់ខ្ពស់របស់ចក្រភពអង់គ្លេស ៣នាក់ បានចូលរួមជាមួយសមាជិកជាង ៦០០នាក់នៃក្រុមអ្នកច្បាប់នៅអង់គ្លេស ធ្វើការអំពាវនាវដល់រដ្ឋាភិបាល ឱ្យបញ្ឈប់ការលក់អាវុធទៅឱ្យអ៉ីស្រាអែល ដោយនិយាយថា វាអាចធ្វើឱ្យអង់គ្លេសចូលទៅពាក់ព័ន្ធដោយប្រយោល ក្នុងអំពើប្រល័យពូជសាសន៍នៅក្នុងសង្រ្គាមហ្គាហ្សា៕