(មូស្គូ)៖ រុស្ស៉ី កាលពីថ្ងៃសុក្រ ទី២៩ ខែមីនា បាននិយាយថាមហាអំណាចធំៗទាំងអស់ចាំបាច់ត្រូវតែមានយុទ្ធសាស្ត្រថ្មី ដើម្បីដោះស្រាយជាមួយកូរ៉េខាងជើង ហើយ បានចោទប្រកាន់សហរដ្ឋអាមេរិក និងសម្ព័ន្ធមិត្តរបស់ខ្លួន កំពុងបង្កើនភាពតានតឹងយោធាក្នុងតំបន់អាស៊ី និងព្យាយាមគាបសង្កត់លើកូរ៉េខាងជើង។ នេះបើតាមការចេញផ្សាយ ដោយទីភ្នាក់ងារសារព័ត៌មាន Reuters។
រុស្ស៉ី កាលពីថ្ងៃព្រហស្បតិ៍ ទី២៨ ខែមីនា បានបោះឆ្នោតវេតូរាំងខ្ទប់ការផ្ដល់អាណត្តិថ្មីដល់គណៈកម្មាធិការនៃក្រុមអ្នកជំនាញ UN ដែលតាមដានលើការអនុវត្តការដាក់ទណ្ឌកម្ម របស់អង្គការសហប្រជាជាតិប្រឆាំងនឹងកូរ៉េខាងជើង ពាក់ព័ន្ធនឹងការអភិវឌ្ឍកម្មវិធីអាវុធនុយក្លេអ៊ែរ និងមីស៊ីលបាលិស្ទីគ។ ក្នុងការបោះឆ្នោតនៅឯ ក្រុមប្រឹក្សាសន្តិសុខ អង្គការសហប្រជាជាតិ កាលពីថ្ងៃព្រហស្បតិ៍ ចិនបានបោះឆ្នោតអនុបវាទ ខណៈប្រទេសជាសមាជិកក្រុមប្រឹក្សាសន្តិសុខ១៣ ផ្សេងទៀតបានបោះឆ្នោតគាំទ្រលើការផ្ដល់ អាណត្តិជាថ្មីដល់គណៈកម្មាធិការនៃក្រុមអ្នកជំនាញ UN តាមដានលើការអនុវត្តការដាក់ទណ្ឌកម្មប្រឆាំងនឹងកូរ៉េខាងជើង។ អាណត្តិនៃគណៈកម្មាធិការនេះនឹងត្រូវ អស់សុពលភាពនៅចុងខែមេសាខាងមុខនេះ។ កូរ៉េខាងជើងបានជាប់ទណ្ឌកម្មចាប់តាំងពីឆ្នាំ២០០៦មកម្ល៉េះ បន្ទាប់ពីការធ្វើតេស្ដអាវុធនុយក្លេអ៊ែរជាលើកដំបូង។
ឆ្លើយតបទៅនឹងការរិះគន់ជុំវិញការបោះឆ្នោតវេតូរបស់ទីក្រុងមូស្គូ អ្នកនាំពាក្យក្រសួងការបរទេសរុស្ស៉ី លោកស្រី Maria Zakharova បានលើកឡើងថា ក្រុមប្រឹក្សាសន្តិសុខ មិនអាចប្រើប្រាស់វិធីសាស្ត្រចាស់ ដើម្បីដោះស្រាយបញ្ហានៅលើឧបទ្វីបកូរ៉េ តទៅទៀតបាននោះទេ។ តែព្រមពេលជាមួយគ្នា អ្នកនាំពាក្យរូបនេះបានឆ្លៀតរិះគន់សហរដ្ឋអាមេរិក ថាកំពុងបង្កើនភាពតានតឹងយោធា ហើយថាទណ្ឌកម្មមិនបានធ្វើឱ្យស្ថានការណ៍មានភាពល្អប្រសើរនោះទេ ផ្ទុយទៅវិញបែរជាបង្កឱ្យមានវិបត្តិមនុស្សធម៌សម្រាប់ ប្រជាជនកូរ៉េខាងជើង។
គួរបញ្ជាក់ថា ការបោះឆ្នោតវេតូរបស់រុស្ស៉ី កើតមានឡើងតែប៉ុន្មានសប្ដាហ៍ប៉ុណ្ណោះ បន្ទាប់ពីគណៈកម្មាធិការ UN បាននិយាយថាខ្លួនកំពុងបើកការស៊ើបអង្កេតលើសេចក្ដីរាយការណ៍ ពីការផ្ទេរអាវុធរវាងទីក្រុងមូស្គូ និងទីក្រុងព្យុងយ៉ាង។ សហរដ្ឋអាមេរិកបានចោទប្រកាន់ថាកូរ៉េខាងជើងបានបញ្ជូនអាវុធទៅឱ្យរុស្ស៉ី សម្រាប់ប្រើប្រាស់នៅក្នុងសង្រ្គាមប្រឆាំង អ៊ុយក្រែន។ ទាំងទីក្រុងមូស្គូ និងព្យុងយ៉ាងបានច្រានចោលការចោទប្រកាន់បែបនេះ តែការបោះឆ្នោតវេតូរបស់រុស្ស៉ី បានបង្ហាញយ៉ាងច្បាស់ពីការខិតកាន់តែកៀករបស់លោក គីម ជុងអ៊ុន ទៅរកលោក វ្ល៉ាឌីមៀ ពូទីន៕
