(ញូវយ៉ក)៖ ក្រុមប្រឹក្សាសន្តិសុខ នៃអង្គការសហប្រជាជាតិ នៅថ្ងៃចន្ទសប្តាហ៍នេះ បានអំពាវនាវឱ្យមានបទឈប់បាញ់ជាបន្ទាន់មួយរវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីនហាម៉ាស់ និងការដោះលែងចំណាប់ខ្មាំងទាំងអស់ជាបន្ទាន់ និងដោយគ្មានលក្ខខណ្ឌ បន្ទាប់ពីសហរដ្ឋអាមេរិកបានបោះឆ្នោតអនុប្បវាទ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី២៥ ខែមីនា ឆ្នាំ២០២៤។
សមាជិកក្រុមប្រឹក្សាចំនួន១៤រូប ដែលនៅសេសសល់បានបោះឆ្នោតគាំទ្រសេចក្តីសម្រេចនេះ ដែលត្រូវបានស្នើឡើងដោយសមាជិកជាប់ឆ្នោតទាំង ១០ រូប។
ក្នុងសង្រ្គាមជិត ៦ ខែនៅតំបន់ហ្គាហ្សាស្ទ្រីប ទីក្រុងវ៉ាស៊ីនតោនបានប្រឆាំងនឹងពាក្យឈប់បាញ់ និងបានប្រើអំណាចវេតូដើម្បីការពារសម្ព័ន្ធមិត្តរបស់ខ្លួន អ៊ីស្រាអែល ក្នុងការសងសឹកចំពោះការវាយប្រហារកាលពីថ្ងៃទី ៧ ខែតុលា ដោយក្រុមហាម៉ាសដែលអ៊ីស្រាអែលបាននិយាយថា បានសម្លាប់មនុស្ស ១,២០០នាក់។
ប៉ុន្តែចំពេលមានការកើនឡើងសម្ពាធជាសកល សម្រាប់បទឈប់បាញ់នៅក្នុងសង្រ្គាមដែលបានសម្លាប់ប្រជាជនប៉ាឡេស្ទីនជាង ៣២,០០០ នាក់នោះ សហរដ្ឋអាមេរិកបានអនុប្បវាទក្នុងការបោះឆ្នោតកាលពីថ្ងៃចន្ទសប្តាហ៍នេះ ដើម្បីអនុញ្ញាតឱ្យក្រុមប្រឹក្សាសន្តិសុខទាមទារបទឈប់បាញ់ជាបន្ទាន់ ក្នុងអំឡុងពេលខែដ៏ពិសិដ្ឋរបស់មូស្លីមនៃបុណ្យរ៉ាម៉ាដន ដែលនឹងបិទបញ្ចប់នៅពីរសប្តាហ៍ទៀត។
វាក៏ទាមទារឱ្យមានការដោះលែងចំណាប់ខ្មាំងទាំងអស់ជាបន្ទាន់ និងដោយគ្មានលក្ខខណ្ឌផងដែរ។ អ៊ីស្រាអែលនិយាយថា ក្រុមហាម៉ាសបានចាប់ចំណាប់ខ្មាំង២៥៣នាក់ក្នុងការវាយប្រហារថ្ងៃទី៧ តុលា។
សេចក្តីសម្រេចរបស់ក្រុមប្រឹក្សាសន្តិសុខក៏ «សង្កត់ធ្ងន់លើតម្រូវការជាបន្ទាន់ក្នុងការពង្រីកជំនួយមនុស្សធម៌នៅទូទាំងតំបន់ហ្គាហ្សាស្ទ្រីប និងពង្រឹងការការពារជនស៊ីវិល ហើយបញ្ជាក់ឡើងវិញ នូវការអំពាវនាវឱ្យដកចេញនូវរាល់ឧបសគ្គ ចំពោះការផ្តល់ជំនួយមនុស្សធម៌ទ្រង់ទ្រាយធំផងដែរ»។
វិទ្យុកងទ័ពអ៊ីស្រាអែលបានរាយការណ៍ភ្លាមៗ មុនពេលចាប់ផ្តើមកិច្ចប្រជុំក្រុមប្រឹក្សាសន្តិសុខនេះថា នាយករដ្ឋមន្ត្រីអ៊ីស្រាអែល Benjamin Netanyahu នឹងលុបចោលគណៈប្រតិភូដែលបានគ្រោងទុកទៅកាន់ទីក្រុងវ៉ាស៊ីនតោន ប្រសិនបើសហរដ្ឋអាមេរិកមិនបោះឆ្នោតវេតូ ចំពោះដំណោះស្រាយនេះ។
សហរដ្ឋអាមេរិកបានប្រើអំណាចវេតូលើដំណោះស្រាយចំនួន ៣ លើកមកហើយ របស់ក្រុមប្រឹក្សាសន្តិសុខស្តីពីសង្រ្គាមនៅហ្គាហ្សា ហើយក៏បានអនុប្បវាទពីរដងផងដែរ ដោយអនុញ្ញាតឱ្យក្រុមប្រឹក្សាសន្តិសុខ អនុម័តដំណោះស្រាយដែលមានគោលបំណងបង្កើនជំនួយដល់ហ្គាហ្សា និងអំពាវនាវឱ្យមានការពន្យារពេលបទឈប់បាញ់។
រុស្សី និងចិនក៏បានវេតូលើដំណោះស្រាយដែលស្នើឡើងដោយសហរដ្ឋអាមេរិកចំនួនពីរផងដែរ កាលពីខែតុលា និងនៅថ្ងៃសុក្រកន្លងទៅនេះ៕
