(វ៉ាស៊ីនតោន)៖ តុលាការកំពូលអាមេរិក កាលពីថ្ងៃចន្ទ ទី៤ ខែមីនា (ម៉ោងនៅវ៉ាស៊ីនតោន) បានសម្រេចជាឯកច្ឆន្ទឱ្យលោក ដូណាល់ ត្រាំ អាចឈរឈ្មោះក្នុងការបោះឆ្នោតបឋម ឬការបោះឆ្នោតជ្រើសរើសបេក្ខជនប្រធានាធិបតីអាមេរិកតំណាងឱ្យគណបក្សសាធារណរដ្ឋ ដោយលុបចោលការសម្រេចរបស់តុលាការកំពូលក្នុងរដ្ឋ Colorado ដែលបានហាម អតីតប្រធានាធិបតីអាមេរិករូបនេះឈរឈ្មោះ ដោយសារមានជាប់ពាក់ព័ន្ធនឹងកុបកម្មនៅឯវិមាន Capitol កាលពីឆ្នាំ២០២១។ នេះបើតាមការចេញផ្សាយដោយទីភ្នាក់ងារ សារព័ត៌មាន AFP។

ការសម្រេចរបស់តុលាការកំពូលអាមេរិក ធ្វើឡើងក្នុងសំឡេងគាំទ្រ ៩ ទល់នឹង០ នៅក្នុងចំណោមចៅក្រមទាំង៩រូប ដែលក្នុងនោះមានចៅក្រម៣រូបត្រូវបានលោក ត្រាំ តែងតាំង ដោយផ្ទាល់ដៃ។ ការសម្រេចចិត្តនេះដែរកើតមានឡើងតែមួយថ្ងៃប៉ុណ្ណោះ មុននឹងថ្ងៃបោះឆ្នោតបឋម «Super Tuesday» ដែលរដ្ឋជាច្រើនត្រូវរៀបចំការបោះឆ្នោតបឋមក្នុងថ្ងៃ តែមួយនៅថ្ងៃអង្គារសប្ដាហ៍នេះ។ តាមតុលាការកំពូលអាមេរិក បណ្ដារដ្ឋរបស់សហរដ្ឋអាមេរិកមិនអាចប្រើប្រាស់ច្បាប់វិសោធនកម្មទី១៤ នៃរដ្ឋធម្មនុញ្ញអាមេរិក ដើម្បីរារាំង ឬក៏ជម្រុះ បេក្ខជនប្រធានាធិបតីណាម្នាក់ចេញពីសន្លឹកឆ្នោតបាននោះទេ ហើយមានតែសភាទាំង២របស់សហរដ្ឋអាមេរិកតែប៉ុណ្ណោះដែលមានអំណាចធ្វើបែបនេះ។

ក្រោយការសម្រេចចិត្តរបស់តុលាការកំពូលអាមេរិក លោក ដូណាល់ ត្រាំ បានបង្ហោះសារមួយលើបណ្ដាញទំនាក់ទំនងសង្គមរបស់លោកដោយនិយាយថា «វាគឺជាជ័យជម្នះដ៏ធំធេង សម្រាប់សហរដ្ឋអាមេរិក»។

គួរបញ្ជាក់ថា ក្រៅពីរដ្ឋ Colorado រដ្ឋ Illinois និងរដ្ឋ Maine ក៏បានសម្រេចហាមលោក ដូណាល់ ត្រាំ មិនឱ្យឈរឈ្មោះក្នុងការបោះឆ្នោតបឋមក្នុងរដ្ឋរបស់ពួកគេផងដែរ ដោយ សំអាងថាលោក ត្រាំ បានបំពានច្បាប់វិសោធនកម្មទី១៤ នៃរដ្ឋធម្មនុញ្ញអាមេរិក ពាក់ព័ន្ធនឹងកុបកម្មនៅឯវិមាន Capitol កាលពីថ្ងៃទី៦ ខែមករា ឆ្នាំ២០២១ ដែលត្រូវបានរដ្ឋទាំង នេះចាត់ទុកថាជាសកម្មភាពបះបោរ។

ប៉ុន្តែ ការសម្រេចចិត្តរបស់រដ្ឋ Illinois និងរដ្ឋ Maine ត្រូវបានព្យួរ ដោយរង់ចាំសេចក្ដីសម្រេចរបស់តុលាការកំពូលអាមេរិកលើករណីរបស់រដ្ឋ Colorado។ នេះបានន័យថាលោក ត្រាំ អាចបន្តឈរឈ្មោះជាបេក្ខជនប្រធានាធិបតីក្នុងការបោះឆ្នោតបឋមនៅរដ្ឋទាំង២នេះ ហើយវាក៏ជាការដកចោលនូវរនាំងឧបសគ្គមួយ បើកផ្លូវឱ្យលោក ត្រាំ ឆ្ពោះកាន់តែកៀកទៅរក ការតែងតាំងជាបេក្ខជនប្រធានាធិបតីតំណាងឱ្យគណបក្សសាធារណរដ្ឋ ស្របពេលមានការរំពឹងជាច្រើនថារូបលោកអាចនឹងត្រូវតទល់សាជាថ្មីមួយលោក ចូ បៃដិន ក្នុងការបោះឆ្នោត ប្រធានាធិបតីអាមេរិក នៅខែវិច្ឆិកា ឆ្នាំ២០២៤៕

រូបភាពពី AFP