(ឡុងដ៍)៖ នាយករដ្ឋមន្ត្រីអង់គ្លេស លោក Rishi Sunak បានលើកឡើងនៅថ្ងៃចន្ទនេះថា ផែនការរបស់លោកក្នុងការបញ្ឈប់ជនចំណាកស្រុកដែលមកដល់តាមទូកតូចៗ បានកាត់បន្ថយការឆ្លងព្រំដែនខុសច្បាប់ចំនួន ២០% ដែលជាដំណឹងមួយដែលលោកសង្ឃឹមថា នឹងបន្ធូរបន្ថយដល់ការរិះគន់ពីគណបក្សរបស់លោក និងនៅក្នុងប្រទេសជុំវិញគោលនយោបាយអន្តោប្រវេសន៍។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃចន្ទ ទី០៥ ខែមិថុនា ឆ្នាំ២០២៣។
លោក Sunak ដែលត្រូវបានគេរំពឹងថា នឹងដឹកនាំគណបក្សអភិរក្សដែលកំពុងកាន់អំណាចទៅកាន់ការបោះឆ្នោតជាតិឆ្នាំ២០២៤ បានសន្យាថា នឹង «បញ្ឈប់ទូក» ពីការឆ្លងកាត់ច្រកសមុទ្រអង់គ្លេស នៅពេលលោកឡើងកាន់អំណាចនៅខែតុលា ឆ្នាំ ២០២២ ដែលជាការសន្យាមួយក្នុងចំណោមការសន្យាចំនួនប្រាំរបស់គាត់។
លោក Sunak បានប្រាប់សន្និសីទសារព័ត៌មានមួយនៅថ្ងៃចន្ទនេះយ៉ាងដូច្នេះថា «ក្នុងរយៈពេលប្រាំខែចាប់តាំងពីខ្ញុំបានដាក់ដំណើរការគម្រោងនេះ ការឆ្លងកាត់ព្រំដែនឥឡូវបានធ្លាក់ចុះ ២០ភាគរយធៀបនឹងឆ្នាំមុន»។
លោកបានថ្លែងថា «ផែនការនេះកំពុងដំណើរការ» ដោយបន្ថែមថា រដ្ឋាភិបាលរបស់លោកនឹងមិនមានការរអ៊ូរទាំទេ ហើយនឹងធ្វើការដើម្បីធានាថាច្បាប់ថ្មីត្រូវបានអនុម័តដោយសភា»។
គណបក្សពលករដែលជាបក្សប្រឆាំងបាននិយាយថា លោក Sunak បានបរាជ័យក្នុងការលុបចោលការទាមទារសិទ្ធិជ្រកកោនរាប់ម៉ឺននាក់ ដោយមានមនុស្សចំនួន ៧,៦០០នាក់បានឆ្លងកាត់ច្រកសមុទ្ឬរហូតមកដល់ពេលនេះ ដែលជាតួលេខមួយទំនងជាកើនឡើងនៅរដូវក្តៅខាងមុខ៕
