(តូក្យូ)៖ នាយករដ្ឋមន្រ្តីជប៉ុន លោក ហ្វូមីអុ គីស៉ីដា (Fumio Kishida) នាថ្ងៃសៅរ៍នេះ បាននិយាយថា រូបលោកស្ម័គ្រចិត្តជួបជាមួយ ប្រមុខដឹកនាំកំពូលនៃប្រទេសកូរ៉េខាងជើង គឺលោក គីម ជុងអ៊ុន ដើម្បីព្យាយាមដោះស្រាយបញ្ហា ពលរដ្ឋជប៉ុនដែលត្រូវបានចាប់ជំរិត កាលពីអំលុងទសវត្សរ៍ឆ្នាំ១៩៦០ និងទសវត្សរ៍ឆ្នាំ១៩៧០។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសៅរ៍ ទី២៧ ខែឧសភា ឆ្នាំ២០២៣។
ប្រព័ន្ធផ្សព្វផ្សាយក្នុងស្រុករបសជប៉ុន ដូចជា Mainichi Shimbun, Nikkei និង Kyodo សុទ្ធតែបានរាយការណ៍ថា កំលុងព្រឹត្តិការណ៍ជួបជុំមួយនៅទីក្រុងតូក្យូ ស្តីពីប្រធានបទបញ្ហាចាប់ជំរិតខាងលើ លោកនាយករដ្ឋមន្រ្តីជប៉ុន បានលើកឡើងយ៉ាងដូច្នេះថា «ខ្ញុំមានឆន្ទៈជួបមុខលោក គីម ជុងអ៊ុន ដោយផ្ទាល់ ហើយដោយពុំមានបុរេលក្ខខណ្ឌអ្វីទាំងអស់»។
គួរបញ្ជាក់ថា នៅឆ្នាំ២០០២ ទីក្រុងព្យុងយ៉ាងធ្លាប់បានសារភាពចំពោះ ការចាប់ជំរិតពលរដ្ឋជប៉ុនចំនួន១៣នាក់ កាលពីអំលុងប៉ុន្មានទសវត្សរ៍មុនពេលនោះ។ ជនរងគ្រោះ៥នាក់ ហើយនិងគ្រួសាររបស់ពួកគេ ក្រោយមកក៏បានវិលត្រឡប់មកកាន់ប្រទេសជប៉ុនវិញ ដោយនិយាយថា អ្នកដទៃទៀតគឺបានបាត់បង់ជីវិតអស់ហើយ។ យ៉ាងណាមិញ រដ្ឋាភិបាលទីក្រុងតូក្យូជឿជាក់ថា ពលរដ្ឋជប៉ុនសរុប១៧នាក់ ត្រូវបានគេចាប់ជំរិតនៅកូរ៉េខាងជើង ហើយនៅតែបន្តការស៉ើបអង្កេត ជុំវិញជោគវាសនារបស់អ្នកដែលមិនបានត្រឡប់ មកកាន់ប្រទេសរបស់ខ្លួនវិញ៕