(ឡុងដ៍)៖ ប្រធានាធិបតីរុស្ស៉ី លោក វ្ល៉ាឌីមៀ ពូទីន បាននិយាយថានឹងមិនមាននរណាម្នាក់អាចឈ្នះនៅក្នុងសង្រ្គាមនុយក្លេអ៊ែរឡើយ ហើយសង្រ្គាម របៀបនេះ ក៏មិនគួរឱ្យវាកើតឡើងនោះដែរ ខណៈរូបលោកផ្ទាល់តែងតែប្រើអាវុធនុយក្លេអ៊ែរ ដើម្បីកំញើញកុំឱ្យប្រទេសដទៃធ្វើអន្តរាគមន៍យោធា ជួយអ៊ុយក្រែន។ នេះបើតាមការដកស្រង់ផ្សាយពីទីភ្នាក់ងារសារព័ត៌មាន Reuters នៅថ្ងៃអង្គារ ទី២ ខែសីហា ឆ្នាំ២០២២។

លោក ពូទីន ធ្វើការកត់សម្គាល់ខាងលើ នៅក្នុងលិខិតមួយច្បាប់ទៅកាន់សន្និសីទស្ដីពីការមិនរីកសាយអាវុធនុយក្លេអ៊ែរនៅថ្ងៃចន្ទសប្ដាហ៍នេះ។ ក្នុង លិខិតនេះដដែល បុរសខ្លាំងរុស្ស៉ីរូបនេះបានគូសបញ្ជាក់ដូច្នេះថា «ជាការពិតណាស់ គ្មាននរណាម្នាក់អាចឈ្នះនៅក្នុងសង្រ្គាមនុយក្លេអ៊ែរឡើយ ហើយ ក៏មិនគួរឱ្យសង្រ្គាមបែបនេះកើតឡើងនោះដែរ។ យើងនឹងគាំទ្រសមភាព និងសន្តិសុខមិនអាចបំបែកបានសម្រាប់បណ្ដាប្រទេសទាំងអស់នៃសហគមន៍ អន្តរជាតិ»

គួរបញ្ជាក់ថា បើគេចាំមិនភ្លេចទេ នៅក្នុងសុន្ទរកថាប្រកាសបញ្ជូនកងទ័ពវាយសម្រុកចូលអ៊ុយក្រែន កាលពីចុងខែកុម្ភៈកន្លងទៅ លោក ពូទីន បានយក អាវុធនុយក្លេអ៊ែរមកសម្លុតគំរាមត្រង់ៗកុំឱ្យប្រទេសណាមួយធ្វើអន្តរាគមន៍យោធាចូលជួយអ៊ុយក្រែន ហើយនៅប៉ុន្មានថ្ងៃក្រោយមក លោកផ្ទាល់ បានបញ្ជាឱ្យកងកម្លាំងនុយក្លេអ៊ែររុស្ស៉ីស្ថិតនៅក្នុងលក្ខណៈប្រុងជើងការ ត្រៀមប្រយុទ្ធគ្រប់ពេលវេលាផងដែរ៕