(តូក្យូ)៖ នៅទីបំផុតប្រធានគណបក្សប្រជាធិបតេយ្យសេរី (LDP) ដែលកំពុងកាន់អំណាចនៅប្រទេសជប៉ុន លោក ហ្វ៊ូមីអុ គីហ្ស៊ីដា (Fumio Kishida) ត្រូវបានសភាជប៉ុនបោះឆ្នោតគាំទ្រជាផ្លូវការហើយ ក្នុងការឡើងកាន់តំណែងជានាយករដ្ឋមន្ត្រីថ្មី រសៀលថ្ងៃទី០៤ ខែតុលា ឆ្នាំ២០២១។

* តើលោក Fumio Kishida គឺជានរណា?

- លោក Kishida កើតនៅថ្ងៃទី២៩ ខែកញ្ញា ឆ្នាំ១៩៥៧ (អាយុ ៦៤ឆ្នាំ)
- មានឪពុកឈ្មោះ Fumitake Kishida និងម្តាយឈ្មោះ Sumiko Kishida
- មានជីតាឈ្មោះ Masaki Kishida
- ទាំងឪពុក និងជីតារបស់លោក សុទ្ធតែធ្លាប់ធ្វើជាសមាជិកសភាជប៉ុន
- បានបញ្ចប់រិញ្ញាបត្រផ្នែកច្បាប់នៅសាលា Waseda ទីក្រុងតូក្យូកាលពីឆ្នាំ១៩៨២
- មានភរិយាឈ្មោះ Yuko Kishida និងកូនបីនាក់ ក្នុងនោះកូនប្រុសម្នាក់ឈ្មោះ Shotaro អាយុ ៣០ឆ្នាំ កំពុងដើរតាមមាគ៌ានយោបាយដូចឪពុកដែរ
- ធ្លាប់កាន់តំណែងជារដ្ឋមន្ត្រីការបរទេស, រដ្ឋមន្ត្រីស្តីទីនៃក្រសួងការពារជាតិ និងតំណែងកំពូលៗមួយចំនួនទៀត នៅក្នុងជួររដ្ឋាភិបាល។

កាលពីឆ្នាំ២០២០ លោក Fumio Kishida បានចាញ់លោក ស៊ូហ្គា ក្នុងការប្រជែងយកតំណែងប្រធានគណបក្ស LDP ប៉ុន្តែលើកនេះក៏បានទទួលជោគជ័យដូចបំណង។ លោក Kishida គឺជាបេក្ខជនដំបូងគេ ដែលបានប្រកាសចូលរួមការប្រកួតដើម្បីធ្វើជាប្រធានបក្ស LDP លើកនេះ។

កន្លងមក លោក Kishida ធ្លាប់បានកាន់តួនាទីជា ប្រធានគោលនយោបាយរបស់គណបក្ស LDP និងជារដ្ឋមន្រ្តីការបរទេសជប៉ុន កាលពីចន្លោះឆ្នាំ២០១២-២០១៧ ដោយអំលុងរយៈពេលនោះ លោកបានចរចាកិច្ចព្រមព្រៀងផ្សេងៗរវាងប្រទេសរុស្ស៉ី និងជប៉ុន។ លោក Kishida ធ្លាប់ហៅកិច្ចប្រឹងប្រែងលុបបំបាត់អាវុធនុយក្លេអ៊ែរថាជា «ការងារប្រចាំជីវិតរបស់លោក» ហើយកាលពីឆ្នាំ២០១៦ លោកបាននាំលោក បារ៉ាក់ អូបាម៉ា ដែលកាលណោះជាប្រធានាធិបតីអាមេរិក មកកាន់ទីក្រុង Hiroshima ក្នុងដំណើរទស្សនកិច្ចជាប្រវត្តិសាស្រ្តថែមទៀតផង។

ដោយដើរតាមជំហានរបស់ឪពុក ក៏ដូចជាជីតាលោក លោក Kishida បានឈានជើងចូលឆាកនយោបាយ នៅឆ្នាំ១៩៩៣ បន្ទាប់ពីធ្លាប់បានធ្វើការងារ នៅធនាគារមួយកន្លែង ចំពេលដែលសេដ្ឋកិច្ចប្រទេសជប៉ុនបានស្ទុះឡើងខ្លាំង។ កន្លងមកលោកប្រកាន់គោលជំហរ ដើរតាមឪពុក និងជីតា ក្នុងនាមជាអ្នកនយោបាយ ដែលតែងស្តាប់មតិរបស់ប្រជាជន និងមានសប្បុរសធម៌។

ប៉ុន្តែការពិតជាក់ស្តែង លោក Kishida មិនដែលត្រូវបានគេមើលឃើញថា មានទំនាក់ទំនងជាមួយប្រជាជនច្រើនឡើយ ហើយលោកត្រូវគេរិះគន់យ៉ាងដំណំ ជុំវិញការបោះឆ្នោតរើសថ្នាក់ដឹកនាំកាលពីឆ្នាំមុន ជាពេលដែលលោកបានបង្ហោះរូបភាព គួរឱ្យភ្ញាក់ផ្អើលមួយសន្លឹកនៅលើបណ្តាញសង្គម Twitter ដែលបង្ហាញអំពីការញុំាអាហារពេលល្ងាចដ៏ថ្លៃ ជាមួយនិងភរិយា។

យ៉ាងណាក៏ដោយ សម្រាប់ឆ្នាំ២០២១នេះ លោក Fumio Kishida ត្រូវបានគណបក្សរបស់លោកគាំទ្រជាមេដឹកនាំហើយ។ លោកនឹងក្លាយជា «នាយករដ្ឋមន្ត្រីជប៉ុនទី ១០០» នៅពេលដែលសភាបើកសម័យប្រជុំវិសាមញ្ញ នៅថ្ងៃទី០៤ ខែតុលាខាងមុខនេះ។ ខណៈដែលអ្នកខ្លះរិះគន់រូបលោកថា ជាមនុស្សស្លូតបូតជ្រុល និងគួរឱ្យធុញទ្រាន់នោះ លោកត្រូវបានសមាជិកគណបក្សលោកផ្ទាល់មើលឃើញថា នឹងក្លាយជាមេដឹកនាំនាពេលអនាគត។ ចំណុចសំខាន់ដែលផ្ទុយពីលោក Kono នោះ គឺលោក Kishida មានអ្នកនយោបាយជើងចាស់ក្នុងបក្ស LDP ជាច្រើនរង់ចាំគាំទ្រ។

លោក Kishida បានសន្យាថា នឹងចំណាយប្រាក់រាប់ពាន់លានដុល្លារ ដើម្បីជួយប្រទេសសេដ្ឋកិច្ចធំបំផុតទី ៣ លើពិភពលោកមួយនេះ ឲ្យងើបឡើងវិញពីការរឹតត្បិតនានាដោយសារ COVID-19។ មិនដូចគូប្រជែងមួយទៀត គឺលោកស្រី Sanae Takaichi នោះឡើយ លោក Kishida បានរិះគន់គោលនយោបាយសេដ្ឋកិច្ចរបស់អតីតនាយករដ្ឋមន្ត្រី ស៊ីនហ្សូ អាបេ ដែលត្រូវបានគេស្គាល់ថា អាបេណូមិច (Abenomics) ព្រោះលោកគិតថា ជាគោលនយោបាយដែលធ្វើឲ្យអ្នកមានប៉ុណ្ណោះ កាន់តែមានឡើងថែមទៀត។

សម្រាប់តំណែងជាប្រធានបក្សកាន់អំណាច និងនាយករដ្ឋមន្ត្រីជប៉ុនថ្មីនេះ ពិតជាសំខាន់ខ្លាំងណាស់ ព្រោះលោក Fumio Kishida នឹងត្រូវដឹកនាំបក្សទាំងមូល ទៅដណ្តើមយកជ័យជម្នះជាថ្មី ក្នុងការបោះឆ្នោតសកល ដែលអាចនឹងប្រព្រឹត្តទៅនៅចុងខែវិច្ឆិកា ឆ្នាំ២០២១៕