(វ៉ាស៉ីនតោន)៖ នៅក្នុងរយៈពេល ២៤ម៉ោងកន្លងទៅនេះ មនុស្សសរុប ៣៥,៤៤៧នាក់ទៀតបានឆ្លងជំងឺ COVID-19 ខណៈអ្នកជំងឺ ៣៧៤នាក់បានស្លាប់នៅក្នុងរយៈពេលដូចគ្នា នៅទូទាំងសហរដ្ឋអាមេរិក។ នេះបើតាមការដកស្រង់ទិន្នន័យ ចេញពីគេហទំព័រ Worldometers នាព្រឹកថ្ងៃព្រហស្បតិ៍ ទី១៥ ខែកក្កដា ឆ្នាំ២០២១។

ក្រោយការបូកសរុបទិន្នន័យបន្ថែមខាងលើនេះ នាំឲ្យចំនួនករណីឆ្លង COVID-19 សរុបនៅទូទាំងសហរដ្ឋអាមេរិកកើនឡើងដល់ ៣៤,៨៤៨,០៦៨ករណី ក្នុងនោះមានអ្នកស្លាប់សរុបចំនួន ៦២៣,៨៣៨នាក់ និងជាសះស្បើយឡើងសរុប ២៩.៣២លាននាក់។ សម្រាប់ចំនួនប្រជាជនសរុប ដែលកំពុងរស់នៅលើទឹកដីសហរដ្ឋអាមេរិកគឺជាង ៣៣២លាននាក់។

បើតាមរបាយការណ៍ពីអាជ្ញាធរអាមេរិក រយៈពេលបីសប្តាហ៍ចុងក្រោយនេះ ករណីឆ្លង COVID-19 នៅទូទាំងសហរដ្ឋអាមេរិក មានការកើនឡើងវិញខ្លាំង ហើយសម្រាប់មូលហេតុចម្បងៗ គឺដោយសារតែការរាតត្បាតដ៏រហ័សនៃវីរុស COVID-19 បម្លែងថ្មី Delta និងអ្នកដែលមិនទាន់ទទួលការចាក់វ៉ាក់សាំង នៅមានច្រើនទៀត។ ដូច្នេះអាជ្ញាធរអាមេរិកបានជំរុញឲ្យពួកគេ ប្រញាប់រួសរាន់ទៅទទួលការចាក់វ៉ាក់សាំង។

គួរបញ្ជាក់ថា គិតត្រឹមថ្ងៃទី១៤ ខែកក្កដា ឆ្នាំ២០២១ សហរដ្ឋអាមេរិកបានចាក់វ៉ាក់សាំងបង្ការជំងឺ COVID-19 សរុបជាង ៣៣៤លានដូសហើយ ជូនដល់ប្រជាជនទូទាំងប្រទេស ក្នុងនោះមនុស្សសរុប ១៨៤.១៣លាននាក់ (៥៦.១%នៃចំនួនប្រជាជនសរុប) បានទទួលការចាក់យ៉ាងហោចណាស់ ១ដូស និង ១៥៩.២៦លាននាក់ (៤៨.៥% នៃចំនួនប្រជាជនសរុប) បានទទួលការចាក់គ្រប់ដូស៕