(បរទេស)៖ ក្រុមហ៊ុន Xiaomi បានប្រាប់អតិថិជនរថយន្ត SUV អគ្គិសនីម៉ូដែលថ្មី YU7 របស់ខ្លួនថា ពួកគេនឹងត្រូវរង់ចាំជាងមួយឆ្នាំដើម្បីទទួលបានរថយន្តរបស់ពួកគេ ដែលបង្កឱ្យមានការត្អូញត្អែរជាច្រើនប្រឆាំងនឹងក្រុមហ៊ុនបច្ចេកវិទ្យាដ៏ធំមួយនេះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០១ ខែកក្កដា ឆ្នាំ២០២៥។

ក្រុមហ៊ុនដែលធ្លាប់ផលិតស្មាតហ្វូន ហើយបច្ចុប្បន្នងាកមកផលិតរថយន្តអគ្គិសនី (EV) នេះ បានឱ្យដឹងថា ខ្លួនបានទទួលការបញ្ជាទិញប្រមាណ ២៤០.០០០ គ្រឿង សម្រាប់រថយន្ត YU7 ក្នុងរយៈពេល ១៨ ម៉ោងដំបូង បន្ទាប់ពីរថយន្តនេះបានដាក់លក់កាលពីយប់ថ្ងៃព្រហស្បតិ៍សប្តាហ៍មុន។ ទោះជាយ៉ាងណាក៏ដោយ មានតែរថយន្តមួយចំនួនតូចប៉ុណ្ណោះដែលមានសម្រាប់ដឹកជញ្ជូនភ្លាមៗ។ គិតត្រឹមថ្ងៃអង្គារ App Xiaomi បានបង្ហាញថា អ្នកទិញកំពុងប្រឈមមុខនឹងការរង់ចាំចន្លោះពី ៣៨ ទៅ ៦០ សប្តាហ៍។

ចាប់តាំងពីថ្ងៃសុក្រមក អ្នកទិញជាង ៤០០ នាក់ បានដាក់ពាក្យបណ្តឹងនៅលើវេទិកាអ្នកប្រើប្រាស់ Sina's Black Cat ដោយនិយាយថា ពួកគេមិនត្រូវបានជូនដំណឹងអំពីការរង់ចាំដ៏យូរនេះទេ ហើយទាមទារប្រាក់កក់ ៥.០០០ យន់ (ប្រហែល ៦៩៧,៩៧ ដុល្លារ) ដែលមិនអាចដកវិញបានរបស់ពួកគេមកវិញ។ ពួកគេបានលើកឡើងថា កម្មវិធីផ្លូវការបានបង្ហាញតែពេលវេលារង់ចាំប៉ាន់ស្មានសម្រាប់រថយន្ត បន្ទាប់ពីការបញ្ជាទិញត្រូវបានបញ្ជាក់រួចរាល់។ កង្វល់មួយទៀតគឺការព្រួយបារម្ភថា ការរង់ចាំយូរអាចនឹងធ្វើឱ្យពួកគេត្រូវបង់ប្រាក់កាន់តែច្រើន ដោយសារតែការលើកលែងពន្ធសម្រាប់រថយន្ត EV គ្រោងនឹងផុតកំណត់នៅចុងឆ្នាំនេះ។

លោក Lei Jun នាយកប្រតិបត្តិ (CEO) របស់ Xiaomi បានបង្ហោះនៅលើគណនី Weibo របស់លោកថា លោកនឹងឆ្លើយសំណួរមួយចំនួនដែលបានលើកឡើងបន្ទាប់ពីការដាក់លក់ YU7 នៅក្នុងព្រឹត្តិការណ៍ផ្សាយផ្ទាល់នៅថ្ងៃពុធនេះ។

គួរជម្រាបថា YU7 គឺជាម៉ូដែលទីពីររបស់ Xiaomi ដែលមានតម្លៃចាប់ពី ២៥៣.៥០០ យន់ (ប្រហែល ៣៥.៣៦០ ដុល្លារ) ដែលថោកជាង Tesla Model Y ជិត ៤%។ ក្រុមហ៊ុន Xiaomi បាននិងកំពុងបង្កើនទិន្នផលនៅរោងចក្រទីក្រុងប៉េកាំងរបស់ខ្លួន ហើយគ្រោងនឹងសាងសង់រោងចក្រថ្មីបន្ថែមទៀត ដើម្បីឆ្លើយតបនឹងតម្រូវការទីផ្សារ៕