(អូសាកា-ជប៉ុន)៖ នៅទីតាំងពិព័រណ៍ពិភពលោក ២០២៥ អូសាកា កាន់សៃ ប្រទេសជប៉ុន ក្រសួងពាណិជ្ជកម្ម ក្នុងនាមគណៈកម្មការអន្តរក្រសួងដើម្បីរៀបចំ និងចូលរួមពិព័រណ៍ពិភពលោក និងពិព័រណ៍ពាណិជ្ជកម្មអន្តរជាតិ បានរៀបចំ «កម្មវិធីទិវាជាតិកម្ពុជា» អមព្រឹត្តិការណ៍ពិព័រណ៍ពិភពលោក២០២៥ អូសាកា កាន់សៃ ជប៉ុន នៅថ្ងៃទី០៥ ខែកក្កដា ឆ្នាំ២០២៥។
កម្មវិធីនេះ បានប្រព្រឹត្តទៅក្រោមអធិបតីភាព លោក សុខ ចិន្តាសោភា ឧបនាយករដ្ឋមន្ត្រី និងជាតំណាងសម្តេចបវរធិបតីនាយករដ្ឋមន្ត្រី និងលោក FUJII Hisayuki អនុរដ្ឋមន្ត្រី ការបរទេសជប៉ុន និងដោយមានការចូលរួម ពីគណៈប្រតិភូអន្តរក្រសួងកម្ពុជា-ជប៉ុន តំណាងពន្លាជាតិនៃបណ្តាប្រទេសអាស៊ាន និងប្រទេសជាដៃគូ បងប្អូនខ្មែររស់នៅប្រទេសជប៉ុន និងភ្ញៀវជាតិ-អន្តរជាតិ ប្រមាណ៥០០នាក់។
«កម្មវិធីទិវាជាតិកម្ពុជា» រៀបចំឡើងក្នុងគោលបំណងសំខាន់ ដើម្បីបង្ហាញទៅកាន់ពិភពលោក នូវសក្តានុពលសេដ្ឋកិច្ច ពាណិជ្ជកម្ម វិនិយោគ ទេសចរណ៍ និងសិល្បៈវប្បធម៌ ដ៏ផូរផង់របស់កម្ពុជា និងបង្កើនកិត្តិនាមកម្ពុជាក្នុងឆាកអន្តរជាតិ ដោយក្នុងនោះ កម្ពុជា បានរៀបចំការសម្តែងផ្ទាំងទស្សនីយសិល្បៈជាច្រើនរួមមាន៖ របាំអប្សរា, ល្ខោនខោល, ឈុតឆាកគុជរី និងគុជរឹង្គ, របាំក្ងោកប៉ៃលីន, របាំព្រះស័ង្គ, របាំគោះត្រឡោក, កម្មវិធីក្បួនដង្ហែរ (National Day’s Parade) ពី The Grand Ring ឆ្ពោះទៅកាន់ពន្លាជាតិកម្ពុជា, កម្មវិធីចុះអនុស្សរណ:នៃការយោគយល់គ្នា, និងពិធីលៀងសាយភោជន៍អបអរសាទរកម្មវិធីទិវាជាតិកម្ពុជា ផងដែរ។
សូមបញ្ជាក់ផងដែរថា ពិព័រណ៍ពិភពលោក២០២៥ អូសាកា កាន់សៃ ជប៉ុន ប្រព្រឹត្តទៅរយៈពេល៦ខែ គិតចាប់ពីថ្ងៃទី១៣ ខែមេសា ដល់ថ្ងៃទី១៣ ខែតុលា ឆ្នាំ២០២៥ ដែលក្នុងនោះ កម្ពុជាបានជ្រើសរើស «ប្រាសាទកោះកេរ» ជាស្នូលក្នុងការរៀបចំសាងសង់ពន្លាជាតិកម្ពុជា ដែលបច្ចុប្បន្នពន្លាជាតិ បានទទួលភ្ញៀវជាតិ-ភ្ញៀវអន្តរជាតិ ចូលទស្សនាប្រមាណ ៨០០,០០០នាក់៕
