(ភ្នំពេញ)៖ អង្ករសរបស់កម្ពុជា ក្នុងបរិមាណចំនួន ៣៥០០តោន បាននាំចេញជើងជើងទី១ ទៅឥណ្ឌូនេស៊ីហើយ នាថ្ងៃទី២ ខែវិច្ឆិកា ឆ្នាំ២០២៣នេះ បន្ទាប់ពីកម្ពុជាបានយល់ព្រមផ្គត់ផ្គង់អង្ករដល់ឥណ្ឌូនេស៊ី។
ឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជាបានឱ្យដឹងថា កម្ពុជានឹងបន្តរដឹកជញ្ជូនអង្ករស ចំនួន ២ជើងបន្ថែមទៀតទៅឥណ្ឌូនេស៊ី ក្នុងបរិមាណសរុប ១ម៉ឺនតោន។
លោកបានគូសបញ្ជាក់បន្តថា «ទឹកប្រាក់សរុបលើកិច្ចសន្យាទី១ គឺ ប្រមាណ ៦.៥លានដុល្លា ដែលដឹកចេញជា ៣ដង។ ការដឹកចេញលើកទី១ បានទៅដល់គោលដៅ និងបានរៀបចំពិធីបើកទូរក្នុងថ្ងៃនេះផងដែរ ចំនួន ៣៥០០ តោន»។
ក្រសួងកសិកម្ម រុក្ខាប្រមាញ់ និងនេសាទ ចាត់ទុកការនាំចេញនេះ ជាលទ្ធផលនៃកិច្ចខំប្រឹងប្រែង ក្នុងការចរចាបើកទីផ្សារ និងជំរុញការនាំចេញរហូតបានសម្រេច តាមរយៈការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា និងការចូលរួមពីសំណាក់ក្រសួងស្ថាប័នពាក់ព័ន្ធទាំងអស់ រាប់ចាប់តាំងពីក្រសួងកសិកម្ម ក្រសួងពាណិជ្ជកម្ម អគ្គនាយកដ្ឋានគយ និងរដ្ឋាករកម្ពុជា ក៏ដូចជាវិស័យឯកជនជាដៃគូ គឺសហព័ន្ធស្រូវអង្ករកម្ពុជា។
សូមបញ្ជាក់ថា ក្នុងជំនួបរវាងលោក ចូកូ វីដូដូ ប្រធានាធិបតីឥណ្ឌូនេស៊ី និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅទីក្រុងហ្សាកាតា កម្ពុជាបានយល់ព្រមផ្គត់ផ្គង់អង្ករប្រមាណ ២៥ម៉ឺនតោនក្នុងមួយឆ្នាំ ដល់ប្រទេសឥណ្ឌូនេស៊ី ដើម្បីរក្សាបាននូវសុវត្ថិភាពស្បៀង និងការប្រើប្រាស់ក្នុងប្រទេស។
ការព្រមព្រៀងនាំចូលអង្ករពីកម្ពុជា ក្នុងបរិមាណ ២៥ម៉ឺនតោនក្នុងមួយឆ្នាំនេះ ធ្វើឡើងបន្ទាប់ពីឥណ្ឌា បញ្ឈប់ការនាំចេញអង្ករ ទៅកាន់ប្រទេសឥណ្ឌូនេស៊ី។ ដំបូងឡើយឥណ្ឌូណេស៊ី មានគម្រោងនាំចូលអង្ករចំនួន ១លានតោនពីឥណ្ឌា ប៉ុន្តែសំណើនេះត្រូវបានបដិសេធ។
លោក ប៉ែន សុវិជាតិ រដ្ឋលេខាធិការ និងជាអ្នកពាក្យក្រសួងពាណិជ្ជកម្ម បានប្រាប់បណ្តាញព័ត៌មាន Fresh News កាលពីពេលកន្លងទៅនេះថា ការព្រមព្រៀងផ្គត់ផ្គង់អង្ករប្រមាណ ២៥ម៉ឺនតោនក្នុងមួយឆ្នាំដល់ឥណ្ឌនេស៊ី គឺមានរយៈពេល៤ឆ្នាំ៕
