(ភ្នំពេញ)៖ រយៈពេល ៨ខែឆ្នាំ២០២៣នេះ កម្ពុជាបាននាំចេញគ្រាប់ស្វាយចន្ទីឆៅជាង ៦០ម៉ឺនតោន ទៅកាន់ប្រទេសវៀតណាម ទទួលបានទឹកប្រាក់ប្រមាណ ៨២០លានដុល្លារ ថយចុះជិត ១៦% បើធៀបនឹងរយៈពេលដូចគ្នាកាលពីឆ្នាំ២០២២។ នេះបើយោងតាមទិន្នន័យពីសមាគមស្វាយចន្ទីកម្ពុជា ដែលបណ្តាញព័ត៌មាន Fresh News ទទួលបាននៅថ្ងៃទី១៩ ខែកញ្ញា ឆ្នាំ២០២៣នេះ។
លោក អួន ស៊ីឡុត ប្រធានសមាគមស្វាយចន្ទីកម្ពុជា បានប្រាប់បណ្តាញព័ត៌មាន Fresh News ថា មូលហេតុដែលនាំឱ្យការនាំចេញស្វាយចន្ទីធ្លាក់ចុះនេះ ដោយការប្រែប្រួលអាកាសធាតុ ដែលធ្វើឱ្យទិន្នផលស្វាយចន្ទីធ្លាក់ចុះ នៅឆ្នាំនេះដោយផលិតបានប្រមាណជាង ៦៣ម៉ឺន ៤ពាន់តោនប៉ុណ្ណោះ។ កត្តាទី២ កសិករបានកាប់ដើមស្វាយចន្ទីចោលមួយចំនួន និងកត្តាមួយទៀត ការប្រកួតទិញពីសហគ្រាសក្នុងស្រុក សម្រាប់ស្តុកទុកច្នៃ ដើម្បីផ្គត់ផ្គង់ក្នុងស្រុក និងនាំចេញ។
លោកបន្តថា ទោះបីបរិមាណនាំចេញគ្រាប់ស្វាយចន្ទីមានការធ្លាក់ចុះក្តី ប៉ុន្តែតម្លៃគ្រាប់ស្វាយចន្ទីនៅក្នុងខែសីហា និងខែកញ្ញានេះ ប្រសើរជាងឆ្នាំមុន ដែលអាចលក់បានក្នុងតម្លៃចន្លោះពី ៧០០០រៀលទៅ ៧៥០០រយរៀលក្នុងមួយគីឡូក្រាម ឬប្រមាណ ១៩០០ដុល្លារក្នុង១តោន។
តែយ៉ាងនេះក្តីលោកលើកឡើង កសិករមួយចំនួនប៉ុណ្ណោះ ដែលអាចទទួលបានការចំណេញពីការឡើងថ្លៃគ្រាប់ស្វាយចន្ទីនៅឆ្នាំនេះ ព្រោះកសិករភាគច្រើន ដែលគ្មានលទ្ធភាពហាលស្តុកទុក បានលក់ចេញតាំងពីដើមឆ្នាំក្នុងអំឡុងខែមីនា និងមេសា ដែលមានតម្លៃ ត្រឹមតែ ៥ពាន់រៀល ទៅ៦ពាន់រៀលក្នុងមួយគីឡូក្រាមប៉ុណ្ណោះ។
លោកបន្ថែមថា «ដោយសារតែកសិករភាគច្រើន គាត់មិនមានហេដ្ឋារចនាសម្ព័ន្ធ នៃការទុកដាក់ស្វាយចន្ទីដូចជារានហាល និងឃ្លាំងស្តុក អីចឹងភាគច្រើនគាត់បានលក់ ក្នុងអំឡុងខែមីនា និងមេសា ដែលគាត់លក់ចេញរហូតដល់ជាង ២៣ម៉ឺនតោន។ មានកសិករតិចតួចទេ ដែលគាត់មានឃ្លាំង និងរានហាល ហើយអាចទុកលក់រហូតដល់ខែសីហា និងខែកញ្ញានេះ។ សមាគមស្វាយចន្ទីកម្ពុជា បានប្រាប់កសិករតាំងពីខែមីនា ឆ្នាំ២០២៣មកថា តម្លៃនឹងកើនឡើងនៅខែសីហា និងកញ្ញា តែយ៉ាងណាយើងលក់ចេញភាគច្រើនទៅហើយ»។
យោងតាមទិន្នន័យពីសមាគមស្វាយចន្ទីកម្ពុជា បច្ចុប្បន្នផ្ទៃដីដាំដុះគ្រាប់ស្វាយចន្ទីសរុបជាង ៧០ម៉ឺនហិកតា។ កាលពីឆ្នាំ២០២១ ផលិតកម្មគ្រាប់ស្វាយចន្ទីឆៅ នៅលើពិភពលោកមានប្រមាណ ៥លានតោន ក្នុងនោះកម្ពុជាផលិតបាន ១ ១៨០ ០០០ តោន ស្មើនឹង២៤%នៃការផលិតសរុប ដែលធ្វើឱ្យកម្ពុជាជាប់លេខ១ ដែលផលិតគ្រាប់ស្វាយចន្ទីបានច្រើនជាងគេនៅលើពិភពលោក។ ចំណែកនៅឆ្នាំ២០២២ កម្ពុជាផលិតបាន ៦៩ម៉ឺនតោន ជាប់លេខពីរនៅលើពិភពលោក៕
