(បាងកក)៖ ផែនការរបស់នាយករដ្ឋមន្ត្រីថ្មីរបស់ថៃលោក សេដ្ឋា ថាវីស៊ីន ក្នុងការលើកលែង ទិដ្ឋាការសម្រាប់ភ្ញៀវទេសចរមកពីប្រទេសចិន និងឥណ្ឌា បានជំរុញឱ្យមានក្តីសង្ឃឹមក្នុងការស្តារសេដ្ឋកិច្ចដែលកំពុងធ្លាក់ចុះរបស់ថៃ។ នេះបើយោងតាមកាសែត Channel News Asia។

កាសែត Channel News Asia បានរាយការណ៍ថា ប្រតិបត្តិករទេសចរណ៍និងអ្នកវិភាគមានទំនុកចិត្តថា ការលើកលែងទិដ្ឋាការនេះនឹងពន្លឿនការស្ទុះងើបឡើងវិញនៃឧស្សាហកម្មទេសចរណ៍ និងជួយប្រទេសថៃឱ្យសម្រេចបានគោលដៅទទួលបានភ្ញៀវទេសចររបស់ខ្លួន ខណៈដែលពួកគេបានលើកឡើងថា ការចំណាយពេលយូរលើដំណើរការស្នើសុំទិដ្ឋាការថាជាឧបសគ្គមួយក្នុងវិស័យទេសចរណ៍។

យោងតាមអ្នកវិភាគទីផ្សារមកពីក្រុមហ៊ុន Kasikorn Securities បានឱ្យដឹងថា នៅក្នុងឆមាសទីមួយឆ្នាំនេះ ពេលវេលារង់ចាំជាមធ្យមសម្រាប់ភ្ញៀវចិនដើម្បីទទួលបានទិដ្ឋាការទេសចរណ៍ទៅកាន់ប្រទេសថៃមានរយៈពេលជិត ១៥ថ្ងៃ។ ទិដ្ឋាការនេះអនុញ្ញាតឱ្យពួកគេស្នាក់នៅក្នុងប្រទេសថៃក្នុងរយៈពេលរហូតដល់ ៦០ថ្ងៃ ហើយពាក្យស្នើសុំទិដ្ឋាការត្រូវធ្វើជាលក្ខណៈបុគ្គល។

ទាំងភ្ញៀវទេសចរចិននិងឥណ្ឌាក៏អាចស្នើសុំទិដ្ឋាការនៅពេលមកដល់ផងដែរ ដែលមានតម្លៃ ២ពាន់បាត (៥៧ដុល្លារ) និងអនុញ្ញាតឱ្យពួកគេស្នាក់នៅរយៈពេល ១៥ថ្ងៃ ប៉ុន្តែមានលក្ខខណ្ឌតម្រូវមួយចំនួនដែលត្រូវបំពេញ។

មានការពិភាក្សាឬសង្ឃឹមថា រដ្ឋាភិបាលថៃថ្មីក្រោមការដឹកនាំរបស់លោក សេដ្ឋា អាចអនុវត្តផែនការនេះដោយជោគជ័យ មុនពេលរដូវកាលភ្ញៀវទេសចរច្រើនចូលមកដល់ដែលចាប់ផ្តើមក្នុងខែវិច្ឆិកា ដែលនឹងឃើញមានភ្ញៀវទេសចរចិន និងឥណ្ឌាទៅទស្សនាប្រទេសនេះ ដោយជៀសវាងការបង្កផលពិបាកណាមួយក្នុងការទទួលបានទិដ្ឋាការទេសចរណ៍។

ប្រធានក្រុមប្រឹក្សាទេសចរណ៍ថៃ លោក Chamnan Srisawat បានប្រាប់កាសែត CNA ថា៖ «តាមរយៈការសម្របសម្រួលដំណើរការផ្តល់ទិដ្ឋាការនេះ យើងមិនចាំបាច់វិនិយោគអ្វីនោះទេ ប៉ុន្តែត្រូវដោះស្រាយចំណុចឈឺចាប់ដ៏សំខាន់មួយ»។ លោកបានបន្ថែមថា៖ «ការណ៍នេះអាចបង្កើនចំនួនភ្ញៀវទេសចរបានយ៉ាងឆាប់រហ័ស»។

ប្រទេសថៃរំពឹងថានឹងទទួលបានភ្ញៀវទេសចរអន្តរជាតិរហូតដល់ ៣០លាននាក់នៅឆ្នាំនេះ ដែលកើនឡើងជិតបីដងនៃចំនួនឆ្នាំមុន តែទាបជាង ៤០លាននាក់ដែលទទួលបានកាលពីមុនឆ្នាំ២០១៩៕