(ភ្នំពេញ)៖ អគ្គលេខាធិការក្រុមប្រឹក្សាអភិវឌ្ឍន៍កម្ពុជា (CDC) និងអនុប្រធានសភាពាណិជ្ជកម្មកម្ពុជា បានវាយតម្លៃស្ថានភាពវិនិយោគនៅកម្ពុជា នៅដើមឆ្នាំ២០២៣នេះថា នៅតែមានភាពល្អប្រសើរ ដោយមានវិនិយោគិន បានមកស្នើសុំចុះបញ្ជីជាប្រចាំ ​ជាពិសេសគម្រោងវិនិយោគលើវិស័យវាយនភណ្ឌ និងអេឡិចត្រូនិក។

លោក សុខ ចិន្តាសោភា រដ្ឋមន្រ្តីប្រតិភូអមនាយករដ្ឋមន្រ្តី អគ្គលេខាធិការ CDC បញ្ជាក់ឲ្យដឹងថា ថ្វីត្បិតតែក្នុងរយៈពេលដើមឆ្នាំនេះ ស្ថានភាព​នៅក្នុងតំបន់ និងលើពិភពលោក មាន​ភាពតឹងតែងដោយសារបញ្ហាភូមិសាស្រ្តនយោបាយក៏ដោយ ប៉ុន្តែជារៀងរាល់សប្តាហ៍ និងរៀងរាល់ខែ CDC នៅតែបន្តទទួលបាននូវសំណើរសុំបញ្ជីវិនិយោគ ពីសំណាក់វិនិយោគិន ទាំងក្នុង និងក្រៅស្រុក​​ ​ក្នុងនោះវិស័យដែលទទួល បានការចុះបញ្ជីវិនិយោគច្រើនជាងគេ គឺវិស័យវាយនភណ្ឌ និងអេឡិចត្រូនិក។

លោកមានប្រសាសន៍ថា ល្គឹកណាដែលកម្ពុជានៅតែទទួលបានការចុះបញ្ជីគម្រោងវិនិយោគ គឺជាសញ្ញាល្អ ដែលសបញ្ជាក់ថា កម្ពុជានៅតែជាប្រទេស ដែលគេយកចិត្តទុកដាក់។

លោកគូសបញ្ជាក់បន្តថា «ខ្ញុំចង់ជម្រាបជូនថា ប្រទេសយើងមានភាពទាក់ទាញ។ ស្ថិរភាព សុខសន្តិភាព សណ្តាប់ធ្នាប់សាធារណៈនេះ ជាកត្តាមួយដែលគេទទួលស្គាល់គ្រប់គ្នាទាំងស្ថាប័នអន្តរជាតិទាំងអស់។ នេះជាចំណុចសំខាន់ បើអត់មានកត្តានេះ គេមិនមកទេ។ តែបើឱ្យកើនឡើងខ្លាំងទៅមិនរួចទេ។ វិស័យសរសរស្តមទាំង ៤រួមមានវិស័យកសិកម្ម ទេសចរណ៍ វាយនភណ្ឌ អចលទ្រព្យ ក្នុងនោះវិស័យទេសចរណ៍ប៉ះពាល់ខ្លាំង ដែលនាំឱ្យមានការថមថយ ប៉ុន្តែវិស័យថ្មីមួយ គឺវិស័យអេឡិចត្រូនិក មានរាល់ខែ ដែលពីមុនមិនមានទេ មានតែវិស័យកាត់ដេរ»។

យោងតាមរបាយការណ៍ CDC បានឱ្យដឹងថា ក្នុងត្រីមាសទី១ ឆ្នាំ២០២៣នេះ ខ្លួនបានអនុម័តគម្រោងថ្មី និងគម្រោងពង្រីកផលិតកម្មចំនួន ៣៩គម្រោង ដែលមានទុនវិនិយោគសរុប​ ២៩៤លានដុល្លារអាមេរិក និងបង្កើតការងារថ្មីបានចំនួនប្រមាណ ៤៧០០០កន្លែង។ ក្នុងរយៈពេល ៣ខែដើមឆ្នាំ២០២៣ គម្រោងវិនិយោគមានការថយចុះចំនួន ៨គម្រោង ខណៈទុនវិនិយោគមានការថយចុះចំនួនប្រមាណ ២.២ប៊ីលានដុល្លារអាមេរិក បើធៀបនឹងរយៈពេលដូចគ្នា នៅឆ្នាំ២០២២។

ក្នុងចំណោមគម្រោងវិនិយោគទាំង៣៩ មានគម្រោងចំនួន៣៨ ស្ថិតនៅក្នុងវិស័យឧស្សាហកម្ម និង ១គម្រោងស្ថិតនៅក្នុងវិស័យទេសចរណ៍។

ថ្លែងប្រាប់បណ្តាញព័ត៌មាន Fresh News នៅថ្ងៃទី១០ ខែមេសា ឆ្នាំ២០២៣នេះ​ ​ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ​បានកត់សម្គាល់ថា ដំណើរការវិនិយោគនៅកម្ពុជា នៅតែមានភាពល្អប្រសើរ ដោយលោកសង្កេតឃើញថា ការចុះវិនិយោគ​នៅ CDC ​​ក៏ដូចជាការចុះបញ្ជីតាមថ្នាលបច្ចេកវិទ្យា របស់ក្រសួងសេដ្ឋកិច្ច និងហិរញ្ញវត្ថុ ​និងក្រសួងពាណិជ្ជកម្ម​ មានកំណើនគួរឱ្យកត់សម្គាល់ ដោយសារកម្ពុជាអនុវត្តនូវកិច្ចព្រមព្រៀងផ្សេងៗ ដែលនាំឱ្យកម្ពុជា ទាក់ទាញបានវិនិយោគិនទាំងក្នុង និងក្រៅស្រុក។

លោកមានប្រសាសន៍បន្តថា «ដោយសារការអនុវត្តនូវកិច្ចព្រមព្រៀងសេរីពាណិជ្ជកម្មកម្ពុជា-ចិន កិច្ចព្រមព្រៀងសេរីពាណិជ្ជកម្មកម្ពុជា-កូរ៉េ និងកិច្ចព្រមព្រៀង RCEP និងការទទួលបាននូវភាពអនុគ្រោះពន្ធ EBA និង GSP សង្កេតឃើញថាកំណើននៃការបណ្តាក់ទុនវិនិយោគ លើគ្រប់វិស័យផ្សេងៗ ឥលូវនេះមិនត្រឹមតែតំបន់សេដ្ឋកិច្ចពិសេសទេ ការវិនិយោគនៅក្រៅតំបន់សេដ្ឋកិច្ចពិសេស ដែលជាវិស័យមិនមែនកាត់ដេរ ​ពោលគឺអនុវិស័យដែលគាំពារដល់កំណើនសេដ្ឋកិច្ច ដូចជាឧស្សាហកម្មកែច្នៃ ឧស្សាហកម្មយានយន្ត និងឧស្សាហកម្មអេឡិចត្រូនិក គឺមានការវិនិយោគច្រើន»។

បើតាម CDC ក្នុងត្រីមាសទី១ ឆ្នាំ២០២៣ ​ចិនបានឈរនៅលេខទី១ ដែលវិនិយោគច្រើនជាងគេ គ្រប់គ្រងរួមចំណែកប្រមាណ ៧០%នៃការវិនិយោគសរុប ខណៈការវិនិយោគក្នុងស្រុកឈរ នៅលំដាប់លេខរៀងទី២​៕