(ភ្នំពេញ)៖ អគ្គរដ្ឋបាលគយចិន ទើបបានអនុម័តទទួលស្គាល់ជាផ្លូវការ អនុញ្ញាតឲ្យចំការមៀនចំនួន៧៤ និងរោងចក្រវេចខ្ចប់ចំនួន៨ អាចការកែច្នៃ និងនាំចេញផ្លែមៀនស្រស់ទៅកាន់ប្រទេសចិនបានដោយផ្ទាល់។
ការអនុម័តទទួលស្គាល់ជាផ្លូវការ របស់អគ្គរដ្ឋបាលគយចិន ធ្វើឡើងនៅថ្ងៃទី៧ ខែកញ្ញា ឆ្នាំ២០២២ បន្ទាប់ពីមន្ត្រីជំនាញរបស់ខ្លួន បានដំណើរការត្រួតពិនិត្យចំការមៀន និងរោងចក្រប្រព្រឹត្តកម្មកម្ចាត់សមាសភាពចង្រៃលើផ្លែមៀន តាមរយៈប្រព័ន្ធវីឌីអូ នាពេលថ្មីៗនេះ។
រោងចក្រវេចខ្ចប់ទាំង៨ដែលទទួលបានការអនុញ្ញាតរួមមាន ១៖ ក្រុមហ៊ុន BAMIN AGRICULTURE HI-TECH DEVELOPMENT CO., LTD, ២៖ ក្រុមហ៊ុន CHINA JINKWOAYUAN IMPORT EXPORT (CAMBODIA) CO., LTD, ៣៖ ក្រុមហ៊ុន TCMC CO., LTD, ៤៖ ក្រុមហ៊ុន CAMBODIAN BANANA AGRICULTURAL CO., LTD, ៥៖ ក្រុមហ៊ុន GAO YUAN (CAMBODIA) DEVELOPMENT CO., LTD, ៦៖ ក្រុមហ៊ុន AL JAZEELAN FOOD PTE. LTD , ៧៖ ក្រុមហ៊ុន JIA DUO BAO BEVERAGE CO., LTD និង៨៖ ក្រុមហ៊ុន JINDIYUAN AGRICULTURAL DEVELOPMENT CO., LTD។
លោក កែ មុន្ធីវុធ ប្រធាននាយកដ្ឋានការពារដំណាំអនាម័យ និងភូតគាមអនាម័យ នៃអគ្គនាយកដ្ឋានកសិកម្ម បានឲ្យដឹងថា «អគ្គរដ្ឋបាលគយនៃសាធារណរដ្ឋប្រជាមានិតចិន អនុម័តជាផ្លូវការរួចហើយ ឲ្យចំការមៀន៧៤ និងរោងចក្រវេចខ្ចប់ចំនួន៨ កែច្នៃ និងការនាំចេញផ្លែមៀនស្រស់ ទៅកាន់ប្រទេសចិនបាន។ ចំពោះការនាំចេញផ្លែមៀនស្រស់ទៅកាន់ប្រទេសចិន នឹងប្រព្រឹត្តិឡើងយ៉ាងជាក់លាក់នាពេលឆាប់ៗខាងមុខ ដោយមិនមានលក្ខខណ្ឌតម្រូវផ្សេងៗទៀតនោះឡើយ»។
លោកបានបន្ដថា ចំពោះការនាំចេញផ្លែមៀនលើកដំបូងនេះ អាចនឹងប្រព្រឹត្តឡើងនៅខែតុលា ឆ្នាំ២០២២ ដែលជារដូវប្រមូលផលពេញលេញ និងគ្រប់គ្រាន់ក្នុងការនាំចេញ។
លោក សាយ សុផាត ប្រធានមន្ទីរកសិកម្មខេត្តប៉ៃលិន នាពេលថ្មីៗនេះបានបញ្ជាក់ប្រាប់បណ្តាញព័ត៌មាន Fresh News ថា កសិករដាំមៀនបានត្រៀមខ្លួនរួចរាល់សម្រាប់នាំចេញទៅកាន់ប្រទេសចិន ខណៈខេត្តប៉ៃលិន អាចមានមៀនគ្រប់គ្រាន់សម្រាប់ការនាំចេញទៅកាន់ចិន ក្នុងខែតុលា ឆ្នាំ២០២២ខាងមុខនេះ ហើយបរិមាណនាំចេញលើកដំបូងចំនួន ១ពាន់តោន។
ផ្លែមៀនដែលដាំដុះសម្រាប់នាំចេញទៅប្រទេសចិន ត្រូវតែចុះបញ្ជីនៅអគ្គនាយកដ្ឋានកសិកម្ម និងទទួលស្គាល់ដោយគយចិន ហើយគ្រប់ចំការមៀន ដែលបានចុះបញ្ជីត្រូវអនុវត្តការដាំដុះតាមគោលការណ៍ការអនុវត្តកសិកម្មល្អ (GAP) និងមែកជាប់នឹងផ្លែមៀន ត្រូវមានប្រវែងមិនលើសពី១៥សង់ទីម៉ែត្រ ព្រមទាំងត្រូវឆ្លងកាត់ការធ្វើប្រព្រឹត្តិកម្មកម្ចាត់សមាសភាពចង្រៃ ដើម្បីធានាថា ផ្លែមៀនស្រស់ទាំងនោះ ពុំជាប់ជាមួយនូវសមាសភាពចង្រៃភូតគាមអនាម័យ។
ក្នុងឆ្នាំ២០២១ ដំណាំមៀននៅទូទាំងប្រទេស មានផ្ទៃដីដាំដុះសរុបចំនួន ១២ ៨៣៧ហិចតា ផ្ទៃដីប្រមូលផលមានចំនួន១០ ៥៦៥ហិចតា ដោយទទួលទិន្នផលជាមធ្យមចំនួនជាង ១២តោនក្នុងមួយហិចតា ដែលមានបរិមាណផលិផលសរុបប្រមាណ ១៣១ ៤៩៨តោន៕
