(ភ្នំពេញ)៖ លោក ឆាយ វីរៈយុទ្ធ (ឈ្មោះកំណើត ឆាយ ចាន់​ឆោម) កើតនៅថ្ងៃទី១២ ខែកញ្ញា ឆ្នាំ១៩៨២ មានស្រុកកំណើត ភូមិពោធ ឃុំព្រែកក្របៅ ស្រុកកងមាស ខេត្តកំពង់ចាម។ ក្នុងគ្រួសារមានបងប្អូន៧នាក់ ស្រី២នាក់ និងប្រុស៥នាក់ លោកជាកូនទី៦។ ឪពុកលោកឈ្មោះ ឆយ គឹមឆាយ ជាអតីតមន្ត្រីយោធា និងម្ដាយឈ្មោះ គង់​ឡាយស៊ី ជាអតីតគ្រូបង្រៀន។ សព្វថ្ងៃលោកមានភរិយាឈ្មោះ សែ ចាន់ឌី មានកូនស្រីម្នាក់ឈ្មោះ វីរៈយុទ្ធ អភិជាតាទេវី។

* អំពីការសិក្សា៖
គម្រប់អាយុ៨ឆ្នាំកុមារ ចាន់ឆោម (ឈ្មោះកំណើត ឆាយ​ ចាន់​ឆោម) ក្នុងឆ្នាំ១៩៩០ ត្រូវបានឪពុកម្តាយបញ្ជូនឲ្យទៅរៀន នៅសាលាបឋមសិក្សាពាម រៀននៅទីនោះបាន៣ឆ្នាំ ដល់ឆ្នាំ១៩៩៣ ក៏បានប្តូរមករៀននៅសាលាបឋមសិក្សា អង្គរបាជ័យវិញ។ រៀនបានតែ១ឆ្នាំ ក៏បានផ្លាស់ទៅរស់នៅជាមួយបងស្រីនៅខេត្តកំពង់ធំ ហើយក៏បានចូលរៀននៅសាលាព្រះសីហនុ (ខេត្តកំពង់ធំ) បាន១ឆ្នាំប៉ុណ្ណោះ ក៏ប្តូរមករៀននៅភ្នំពេញនៅវិទ្យាល័យឥន្ទ្រទេវី រហូតដល់ប្រឡងជាប់សញ្ញាប័ត្រ មធ្យមសិក្សាទុតិយភូមិនាឆ្នាំ២០០៥។

ក្រោយបញ្ចប់មធ្យមសិក្សាទុតិយភូមិ លោកក៏បានបន្តការសិក្សានៅមហាវិទ្យាល័យ ជាតិគ្រប់គ្រងផ្នែកពាណ្ជិសាស្ត្រ តែលោករៀនបាន២ឆ្នាំ ក៏ព្យួរការសិក្សាហូតមក។ លោក ឆាយ វីរៈយុទ្ធ បានបញ្ជាក់ថា កាលនៅរៀនលោករៀនមិនពូកែទេ ដោយសារលោកតែងឆ្លៀតយកពេលសិក្សា ទៅជួយកិច្ចការងារឪពុកម្តាយ ដើម្បីទ្រទ្រង់ជីវភាពគ្រួសារ។

* អំពីប្រវត្តិក្នុងវិស័យសិល្បៈ និងស្នាដៃសិល្បៈ៖
ថ្វីបើកុមារ ឆាយ ចាន់ឆោម រៀនមិនសូវពូកែ និងបានពន្ទុមិនល្អតែកុមារ ឆាយ​ចាន់​ឆោម តែងតែត្រូវបានលោកគ្រូនិងមិត្តរួមថ្នាក់ សំណូមពរឲ្យច្រៀងក្នុងថ្នាក់ ដោយ ​ឆោម ច្រៀងបានពីរោះ និងក៏បានការសរសើរពីមិត្តរួមថ្នាក់ និងរួមសាលា។ ចំណូលចិត្តនិងទេពកោសល្យពីកុមារនេះហើយ ដែលញ៉ាំងឲ្យកុមារឆោម មិនលះបង់ទេពកោសល្យនេះ ​រួមនឹងការលើកទឹកចិត្តពីឪពុកម្តាយផងនោះ​ និងក្រោយពេញរូបរាងជាយុវវ័យ និងបានមករស់នៅ និងបន្តការសិក្សានៅភ្នំពេញផង យុវជន ឆោម ក៏ឆ្លៀតពេលល្ងាចៗពិការសិក្សា សុំគេច្រៀងតាមបៀហ្គាឌេន ដែលពេលនោះ ទទួលបានប្រាក់តាមការឲ្យ និងការយោគយល់ពីម្ចាស់ហាង។

មកដល់ឆ្នាំ២០២០នេះ គឺរយៈពេល១៨ឆ្នាំហើយ ក្រៅពីស្នាដៃខាងលើលោក ឆាយ វីរៈយុទ្ធ ក៏ទទួលបានការទាក់ទាញ ពីប្រជាជនខ្មែរនៅក្រៅស្រុក ដោយលោកត្រូវបានការ​អញ្ជើញ ចេញទៅសម្តែងជារឿយៗ នៅក្រៅប្រទេសដូចជា ប្រទេស​បារាំង អាមេរិក កាណាដា​ ជាដើម និងទទួលបានការគាំទ្រយ៉ាងខ្លាំង ពីសំណាក់បងប្អូនខ្មែររស់នៅទីនោះ។

* អំពីជីវិតស្នេហា៖
ក្នុងភាពជាតារាចម្រៀងលំដាប់ប្រទេសមួយរូបដែរ តែពុំដែលលេចឮស្នេហាគួរជាការចាប់អារម្មណ៍អ្វីឡើយ ពេលលេចឮគឺលោកត្រៀមចូលរោងការតែម្តង គឺនាឆ្នាំ២០១៧។ លោកបានចូលរោងការជាមួយ កូនក្រមុំរបស់លោកមានឈ្មោះ សែ ចាន់ឌី ជាកូនស្រីឈ្មួញស្រូវអង្ករដ៏ល្បីមួយក្នុងខេត្តកំពង់ចាម។​ ពិធីមង្គលការនោះមានភ្ញៀវអ្នកជំនួញ និងអ្នកសិល្បៈគ្រប់ផលិតកម្មចូលរួមយ៉ាងកុះករ។ បច្ចុប្បន្នលោកមានកូនស្រីម្នាក់ មានអាយុជាង៥ឆ្នាំ​ ជាទីស្រឡាញ់របស់គ្រួសារលោក និងលោកតាលោកយាយទាំងសងខាង។

* អំពីជំនួញក្រៅពីសិល្បៈ៖
ចំពោះជំនួញក្រៅពីសិល្បៈវិញ ក្នុងដៃលោកកំពុងគ្រប់គ្រង ក្រុមហ៊ុនអាជីវកម្ម​ស្រូវអង្ករមានឈ្មោះថា​ «ស្តេចអង្ករ» មានដេប៉ូចែកចាយចំនួន៨សាខា ក្នុងប្រទេសកម្ពុជា។ ក្រៅពីផ្គត់ផ្គង់តំរូវការសម្រាប់ប្រជាជនក្នុងប្រទេស ក្រុមហ៊ុន «ស្តេចអង្ករ» ក៏បាននាំចេញទៅក្រៅប្រទេស​ តែនៅមានលក្ខណៈទ្រង់ទ្រាយតូចនៅឡើយ ដោយលោកបាននិងកំពុងរៀបចំបន្ថែមម៉ាស៊ីនកិនស្រូវ និងម៉ាស៊ីនសម្ងួតស្រូវ។ ក្រៅពីជំនួញស្រូវអង្ករខាងលើនេះ លោកនៅមានអាជីវកម្ម អចលនទ្រព្យ (ជាដីឡូតិ៍ ផ្ទះល្បែង ផ្ទះវីឡា) ជាច្រើនកន្លែងផ្សេងទៀតដូចជា នៅភ្នំបាសិទ្ធ, ព្រះសីហនុ, កំពង់ឆ្នាំង, មណ្ឌលគិរី, ភ្នំពេញ។ សព្វថ្ងៃលោកជិះរថយន្តទំនើបប្រភេទ SUV ឆ្នាំ២០១៩ ដែលមានតម្លៃជិត១០ម៉ឺនដុល្លារ និងផ្ទះរស់នៅសព្វថ្ងៃផ្ទះ២ល្វែង នៅក្នុងតំបន់​កាំកូស៊ីធី ដែលជាតំបន់ដ៏មានសក្តានុពល៕