(ភ្នំពេញ)៖ ក្រុមចោរប្លន់ប្រដាប់អាវុធមានគ្នា៤នាក់ បានធ្វើសកម្មភាពបាញ់ជាច្រើន ទៅលើជនរងគ្រោះ២នាក់ ក្នុងនោះមានស្រីម្នាក់ផងដែរ បណ្តាលឲ្យត្រូវបុរសជាម្ចាស់ម៉ូតូមួយគ្រាប់ ត្រង់ចង្កេះរងរបួសធ្ងន់ធ្ងរ ប្លន់យកម៉ូតូ Dream C125 សេរីឆ្នាំ២០១២ បានសម្រេចគេចខ្លួនបាត់ដោយសុវត្តិភាព នៅម៉ោង៤៖០០នាទីទៀបភ្លឺ ថ្ងៃទី៣០ ខែវិច្ឆិកា ឆ្នាំ២០១៥ នៅចំណុចមុខសាលាបឋមសិក្សាឃ្មួញ ស្ថិតក្នុងសង្កាត់ឃ្មួញ ខណ្ឌសែនសុខ។
តាមសំដីជនរងគ្រោះឈ្មោះ រី ទក ភេទប្រុស អាយុ២៩ឆ្នាំ បានឲ្យដឹងថា នៅមុនពេលកើតហេតុរូបគេ បានជិះម៉ូតូមួយគ្រឿង Honda Dream C125 ពណ៌ខ្មៅសេរីឆ្នាំ២០១២ មិនចាំស្លាកលេខ ជិះគ្នា២នាក់សង្សារ ដោយធ្វើដំណើរតាមបណ្តោយផ្លូវហានណូយ ដែលទើបតែមកពីផ្ទះមីងជាមួយសង្សារ នៅម្តុំផ្សារដីហុយ ក្នុងបំណងត្រលប់ទៅផ្ទះ ខណៈមកដល់ចំណុចកើតហេតុ និងជិតដល់ផ្ទះផងនោះ ស្រាប់តែមានជនសង្ស័យ៤នាក់ ជិះម៉ូតូ២គ្រឿង មានម៉ាក Scoopy និងម៉ាក Yamaha FZ ពណ៌ក្រហម ប្រដាប់ដោយកាំភ្លើងខ្លី មិនចាំម៉ាក២ដើម បានមកកៀរឲ្យឈប់ ហើយដកកាំភ្លើងពីចង្កេះបាញ់ប្រហារ មកលើជនរងគ្រោះជាច្រើនគ្រាប់ បណ្តាលឲ្យបុរសជាម្ចាស់ម៉ូតូ និងជាសង្សារត្រូវត្រង់ចង្កេះមួយគ្រាប់ រួចហើយក្រុមជនចោរបានប្លន់ យកម៉ូតូជិះគេចខ្លួនបាត់ស្រមោល។
ក្រោយពេលកើតហេតុជនរងគ្រោះ បានដឹកយកទៅសង្គ្រោះបន្ទាន់នៅមន្ទីរពេទ្យ៕
