(កំពង់ឆ្នាំង)៖ ២នាក់ប្តីប្រពន្ធ បើកឡាន បុកគូថឡានគេដែលចតនៅស្ងៀម បណ្តាលឲ្យបី្តបាក់ជើង ប្រពន្ធរបួសស្រាល ក្រោយមកមន្ដ្រីនគរបាលបានទៅដឹកអ្នករបួសទៅពេទ្យ ក៏ជួបគ្រោះថ្នាក់ចរាចរណ៍ម្ដងទៀត ដោយបុកដើមឈើក្រឡាប់ បណ្ដាលឲ្យស្លាប់នគរបាលដែលជាអ្នកបើកបរ ចំណែកអ្នករបួសបាក់ជើង របួសកាន់តែធ្ងន់ធ្ងរ ឯប្រពន្ធដែលរបួសស្រាល ក៏បន្ថែមរបួសបាក់ដៃ។
ហេតុការណ៍បានកើតឡើង នៅយប់រំលងអធ្រាត្រឈានចូលថ្ងៃទី០៧ ខែកុម្ភៈ ឆ្នាំ២០១៨ នៅលើកំណាត់ផ្លូវជាតិលេខ៥ ម្តុំផ្សារទួលក្រឡាញ់ ស្ថិតក្នុងសង្កាត់កំពង់ឆ្នាំង ក្រុងកំពង់ឆ្នាំង។
សមត្ថកិច្ចបានបញ្ជាក់ថា មុនពេលកើតហេតុ២នាក់ប្តីប្រពន្ធ បានបើករថយន្តកូរ៉េដឹកកន្ទេល ទៅបុកគូថរថយន្តហ៊ីយ៉ាន់ដាយដឹកស្រូវ ដែលគេចតនៅលើចិញ្ចើមផ្លូវដើម្បីលើកស្រូវដាក់ បណ្តាលឲ្យប្រពន្ធរងរបួសស្រាល រីឯបុរសជាប្តីរងរបួសធ្ងន់។
ក្រោយពេលកើត ហេតុមន្ដ្រីនគរបាលចរាចរណ៍ បានចុះទៅអន្តរាគមន៍ និងដឹកជនរងគ្រោះទាំង២នាក់ប្តីប្រពន្ធ តាមរថយន្តស៊ីរ៉ែនមកកាន់មន្ទីរពេទ្យ ពេលនោះរថយន្តស៊ីរ៉ែនក៏ជួបគ្រោះថ្នាក់ចរាចរណ៍ម្តងទៀត ដោយបានរេចង្កូតបុកដើមឈើ និងតូបលក់ដូរនៅក្បែរចិញ្ចើមផ្លូវ ហើយក្រឡាប់ជាច្រើនត្រឡប់បណ្តាលឲ្យនគរបាលម្នាក់ដែលជាអ្នកបើកបរ បែកក្បាលស្លាប់ភ្លាមៗ។
ចំណែកបុរសរងគ្រោះម្នាក់ទៀត រងរបួសធ្ងន់បាក់ភ្លៅស្តាំ រីឯស្ត្រីជាប្រពន្ធរងរបួសធ្ងន់ ដោយបាក់ដៃជាច្រើនកំណាត់ និងបានគៀបជាប់ក្នុងរថយន្តផងដែរ។ យ៉ាងណាក៏ដោយ ហេតុការណ៍ចុងក្រោយនេះ សមត្ថកិច្ចបានប្រើរយៈពេលជាងកន្លះម៉ោង ទើបគាស់យកស្ត្រីរងគ្រោះចេញបានហើយដឹកតាមរថយន្តសង្គ្រោះទៅកាន់មន្ទីរពេទ្យខេត្ត៕
