(ភ្នំពេញ)៖ នាបរិវេណវិទ្យាល័យសម្តេច ហ៊ុន សែន ព្រែកកំពឹស ស្ថិតក្នុងសង្កាត់ព្រែកកំពឹស ខណ្ឌដង្កោ រាជធានីភ្នំពេញ មានភាពអ៊ូអរ អធឹកអធម សប្បាយរីករាយ ពោរពេញដោយស្នាមញញឹម របស់សិស្សានុសិស្ស យុវជនយុវនារី មាតាបិតាអាណាព្យាបាល លោកគ្រូអ្នកគ្រូ អជ្ញាធរមូលដ្ឋាន សរុបជិត១៦០០នាក់ នៅព្រឹកថ្ងៃសុក្រ ០៥រោច ខែមិគសិរ ព.ស២៥៦១ ត្រូវនឹងថ្ងៃទី០៨ ខែធ្នូ ឆ្នាំ២០១៧។

តើពួកគាត់សប្បាយចិត្ត រីករាយ ញញឹមញញែមពីរឿងអ្វី?

នោះគឺជាមនោសញ្ចេតនានិងភាពស្និតស្នាលចំពោះវត្តមាន លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធ ហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ ចុះមកចែករង្វាន់ដល់សិស្សពូកែ និងចែកអំណោយ ដល់សិស្សក្រីក្រជួបការលំបាក ដែលលោកធ្លាប់បានធ្វើរួចម្តងហើយកាលពីឆ្នាំ២០១៦ និងសន្យាធ្វើបន្តជារៀងរាល់ឆ្នាំ ចំពោះកូនក្មួយសិស្សានុសិស្ស នៃវិទ្យាល័យសម្តេចហ៊ុនសែនព្រែកកំពឹសទំាងមូល។ ការសន្យានោះគឺ នៅពេលណាដែល សិស្សប្រលងសញ្ញាបត្រ មធ្យមសិក្សាទុតិយភូមិ បាននិទ្ទេសA លោកនឹងផ្តល់ជូន ម៉ូតូហុងដាសេរីថ្មី០១គ្រឿង កុំព្យូទ័រយួរដៃ​ (Laptop) ០១គ្រឿង ថវិកា៤០ម៉ឺនរៀល សម្រាប់សិស្សនិទ្ទេសB លោកនឹងផ្តល់ជូននូវ កុំព្យូទ័រយួរដៃ០១គ្រឿង ថវិកា៤០ម៉ឺនរៀល តែចំពោះសិស្សប្រលង មធ្យមសិក្សាបឋមភូមិ ដែលបានចំណាត់ថ្នាក់លេខ១ប្រចាំសាលា លោកនឹងផ្តល់ជូន កុំព្យូទ័រយួរដៃ០១គ្រឿង ថវិកា៤០ម៉ឺនរៀល និងសិស្សបានចំណាត់ថ្នាក់លេខ២ លោកនឹងផ្តល់ជូនកុំព្យូទ័រយួដៃ០១គ្រឿងដែរ។

គ្រាន់តែលោកឧត្តមសេនីយ៍ឯក រ័ត្ន ស្រ៊ាង ចុះពីលើរថយន្តភ្លាម សំឡេងអបអរសាទរ ប្រកបដោយមនោសញ្ចេតនា ស្និតស្នាលក៏ផ្ទុះឡើង ទ្រហឹងអឹងកងពេញផ្ទៃសាលា ហើយគណអធិបតី ក៏ញាប់ជើងញាប់ដៃជួបជាមួយបងប្អូនកូនក្មួយ មានទាំងការ៉េម មានទាំងនំប៉័ង ទឹកសុទ្ធ ទឹកអំពៅ និងនៅបរិភោគជាមួយគ្នាយ៉ាងសប្បាយរីករាយ។

កាលពីឆ្នាំ២០១៦ គឺមានសិស្សនៃវិទ្យាល័យសម្តេចហ៊ុនសែនព្រែកកំពឹស ចំនួន០៤នាក់ បានទទួលម៉ូតូ០១គ្រឿង កុំព្យូរទ័រយួរដៃ០៤គ្រឿង និងថវិកា១លាន២សែនរៀល ពីលោកឧត្តមសេនីយ៍ រ័ត្ន ស្រ៊ាង តែក្នុងឆ្នាំ២០១៧នេះ គឺមានសិស្សចំនួនតែ០៣នាក់ប៉ុណ្ណោះ ដែលទទួលបានរង្វាន់លើកទឹកចិត្ត ជាកុំព្យូទ័រ០៣គ្រឿងនិងថវិកា៨០ម៉ឺនរៀល ពីលោកឧត្តមសេនីយ៍ឯក រ័ត្ន ស្រ៊ាង តាមការសន្យា នោះគឺសិស្សមធ្យមសិក្សាទុតិយភូមិ និទ្ទេសBម្នាក់ និងសិស្សបឋមភូមិ ដែលមានចំណាត់ថ្នាក់លើគេ ចំនួន០២នាក់។

ព្រមជាមួយគ្នានេះ សិស្សក្រីក្រជួបការលំបាក ចំនួន៥១នាក់បន្ថែមពីលើសិស្សចាស់៦៣នាក់ ក៏ទទួលបានការជួយឧបត្ថម្ភពី លោកឧត្តមសេនីយ៍ឯក រ័ត្ន ស្រ៊ាង ផងដែរ ដោយក្នុងម្នាក់ៗទទួលកង់មួយ កាបូបស្ពាយមួយ សម្ភារៈសិក្សាមួយឈុត និងថវិកា៥ពាន់រៀល។

ក្រៅពីនេះ លោកឧត្តមសេនីយ៍ឯក រ័ត្ន ស្រ៊ាង ក៏បានឧត្ថម្ភថវិកា ជូនដល់ លោកគ្រូអ្នកគ្រូ ទូទាំងវិទ្យាល័យសម្តេចហ៊ុនសែនព្រែកកំពឹស ក្នុងម្នាក់ៗ ២ម៉ឺនរៀល ព្រមទាំង ឪពុកម្តាយអាណាព្យាបាលសិស្ស យុវជន ស.ស.យ.ក កម្លាំងការពារសន្តិសុខ អាវុធហត្ថ នគរបាល ប្រជាការពារ ក្រុមភ្លេងឆៃយ៉ាំសិស្ស ក៏ទទួលបានថវិកាដូចៗគ្នា។

ក្នុងឱកាសដ៏ឱឡារិកនេះ លោកឧត្តមសេនីយ៍ឯក រ័ត្ន ស្រ៊ាង ក៏បានប្រកាសដាក់ឲ្យប្រើប្រាស់នូវផ្លូវបេតុងក្នុងសាលា ចូលទៅកាន់អាគារសិក្សាចំនួន០៤ខ្សែ ដែលលោកបានឧបត្ថម្ភការកសាងទាំងស្រុងកន្លងមក និងសន្យាជួយកសាងបន្ថែម តាមសំណូមពរលោកនាយកសាលាចំនួន០១ខ្សែរទៀតផងដែរ។

ជាចុងបញ្ចប់លោកឧត្តមសេនីយ៍ឯក រ័ត្ន ស្រ៊ាង បានផ្តាំផ្ញើ និងចែករំលែកបទពិសោធន៍រស់នៅនាំទៅរកភាពជោគជ័យ ដែលលោកចាត់ទុកថាជាមេរៀនដែលនៅក្នុងសាលារៀន ឬ សកលវិទ្យាល័យ មិនមានបង្រៀនជូនដល់កូនក្មួយសិស្សានុសិស្ស ទាំងអស់ទុកជាគតិសម្រាប់ពិចារណា និងបានថតរូបអនុស្សាវរីយ៍ ជាមួយកូនក្មួយសិស្សានុសិស្សប្រកដដោយភាពស្និតស្នាលជាទីបំផុត៕